Dibadika Diumvuija - MUKANDA WA MYIDI MUKULU（TSH96）

Diumvuija— Mukanda ewu mmupete dina diawu edi, bualu badi batumanyisha misangu ne misangu mu mukanda ewu mudibu babadika bena Izrayele bua kumanya bungi buabu. Kadi bualu bunene budi mukanda ewu utulongesha, ki mbualu bua dibadika adi to.Bena Izrayele bamane kupeta mikenji yonsu ivua Mvidi Mukulu mupeshe Moshe ku mukuna wa Sinayi, badi badilongolola bua kutuadija luendu, batangila ku buloba bulaya (1.1—10.10). Mu luendu luabu badi banji kufika ku mikalu ya buloba bulaya, mu musoku wa Kadeshe-Barneya. Bu mudibu ne buowa, badi batshina mua kubuela mu buloba bulaya. Ke mudibu bapeta dinyoka: badi ne bua kuendakana mu tshipela bidimu makumi anayi. Badi bapingana luseke lua kuinshi kua ditunga, luseke ludi Ejipitu. Nebendakane, bapitshile miaba mivule too ne ku diba didibu bafika mu ditunga dia bena Mowabe, didi ku luseke ludi diba dipatukila lua Mayi Manene a luepu (10.11—21.35). Mu bitupa bia ndekelu bia mukanda ewu, badi batulondela malu avua enzeka mu ditunga dia bena Mowabe. Ke kuvua bena Izrayele bumukila bua kuvua kubuela mu ditunga dia bena Kenaane (22.1—36.13).Mukanda ewu ke udi ulonda mukanda wa Tshimuangi ne wa Mikenji ya bena Levi. Udi utuleja mudi tshisamba tshia bantu ba Mvidi Mukulu tshikale amu tshisamba tshia bantu, bena makudimuku bu a lungonyonyi, lelu batekemena kudi Mvidi Mukulu, maloba bamubenga; dinda baleja bukitu, dilolu bukata; eku bamueneka bantu ba nsongu, eku bashala bafuba. Kadi mukanda ewu udi utuleja kabidi ne: nansha bantu bende bikale nanku, Mvidi Mukulu udi amu ubananga. Kadi udi anu musue bua badilengeje, benze malu makane.Mukanda ewu udi utuleja kabidi mudimu mukole udi Moshe nawu pankatshi pa Mvidi Mukulu ne bantu. Moshe, mulunda wa Mvidi Mukulu, udi ne bua kumanyisha bantu malu mimpe adi Mvidi Mukulu musue bua bantu bakumbaje. Kadi udi wakuila kabidi bantu, bena tshishiku, kayi upungila, kudi Mvidi Mukulu.