Misambu 87 - MUKANDA WA MYIDI MUKULU（TSH96）

Siyone nditunga dia bantu bonsu

1Musambu wa mu mukanda wa misambu wa bena Kora.

Maweja-Nangila udi muibake Yerushalayime,

pa mikuna ya tshijila.

2Udi munange tshimenga tshia Siyone,

bipite dinanga dia minga miaba

ya mu ditunga dia Yakobe.

3Wewe tshimenga tshia Mvidi Mukulu,

Mvidi Mukulu udi ukutumbisha wamba ne:

4“Ku bonsu badi bammanye:

ndi ntela bena Ejipitu, bena Babilone,

bena Peleshete, bena Tire ne bena Kushe,

badi babalelele mu matunga aa.

5Kadi Siyone, badi bamuamba ne:

ke tshimenga tshilelela tshia bantu bonsu.

Mvidi Mukulu Muena kulu ke udi mutshiase.”

6Maweja-Nangila udi mufunde mena a bantu mu mukanda wa mena,

udi mumanyishe muntu yonsu wa kudibu ne:

“Siyone ke tshimenga tshiende tshilelela.”

7Wewe Tshimenga tshia Mvidi Mukulu,

bimbi ba misambu ne baji ba maja bonsu tshiapamue,

batumbishe lumu luebe.