Matayi 8 - MUKANDA WA MYIDI MUKULU（TSH96）

Yezu udi ujikija disama dia muena nsudi(Mar 1.40-45; Luk 5.12-16)

1Yezu upueka ku mukuna, bantu musumba munene kumulonda.

2Muena nsudi kusemena kudiye, kutua binu kumpala kuende, wamba ne:

— Mfumu, bu wewe musue, udi mua kujikija disama dianyi.

3Yezu kuolola tshianza, kumulenga, wamba ne:

— Ndi musue, disama diebe dijike! Diakamue disama diende dia nsudi kujikadi.

4Pashishe Yezu kumuambila ne:

— Teleja bimpe: kuambidi muntu bualu ebu to. Kadi uye kudileja kudi mutuangaji bua ajadike muukadi. Pashishe ulambule mulambu uvua Moshe muambe, bua bantu bonsu bajadike ne: disama diebe ndijike.Yezu udi ujikija disama dia muena mudimu wa mulombodi wa bena myita ba bena Rome(Luk 7.1-10)

5Pavua Yezu ubuela mu Kefamawume, mulombodi wa bena myita ba bena Rome, kusemena kudiye, umulomba diambuluisha,

6wamba ne:

— Mfumu, muena mudimu wanyi mmulale mu nzubu ne disama dia tuneke, ukenga bikole.

7Yezu kumuambila ne:

— Nenye kujikija disama diende.

8Mulombodi kuamba ne:

— Mfumu, tshiena mukumbane bua wewe kubuela mu nzubu muanyi to. Kadi tuma amu diyi, disama dia muena mudimu wanyi nedijike.

9Meme ndi ku bumfumu bua bantu bakuabu, kabidi ndi ne bena myita bandi ntumina diyi. Ndi ngamba ewu ne: “Yaku!” udi uya; ndi ngambila mukuabu ne: “Lua kuneku!” udi ulua. Pandi ngambila muena mudimu wanyi ne: “Enza mudimu ewu!” udi wenza.

10Yezu umvua miaku ayi, kukemaye. Kuambilaye bantu bavua bamulonda ne:

— Ndi nnuambila bulelela ne: tshiena muanji kumona muntu ne ditaba dia mushindu ewu munkatshi mua bena Izrayele.

11Ndi nnujadikila ne: bantu bavule nebafume luseke ludi diba dipatukila, ne ludidi dibuelela, basombe ne Abrahame, Izake, ne Yakobe mu Bukalenga bua mu diulu.

12Kadi bantu bavua mua kuikala mu Bukalenga, nebabimanshe pambelu mu midima, muaba udibu badila, basumakaja menu.

13Pashishe Yezu kuambila mulombodi wa bena myita ne: — Pingana kuebe, nebikuenzekele bu mudi ditaba diebe.

Disama dia muena mudimu wa mulombodi kujika amu diba mene adi.

Yezu udi ujikija masama a bantu(Mar 1.29-34; Luk 4.38-41)

14Yezu kuya ku nzubu kua Petro. Kusanganaye mamuenende wa Petro mu bulalu, usama mubidi luya.

15Yezu kumulenga tshianza, mubidi luya kumushila muaba. Nanku kujukaye, kutuadija kubakuatshila mudimu.

16Dilolu kutuadilabu Yezu bantu bavule bavuabu batatshisha kudi mikishi mibi. Yezu kuipata mikishi mibi ayi ku bukole bua diyi diende, kujikija kabidi masama a bonsu bavua kabayi bumvua bimpe.

17Uvua wenza bionsu ebi bua kukumbaja bivua muambi Yeshaya muambe ne: “Kudiambuilaye butekete buetu; kutumushilaye masama etu.”

Badi basue kulonda Yezu(Luk 9.57-62)

18Yezu umona bantu ba bungi bamuela munkatshi, kuambilaye balongi bende ne: tusabukayi dishiya dia dijiba.

19Ke mulongeshi wa mikenji kusemena kudiye, umuambila ne:

— Mulongeshi, nenkulonde kuonsu kuwaya.

20Yezu kumuandamuna ne:

— Nyama ya mibuabua idi ne miaba ya kulala, nyunyi ya kulu ne masua ayi, kadi Muana wa muntu kena ne muaba udiye mua kuikisha, kulala.

21Mulongi wende mukuabu kumuambila ne:

— Mfumu, ndi nkulomba bua nganji kuya kujika tatu.

22Yezu kumuandamuna ne:

— Katuye, lekela bafue bajike bafue babu.

Yezu udi ubatamija tshipepele pa mayi(Mar 4.35-41; Luk 8.22-25)

23Yezu kubuela mu buatu, balongi bende kuya nende.

24Diakamue tshipepele tshikole kujuka mu dijiba, mavuala kubuikila buatu, kuwulabu mayi tente. Kadi Yezu uvua amu mulale.

25Balongi bende kumubisha, bamuambila ne:

— Mfumu, utusungile, tudi mua kufua!

26Yezu kubakonka ne:

— Tshinudi nutshina ntshinyi? Ditaba dienu ndikese ditambe! Ke Yezu kujuka, kukanyina tshipepele, ne mayi a dijiba. Kubatamabi bataa.

27Kukemabu bonsu, bebejangana ne:

— Ewu mmuntu kaayi udibu bitaba ne kudi tshipepele, ne kudi mayi a dijiba?Bantu babidi badi mikishi mibi itatshisha(Mar 5.1-20; Luk 8.26-39)

28Yezu ufika dishiya dia dijiba, mu buloba bua bena Ngadara, kusambakenaye ne bantu babidi bavua bapatuka mu nkita. Bantu aba bavua babatatshisha kudi mikishi mibi. Bavua ne lonji lukole, muntu kayi mua kupita mu njila awu to.

29Ke bobu kuela mbila ne:

— Muana wa Mvidi Mukulu, butudi nebe mbunganyi? Udi mufike bua kutunyoka, diba kadiyi dianji kukumbana, bua tshinyi?

30Pabuipi ne muaba awu pavua tshisumbu tshinene tshia ngulube, ikeba biakudia.

31Mikishi mibi kulomba Yezu ne:

— Paudi utuipata, ututume mu tshisumbu tshia ngulube etshi.

32Yezu kuitaba ne:

— Ndayi.

Mikishi ivua bantu babidi aba nayi kupatuka, kubuela mu ngulube. Diakamue tshisumbu tshia ngulube kupulumuka pa tshibungubungu, kudiela mu dijiba, kufila mu mayi.

33Bantu bavua balama ngulube kunyema, kuya mu tshimenga, kulonda malu onsu, ne bualu mene buvua buenzekela bantu babidi bavua ne mikishi mibi.

34Ke bena mu tshimenga bonsu kuya kusambakena ne Yezu. Bamumona, kumusengelelabu bua kumukaye mu buloba buabu.