2 Korente Diunvuija - MUKANDA WA MYIDI MUKULU（TSH96）

Diunvuija— Mukanda muibidi ewu udi uleja muvua bena Kristu ba mu Korente kabayi bumvuangana bimpe menemene ne Polu to. Bena ditaba bakuabu bavua bamubungamija bikole, bualu bavua bamba ne: Polu kena ne muanzu wa mupostolu nansha. Nansha Polu ubandamuna ne miaku mikole, udi amu uleja mudiye ubananga bikole, ujinga kumvuangana nabu. Ke mudiye uleja disanka divuaye nadi diba divua bantu bakuabu banumanyishe malu mimpe a mu Korente (7.5-15).Polu mumane kulondela bena Korente njiwu ivuaye mupete mu buloba bua Efeze (1.1-11), udi ubavuluija ntatu ivuaye mupete kudi bena Korente. Udi ubaleja patoke buneme bua muanzu wende wa mupostolu, wa muntu udi Yezu Kristu mutume. Ke mudiye ubumvuija muvuaye ne bua kubabela ne miaku mikole mu mukanda mukuabu uvuaye mubatumine. Kadi uvua usanka bikole, pavuaye mumvue muvua miaku yende mikole miambuluishe bena Korente bua badilengeje (1.12—7.16).Bua milambu ya kutumina bena ditaba ba mu buloba bua Yudeya (bit. 8-9), Polu udi ulomba bena Korente bua bikale ne muoyi wa kalolu. Bualu “nudi bamanye dinanga divua Yezu Kristu mutuleje: uvua ne biuma, kadi mmudienze mupele bualu buenu, bua kununemesha ku bupele buende” (8.9).Pashishe (bit. 10-13) Polu udi wangata diyi dikuabu, utandisha bikole bayua bamba ne: kena mupostolu mulelela. Udi ujikija mukanda wende ne miaku mimpe ya buena muntu, kadi udi ufunda amu mikese (13.11-13).Numanye ne: Polu kena ufunda miaku mikole ayi bua kudibingisha, nansha bua kulongesha bantu malu adi amulengelela. Padiye uluangana bikole bua bantu bitabe muanzu wende wa mupostolu, bidi amu bua bamone mua kuitaba muabu muonsu Lumu lua Disanka, bitabe kabidi ne: Kristu ke Mfumu wetu bulelela.