Yobe Diumvuija - MUKANDA WA MYIDI MUKULU（TSH96）
Diumvuija— Mukanda wa Yobe, mu ntuadijilu (bit. 1 ne 2) udi utulondela malu: Yobe udi muntu wa nsongu, muikale kabidi ne bubanji. Kadi udi witaba Mvidi Mukulu amu bualu bua bintu bivule bidiye upeta anyi? Ke mudibu bamunyenga bionsu, bintu biende, bana bende, ne bukole mene bua mubidi. Mu makenga ende, neitabe amu kuitaba Mvidi Mukulu anyi?Kadi Mvidi Mukulu mene nnganyi? Pikalaye wenza amu bimpe, mudiye ukengesha Yobe mmunyi? Bantu basatu badi bakeba kujadikila Yobe mulunda wabu ne: udi mu dikenga bua tshilema tshiuvua muenze. Tshitupa tshinene tshia mukanda (bit. 3-31) ke mayuki a balunda basatu abu, badi bumvuija makenga amu muvua bena Izrayele ne tshibidilu tshia kualongesha, ne mandamuna a Yobe, udi ubenga bikole meji abu, udi wamba amu kuamba ne: panu, misangu mivule, bantu babi badi bapeta diakalenga, bantu ba nsongu badi amu ne diakabi! Kena wanyisha kabidi mushindu udi balunda bende bamumvuija mudi Mvidi Mukulu. Udi wamba amu kuamba ne: mbankengeshe meme tshiyi ne bualu.Pashishe muntu muinayi, Elihu (Bit. 32-37) udi ubuela mu diyuki diabu. Yeye kabidi udi ubenga bidi Yobe wamba, kadi udi umvuija mushindu mukuabu. Mvidi Mukulu udi utumina muntu makenga bua kumubela. Kadi nansha munyi ne mmunyi, muntu kena mua kubikila Mvidi Mukulu ku kabadi, kumulumbuluisha, nansha kumukonka ne: muudi wenzela muntu webe nanku mbishi?Ke Mvidi Mukulu kushisha kuakula (bit. 38.1—42.6). Kadi pa mutu pa kuandamuna ku lukonku luvuabu bamuela, Mvidi Mukulu mene udi wela Yobe nkonku. Diba adi, Yobe udi ujingulula tshilema tshivuaye muenze. Uvua wakula bua Mvidi Mukulu kayi nansha mumanye ne: Mvidi Mukulu nnganyi? Ku ndekelu kua mukanda (42.7-17), badi batulondela mudi Mvidi Mukulu ujadika ne: Yobe nkayende mmuakule bimpe bualu buanyi. Ke Mvidi Mukulu kumupingajila kabidi bitentame misangu ibidi bionsu bivuaye mujimije.Mvidi Mukulu nnganyi mene? Ke lukonku lunene ludi lusokomene mu mukanda ewu mujima. Ke lukonku ludi bena lelu bavule kabidi bela. Bualu tuetu kabidi tudi tubenga malu avua bantu ne tshibidilu tshia kulongeshangana. Bushuwa mukanda wa Yobe udi utunwuija nangananga mudi kamuyi Mvidi Mukulu. Kadi udi mua kutuambuluisha bua tutonkole mpingu (bimfuanyi bia dishima) ya Mvidi Mukulu utudi amu tudifudila. Mukanda ewu udi utulomba ne: kanubuejakaji Mvidi Mukulu ne meji anudi nawu bualu buende. Padi mukanda ewu utulomba bua tuandamune meji atuvua badianjile nawu, udi utuambuluisha bua tumone mua kuakidila ne manza abidi bualu bupiabupia bua dikema budi Lumu lua Disanka lututuadila matuku onsu.
