Estere ngreke 6 - MUKANDA WA MYIDI MUKULU（TSH96）

Amane udi ne bua kunemeka Mordekayi

1Butuku abu, Maweja-Nangila kupumbisha mukalenga Artashasta mua kulala tulu. Ke kuambilaye mufundi wa mu bukalenga buende, bua atangile mukanda udi mufunda mianda ivua mienzeka mu bukalenga, amubadilewu.

2Mufundi kubala nangananga muaba uvua utela muvua Mordekayi mutandule bena mudimu babidi ba mu bukalenga, bavua balami ba nzubu, belela mukalenga wabu tshitungu tshibi bua kumushipa.

3Mukalenga kuamba ne:

— Tuvua bafute Mordekayi nansha bamusankishe bishi bua bionsu bivua bienzeka abi?

Bena mudimu bende kuandamuna ne:

— Kuena mumufute nansha tshintu tshimue.

4Patshivua mukalenga ukonka bua kumanya midimu ivua Mordekayi mumane kukuata, ke Amane kubuela mu lubanza lua nzubu wa bukalenga. Mukalenga kuebeja ne:

— Udi mu lupangu nnganyi?

Amane uvua muvue kulomba mukalenga bua bowele Mordekayi pa tshiowelu tshikavua tshimana kumulongoluela.

5Bena mudimu kuandamuna ne:

— Amane ke udi mu lubanza emu.

Mukalenga kuamba ne:

— Mubikilayi abuele munu.

6Pashishe mukalenga kukonka Amane ne:

— Tshindi mua kuenzela menemene muntu undi musue bua kumunemeka ntshinyi?

Amane kuela meji, ne: “Kadi udi mukalenga musue bua kumunemeka nnganyi? Udi mua kuikala amu meme!”

7Amane kuandamuna ne:

— Mukalenga, paudi ujinga ne banemeke muntu,

8ambila amu bena mudimu bebe batuale tshimue tshia ku bilamba biebe bia buanda bua mitshi, ne nyama webe wa kabalu.

9Nebabipe umue wa ku balunda bebe, udi ne muanzu mupite bunene. Yeye awu neajadike muntu uudi musue bua bamunemeke, bilamba bia bukalenga, neamubandishe pa nyama webe wa kabalu, neendakane nende mu masangu a njila ya mu tshimenga wenda wela mbila kumpala kuende ne: “Ke mushindu udi mukalenga mua kuenzela muntu udiye musue bua bamunemeke nanku!

10Mukalenga kuambila Amane ne:

— Udi muandamune amu bimpe, ukumbajile Mordekayi, muena Yuda udi ukuatshila mudimu mu lubanza lua nzubu wa bukalenga, muudi muambe amu. Kulenguludi bualu nansha bumue to.

11Amane kuya kuangata tshilamba, ku-tshivuadika Mordekayi, kumubandisha pa nyama wa kabalu. Pashishe kumuendesha mu masangu a njila ya mu tshimenga, wenda wela diyi ne: “Monayi mudi mukalenga musue bua banemeke muntu udiye musue.”

12Pashishe Mordekayi kupingana mu lupangu lua bukalenga. Amane kupingana pende musokoka mpala bua kabamumonyi mudiye ne bundu.

13Amane kulondela balunda bende ne mukajende Zosara bualu abu. Balunda bende ne mukajende Zosara kumuambila ne:

— Pikala Mordekayi uudi utuadija kumvuila bundu muena Yuda, nanku newikale amu kuinshi kua makasa ende. Kuena mua kumuipita kabidi mu muaba webe to, bualu Mvidi Mukulu wa muoyi udi mumulame.

14Batshi vua amu bakula, bantu bavua mukalenga mutume ne mukenji kufikabu, diakamue bobu kuya ne Amane mu didia dinene divua Estere mulongolole.