Sira (36) - MUKANDA WA MYIDI MUKULU（TSH96）

1Muntu udi utshina Maweja-Nangila kena upeta dikenga.

Maweja-Nangila neamusungidile mu dikenga.

2Muntu udi ubenga mikenji ya Maweja-Nangila kena ne meji.

Kadi muntu udi ulonda mikenji ya Maweja-Nangila tshilondalonda,

udi bu buatu budibu batshikakaja kudi lupepela.

3Muntu wa lungenyi udi utekemena kudi Maweja-Nangila,

buende yeye, mikenji ya kudi Mvidi Mukulu idi bu malu mamba kudi mutuangaji.

Muntu mupote ne muena tuseku

4Paudi musue bua bateleje tshiudi musue kuamba,

udilongolole bimpe ku diyuki diebe,

uvuluke bionsu biudi mumanye,

pashishe wandamuna ku nkonku idibu bakuela.

5Majinga a muntu mupote adi anyunguluka bu nkata wa ditempu.

Meji adiye wela adi bu mulonda wa nkata wa ditempu, udi unyunguluka.

6Mulunda udi useka bantu bonsu udi bu nyama wa kabalu,

udi ukekemena padi muntu yonsu umubanda.

Dishilangana dia bintu bidi Maweja-Nangila mufuke

7Mu tshidimu tshijima, diba ke didi ditokesha.

Kadi mudi dituku kampanda dipite dikuabu mbishi?

8Bualu mu meji ende, Maweja-Nangila mmuafuke mashilangane,

muasunguluje mivu ne bibilu bishilangane.

9Wakutumbisha amue matuku, kuajidilaye,

kushiya makuabu kaayi majidile.

10Bantu bonsu kabidi mbafuke ne lupuishi,

Mvidi Mukulu mmufuke Adame ne buloba.

11Kadi mu meji ende Maweja-Nangila udi mubafuke bashilangane,

udi mubateke mu milongu mishilangane.

12Uvua muele bamue lupemba, mubape mamfumu,

uvua mujidile bamue bua bikale pamue nende.

Kutshipaye bakuabu, kubapuekesha,

kubatonkolaye pa nkuasa ivuabu basombe.

13Mudi mufumbi wa ngesu wenza ne diima mudiye musue,

ufumba tshintu tshidiye musue,

ke mudi bantu mu bianza bia Mubafuki,

udi wenza nabu mudiye musue.

14Muaba udi bubi, buakane budipu,

muaba udi lufu, muoyi udipu,

muaba udi muntu muakane, muenji wa bibi udipu kabidi.

15Jooja midimu idi Muena Kulu muenze,

idi yenda pamue ibidi ibidi,

idi ipangakana ewu ne wawa.

Mufundi wa mukanda ewu udi ukatshila mudimu wende

16Meme, ke wa ndekelu udi mufike bua kukuata mudimu

bu mudi muntu udi wangulula tumuma tua nwinyo,

tuvuabu bamane kunowa kudi banowi.

17Kadi amu Maweja-Nangila kungela kabidi lupemba,

meme kufika ku diuwuja tshikaminu tshianyi,

bu bapumbuludi bakuabu.

18Tshiena ntata amu bualu buanyi nkayanyi to,

kadi mbua bonsu badi bakeba mibelu, bayijinga.

Mushindu utudi mua kudisombela

19Nuenu balombodi ba matunga ntelejayi,

nuenu baludiki ba bantu teyayi matshi enu numvue.

20Pautshidi ne muoyi, kuanyishi bua muanebe wa balume,

mukajebe, muanenu nansha mulunda webe ikale ku mutu kuebe.

Kuena mua kupa munga bintu biebe,

bualu wewe mupete kanyinganyinga udi mua kubilomba tshiakabidi.

21Muntu mukuabu kakutuminyi diyi, pautshidi ne muoyi apa to.

22Mbilenga bana bebe bakulombe wewe bintu,

kadi wewe kuikadi ubalomba diba dionsu to.

23Ikala mfumu wa malu onsu audi wenza. Kudinyangidi lumu.

24Pafika dituku diebe dia ndekelu,

diba diebe dia lufu, wabanya bintu biebe bia bumpianyi.

Bapika

25Tudi tupa mpunde bisosa bia kudia,

tumutuuta mutshi, tumuambuisha bujitu,

kadi mupika, tudi tumupa diampa,

tumunyoka kabidi tumuenzeja mudimu.

26Enzeja mupika mudimu ne bulongame, nanku neupete dikisha.

Kadi wewe mumulekelele wenza mudiye musue, neanyeme.

27Mutshi udibu mua kuambula nawu bujitu pamue ne mionji,

badi mua kuambuisha nawu ngombe bujitu,

nenku bua kutekesha mupika badi bamutuuta mitshi.

28Utume mupika webe ku mudimu bua kasombi mu lulengu,

29bualu pashalaye mu lulengu neele meji mabi a bungi!

30Muteka ku midimu idi mimuakanyine.

Umuenzeje mudimu bualu mmupika.

Kadi pikalaye kayi nkutumikila, umuele ku tshikunyi.

Kadi wamanya kupitshishi,

kuenji malu adi abengangana ne meyi a Mvidi Mukulu.

31Paudi ne mupika anu umue,

umuangate ne mushinga wa momumue ne wewe.

Bualu udi mumupete ku mashi ebe.

Paudi ne mupika anu umue, umuenzele bimpe bu muanenu,

bualu udi umukengela amu bu muudi ukengela muoyi webe wewe mene.

32Wewe mumukengeshe, yeye neanyeme,

33neuye kumukeba muaba kaayi?