Meji Diumvuija - MUKANDA WA MYIDI MUKULU（TSH96）

Diumvuija— Bumue bavua bafunde mukanda wa Meji bidimu bu makumi asatu bgbg ne Y.K., mu tshisumbu tshia bena Yuda, bena ditaba bavua basombe mu tshimenga tshia Aleksandriya mu Ejipitu. Mufundi udi mumanye bimpe muakulu wa Ngreke, kadi mukanda wende udi mufuanangane ne “mikanda ya Meji” ivuabu bafunde kale mu buena ebrewu, bu mukanda wa Nsumuinu, wa Yobe, wa Muambi, nansha imue misambu. Mufundi mmumanye bimpe mukanda wa Tshibangidilu, wa Tshimuangi, wa Yeshaya, wa Nsumuinu, kadi mmumanye kabidi bimpe bitambe bafundi ba tshitembu ba kale ba bena Ngreke, bu Omere nansha Plato. Udi musue kuleja ditaba diende dia bena Yuda patooke mu mfundilu ne mu ngelelu wa meji wa bena Ngreke. Nanku udi ufundila bisumbu bibidi bishilangane mukanda wende: tshisumbu tshia bena ditaba nende, badi kabayi bamanye kabidi muakulu wa ebrewu, ne tshisumbu tshia babadi ba bena Ngreke, badiye musue kumanyisha meji mimpe avua bena Izrayele bapete kudi Mvidi Mukulu.Mu tshitupa tshia kumpala (bit. 1-5) badi batumvuija, bafuanyikija tshidi bantu ba Mvidi Mukulu mua kupeta kumpala kutudi tuya, ne tshidi bantu babi ne bua kupeta. Mu 2.10-20 badi batuleja mudibu mua kukengesha muntu udi wenza tshidi Mvidi Mukulu musue.Mu tshitupa tshibidi (bit. 6.1—9.12) badi batua meji makumbu. Bantu bonsu badi bakengela meji, badi nangananga balombodi ba matunga. Ke mudi mufundi udileja bu mukalenga Shelomu, uvua bena Yuda batangile bu Muena meji wa kalandamusenga (fuanyikija ne 1 Bak 4.4-15; 5.9-14).Tshitupa tshisatu (bit. 9.13—19.22) badi batumvuija mudimu wa meji mu mianda ya kale ya bena Yuda. Badi batuleja Shelomu udi utendelela, ulonda malu a mu mukanda wa Tshibangidilu ne wa Tshimuangi, umvuija kabidi tshilumbu tshia nwidie ivuabu batendelela, uyuluija miaku ya mu Yesh 44; Mis 115; 135.Nanku mufundi udi ukeba mua kumvuija miaku ya mu mikanda ya tshijila ne meji avua bena Ngreke nawu. Ke mutudi mua kusangana munemu meji makuabu adi kaayi mu mikanda mikuabu ya mu tshiovu tshia kale ya mu buena ebrewu, bu ditapulukangana dia muntu mu bitupa bibidi: muoyi ne mubidi (9.15), nansha muoyi udi ushala kashidi (3.14; 8.17; 15.3; a.n.).