Tobite 9 - MUKANDA WA MYIDI MUKULU（TSH96）

Rafayele udi ufika mu Raguyese

1Pashishe Tobiyase kubikila Rafayele, umuambila ne:

2— Azarya musuibue, angata bena mudimu banayi ne tumelu tubidi. Uye kua Ngabayele mu musoku wa Raguyese. Umupe mukanda utuvua batua tshiala, bua akupe lupetu. Nuvue nende njila umue tuvua kuenza tshibilu tshia dibaka.

3-4Udi mumanye ne tatu udi ubala amu kubala matuku adi apita aa. Pandi mpitshisha dituku amu dimue, ndi mumupampakaje bikole. Kabidi uvua mumone muvua Raguwele uditshipa bua katulayanganyi nende. Meme tshiena mua kuenza bidiye kayi musue nansha.

5Rafayele kuya ku Raguyese mu Madayi ne bena mudimu banayi ne tumelu tubidi. Kulalabu kua Ngabayele. Rafayele kumupesha mukanda. Kumulondelaye umvua Tobiyase muana wa Tobite musela mukaji. Kabidi ne mudiye umubikila mu tshibilu tshia dibaka. Diakamue Ngabayele kumubadikila bibuta bivua ne nkanu ya tshiamu tshitoke tshia mushinga mukole bimana kutua tshitampi, kubitekabu panyima pa tumelu.

6Butshia, dinda dionsu menemene, kuyabu pamue ku tshibilu tshia dibaka. Padibu bafika ku Raguwele, kusanganabu Tobiyase ku mesa. Tobiyase kujuka lukasa luonsu, bua kuela Ngabayele muoyi, Ngabayele kudila muadi, umuela lupemba wamba ne:

— Udi muana muimpe, udi mufuana tatuebe ku buimpe! Udi muana wa muntu muakane ne wa kalolu! Maweja-Nangila muena kulu akuele lupemba. Ndi ngela Mvidi Mukulu tuasakidila bualu mmuanyishe bua meme kumonangana ne Tobiyase muana wa muanetu! Ndi mmona Tobite wetu menemene!