Yudite 10 - MUKANDA WA MYIDI MUKULU（TSH96）

Yudite udi uya mu mitanda ya baluishi

1Pashishe Yudite mumane kujikija ditendelela dia Mvidi Mukulu wa bena Izrayele, divua dinenga mutantshi mule,

2kujukaye panshi. Kubikilaye mukaji muena mudimu wende. Kupuekaye mu nzubu utuye usombasomba mu matuku ende a Dikisha ne a bibilu.

3Kuvulaye tshilamba tshia madilu tshivuaye muvuale, kabidi kumushaye bilamba bia bukamba. Kuowaye mayi mu mutu ne ku makasa, kudibombekaye mafuta a mushinga mukole.

Kusamunaye nsuki yende, kuyisuika mukaba. Kuvualaye bilamba bi-vuaye uvuala patshivua bayende Menashe ne muoyi.

4Kuelaye bisabata ku makasa. Kuelaye mabue mu nshingu, kusuika bikupa ku maboku, kuvuala tukanu ku minu, tukanu ku matshi ne bilengejilu bionsu bidi mua kumuvuija mulenga, bua mulume yonsu udi mua kumumona amusamine muoyi.

5Kupaye mukaji muena mudimu wende nzaba wa maluvu a nwinyo ne kabungu ka mafuta, kuwujaye tshibombi ne bukula bua oije, mukata wa bimuma biume, mampa ne mabela makuatakane. Kusuikaye bintu ebi bionsu bimpe, kubipa mukaji muena mudimu bua kuambulaye.

6Kupatukabu batangila ku tshipatukilu tshia tshimenga tshia Betuliye, kusanganabu Oziyase ne bakulu ba tshimenga aba, Kabrise ne Karmi, bimana muaba wabu wa mudimu.

7Padi bantu abu bamona muvua mpala wende ne muvua bilamba biende bishintuluke, kukemabu bikole bua bulenga buende, ke kumuambabu ne:

8— Mvidi Mukulu wa bankambua betu akuendeshe diakalenga, anyishe bua ukumbaje bualu buudi mubanga, bua bena Izrayele bapete lumu, bantu batumbishe Yerushalayime.

9Yudite kutuaye binu panshi bua kutendelela Mvidi Mukulu. Pashishe kuambilaye bantu basatu abu ne:

— Ngunzuluilayi tshiibi, mpatuka bua kukumbaja bituvua bamba nenu.

Bobu kutumina balami ba tshiibi diyi bua bamunzuluile tshiibi.

10Kuenzabu nanku, Yudite ne mukaji muena mudimu wende kupatuka. Bantu bavua mu tshimenga kumujoja ne mudiye upueka pa mukuna, upitshila mu tshibandabanda too ne mudiye ubajimina ku mesu.

11Bakaji babidi abu bavua batungunuka amu buludiludi ne tshibandabanda. Bena myita ba bena Ashure kusangila nabu.

12Kuimanyikabu Yudite bamuebeja ne:

— Udi wa mu tshisamba kaayi? Udi ufuma penyi? Uyaya penyi? Yudite kuandamuna ne:

— Ndi nsongakaji wa bena Ebrewu. Ndi mbanyema, bualu Mvidi Mukulu udi pabuipi ne kubafila mu bianza bienu.

13Kadi meme ndi musue kumonangana ne Oloferne, mfumu mulombodi wenu wa bena myita udi ku mutu kua bakuabu, bua kumuambila tshidiye ne bua kumanya. Kabidi nemmuleje njila udiye ne bua kulonda bua akuate matunga onsu adi ku mikuna, muntu nansha umue kayi mua kupanduka.

14Bena myita ba Oloferne bavua bamuteleja kabidi bajoja mpala wende, kumonabu ubalengelela bikole. Bena myita kumuandamuna ne:

15— Udi mumane kupanda paudi muambuluje lukasa bua kulua kumonangana ne mfumuetu. Kadi mpindiewu udi uya ku ntenta wende. Bamue ba kutudi nebaye kukufila kudiye.

16Pawikala kumpala kuende, kuzakadi to. Wambulula miaku yebe iuvua mutuambile yonsu, yeye neakuenzele bimpe.

17Kusungulabu bena myita lukama munkatshi muabu, bua kuya kufila Yudite ne mukaji muena mudimu wende. Kubalombolabu ku ntenta wa Oloferne.

18Bantu ba nseke yonsu bavua mu mitanda bavua banyemakana. Bualu bakavua bamana kumanyishangana bua difika diende. Bantu bavua bamuele mu tshitangu. Patshivuaye pambelu pa ntenta wa Oloferne muindile bua bantu baye kumumanyisha.

19Bavua bakema muvuaye muimpe, kabidi bakatshila muvuaye wa mu tshisamba tshia bena Izrayele. Bantu bavua bambilangana ne:

— Mudibu mua kudiombola bantu badi ne bakaji bulenga nenku mbishi? Nenku bidi mua kuikala njiwu bua kushiya muena Izrayele nansha umue ne muoyi. Bantu bikala bashala ne muoyi badi mua kulenduisha bantu buloba bujima.

20Balami ba Oloferne ne balombodi bende ba bena nwita, kupatukabu, kubuejabu Yudite mu ntenta wa Oloferne.

21Yeye pende uvua muikiishila pa bulalu buende mu tshilamba tshia kujika natshi tumue, tshivua tshienza ne manda makunze a mushinga mukole, tshivua tshilengeja ne buanda bua mpawungi ne mabue a mushinga mukole.

22Bobu bamane kumanyisha Oloferne ne: Yudite mmufike, yeye kuyaye ku mushiku wa ntenta. Bena mudimu bavua bangata bimunyi bia kapia bia tshiamu tshitoke tshia mushinga mukole, benda kumpala kuende benda bamunyika.

23Diakamue Oloferne ne balombodi bende ba myita bamona amu Yudite, bonsu kukatshila bua bulenga bua mpala wende. Yudite kupona kumpala kuende mutue mpala panshi, umukukuila. Bena mudimu ba Oloferne kumujula.