Meji 16 - MUKANDA WA MYIDI MUKULU（TSH96）

Bena Izrayele badi badia, baluishi babu balala ne nzala

1Bantu bavua bakukuila nyama, bayua babakengesha kudi nyama mikuabu, ke muvuabu bajinga. Bavua babakengesha kudi misumba ya nyama.

2Kadi wewe Maweja-Nangila, kuena munyoke tshisamba tshiebe nenku to, bualu tshidi amu tshikutokela ku muoyi. Pasuabu ne nzala uvua mubape nyunyi ya tulumbu.

3Pamuena baluishi bebe nyama ikuatshisha muenga, iuvua mubatumine, bakapanga kumona nzala, kabayi nansha mua kulenga biakudia. Kadi tshisamba tshiebe kufua nzala amu matuku makese, ke kupetatshi tshiakudia tshia pa buatshi, kabidi tshimpe tshitambe.

4Nzala kukengesha baluishi bebe bikole bipite. Bionsu ebi mbua kuleja bena diebe, bua bumvue numvua mukengeshe baluishi babu bikole bitambe ne nzala.

Nyama idi ishipa, Mvidi Mukulu udi upandisha

5Bushuwa, bantu bebe bavua bakengesha kabidi kudi nyama ya lonji, ba bungi kufua ku lulengu lua nyoka. Kadi tshiji tshiebe katshiena tshilunguluke bua kubutula bantu bebe bonsu.

6Kadi uvua ubakuatshisha bowa katupa kipi, amu bua kubabela ne kubavuluija meyi ebe. Pashishe wewe kubapa tshimanyinu tshia lupandu, bua bavuluke meyi ne mikandu biebe.

7Muntu yonsu uvua witaba meyi aa uvua upanda. Ki mmupanda ne bualu uvua utangila nyoka nansha. Kadi wewe ke uvua umupandisha.

8Nenku uvua muleje baluishi betu muudi wewe nkayebe upandisha bantu ku njiwu yonsu.

9Baluishi bavua bafue basuma kudi mpasu ne njiji, kakuyi mushindu wa kubapandisha. Bushuwa, dinyoka edi divua, dibakumbanyine bua nyama ibakengeshe.

10Nyoka ya lulengu mine kayivua mienzele bantu bebe bibi, bualu wewe uvua ubambuluisha ne muoyi wa luse, ubapandisha.

11Nyoka ivua ibasuma bua bamone mua kuvuluka meyi ebe. Kadi kupandabu lukasa bua bamone mua kukuvuluka kashidi, bashala kuelangana meji ku bilenga biudi mubenzele.

12Ki mmitshi nansha mafuta bivua bibapandisha to. Kadi Muaku webe, Maweja-Nangila ke uvua ubapandisha, bu mudiwu mua kupandisha bionsu.

13Wewe ke mfumu wa muoyi ne lufu. Udi wela muntu mu kandondu ka bafue nansha umupatulamu.

14Muntu bua lukinu luende udi mua kushipa muinende, kadi kena mua kumupingaja ku ba muoyi. Muntu mumane kuya mu kandondu, muntu nende kena mua kumupatulamu nansha.

Mvula wa mabue ne Mane

15Muntu nansha umue kena mua kukunyema.

16Uvua munyoke bikole bantu ba bisamba bikuabu bavua kabayi basue kukumanya. Mvula wa tshipupu ne mabue kubatuuta, mabue a mvula, tshipepela tshikole ne kapia kubashidisha.

17Bualu bua dikema mbuebu: munkatshi mua mayi a mvula atu ajima bionsu, kapia kavua amu kalakuka. Bintu bionsu bia panu bivua biluila amu bakane.

18Ndimi ya kapia kuanji kutuya tshitupa, bua kayoshedimu nyama ivua mitumina baluishi. Ke numvua uleja baluishi bebe ne kuena ubalekela, udi amu ubalondakaja.

19Mu tshikondu tshikuabu, ndimi ya kapia ivua ilunduka munda mua mayi bikole bipite bua kubutula bikunyibua bivua pa madimi a bantu babi.

20Kadi bantu bebe uvua mubape tshiakudia tshia batumibue bua kabapungidi. Wewe kubatumina diampa difumina mu diulu, dimane kulongolola, dia mupuya ne muenyi muimpe, divua dilengelela muntu yonsu. Nansha bantu bajinga mampa a mishindu mishilangane, kadi mane avua asankisha bantu bonsu.

21Tshidibua etshi tshivua tshileja bulenga buebe munkatshi mua bana bebe. Tshivua tshisankisha muntu yonsu, kabidi tshivua pa ndiilu wa muntu yonsu.

22Tshidibua etshi tshivua tshifuanangana ne neje, nansha bu mabue a mayi, kadi kapia kakavua katshiosha, kabidi katshivua tshienguluka to. Ke muvua bantu bebe mua kumanya mudi kapia kabutula bidibua bia baluishi pavua mvula wa tshipupu ne mabue bituuta bantu.

23Kapia aka kakavua ne bukole buaku, bua bantu bebe bakane bamone mua kupeta tshiakudia tshiabu.

24Bintu bionsu bidi ku bumfumu buebe, wewe Mufuki. Makole abi mbua kunyoka bantu babi. Kadi bidi bileja buimpe buabi ne luse kudi bantu badi batekemena kuudi.

25Bifukibua biebe bivua biambuluisha bana bebe mishindu ne mishindu mu makenga abu onsu. Nenku bivua bikuenzela mudimu bua umone mua kusankisha bana bebe.

26Maweja-Nangila, bana bebe baudi munange bamanye ne: Bidi bibadisha ki mbidibu banowa pa madimi. Bidi bibadisha ke Muaku webe udi ulama ne muoyi bonsu badi batekemena kuudi.

27Tshidibua tshivua kapia kakayi kuosha, tshivua tshienguluka ku nkenke ya diba mikese.

28Ke numvua mutuleja mutudi mua kudianza kujuuka bua kukuela tuasakidila, kabidi kuntendelela diba kadiyi dianji kupatuka.

29Kadi tshidi muena kadiwu utekemena, netshienguluke bu mudi mabue a mvula. Netshipueke bu mayi adi kaayi ne mudimu.