Baruke 1 - MUKANDA WA MYIDI MUKULU（TSH96）

Bena Yuda badi mu Babilone badi batumina bena Yuda badi mu Yerushalayime mukanda

1Mukanda ewu bavua baufundile mu Babilone kudi Baruke, muana wa Neriya, muikulu wa Maseya. Maseya uvua wa ku ndelanganyi ya Sedekiya, Asadiyasene Ilkiya.

2Mukanda ewu udi uleja mufikilu wa bidimu bitanu, kutuadija dituku dia muanda mutekete dia ngondu muitanu, divua bena Babilone bakuate Yerushalayime.

3Baruke uvua mubale mukanda ewu kumpala kua Yekonya, muana wa Yowakime, mukalenga wa bena Yuda. Bantu bavule bavua bafika kabidi bua kumvua bivua munda mua mukanda awu.

4Bantu bonsu bavua mu Babilone, basombele ku mielelu ya musulu wa Sude bavua bonsu muaba awu. Ke balombodi ba mu bukalenga, bana ba bakalenga, bamfumu ba meku ne bantu bashilangane.

5Bantu aba bavua badila muadi Maweja-Nangila mubatangile, bavua bajila biakudia, batendelela Maweja-Nangila.

6Pashishe bavua basangisha makuta, muntu yonsu ufila muende muvuaye namu.

7Bobu kuatumina mutuangaji Yowakime, muana wa Ilkiya, muikulu wa Shalume uvua mu Yerushalayime. Kuatuminabu kabidi batuangaji bakuabu, ne bantu bonsu pamue ne Yowakime mu Yerushalayime.

8Mu dituku dia dikumi dia ngondu wa Sivane, Baruke uvua mumane kuangata binta bia mu nzubu wa Maweja-Nangila bivuabu bumushe mu muaba wa tshijila. Uvua musue kubipingaja mu ditunga dia Yuda. Ke binta bia tshiamu tshitoke tshia mushinga mukole bivua Sedekiya, muana wa Yoshuwa, mukalenga wa bena Yuda muenzeje.

9Uvua mubienzeje pavua Nebukadnesare, mukalenga wa bena Babilone mumane kukuata Yekonya ku Yerushalayime, pamue ne balombodi ba ditunga ne bena midimu ya bianza, kabidi ne balombodi ba mu bukalenga ne bantu bakuabu ba mu ditunga, muye nabu ku Babilone.

10Nanku bantu ba mu Babilone kutuminabu bena mu Yerushalayime mukanda ne: “Tuvua banutumine makuta bua nusumbe musenga wa kamonya ne nyama ya mulambu wa kuosha, ne wa difuilangana luse. Nudi ne bua kulambula milambu eyi, pamue ne bia mu madimi amu pa tshilambuilu tshia Maweja-Nangila, Mvidi Mukulu wetu.

11Nulombe bua Nebukadnesare, mukalenga wa bena Babilone, kabidi ne bua muanende Baltazare. Nutendelele Mvidi Mukulu, bua bikale ne muoyi kashidi bu mudi diulu ne buloba bikaleku.

12Nuenze nanku bua Nebukadnesare, mukalenga wa bena Babilone pamue ne muanende Baltazare, batalame biakane. Tubakuatshile mudimu matuku mavule. Bamone mua kumfuila luse.

13Nutendelele kabidi Maweja-Nangila Mvidi Mukulu wetu, nutulombele, bualu tudi bamuenzele bibi too ne lelu. Ke padi tshiji tshiende katshiyi tshitushila muaba.

14Nubale mukanda utudi tunutumina ewu mu nzubu wa Maweja-Nangila, bantu bonsu bateleja, mu tshibilu tshia Tuzubu tua bisasa.”

BANTU BADI MU BABILONE BADI BATENDELELA MVIDI MUKULUBantu badi batondela Mvidi Mukulu mibi yabu(Dan 9.4-19; Ezr 9.6-7; Neh 9)

15Telejayi munudi mua kutendelela:

“Maweja-Nangila, kakuena bualu butudi mua kukudiwula nansha. Kadi, tuetu tudi ne bundu too ne lelu. Eyowa, mbutukuate tuetu badi basombe mu ditunga dia Yuda ne dia Yerushalayime.

16Mbukuate kabidi bakalenga betu, ne balombodi betu ba matunga ne batuangaji betu, pamue ne bambi betu pashishe ne bankambua betu.

17Tudi bakuenzele bibi Maweja-Nangila.

18Tuvua bakuele nyima, katuvua bateleje diyi diebe wewe Maweja-Nangila Mvidi Mukulu wetu. Pauvua wamba bua tuetu kulonda mikenji iuvua mumfundile.

19Katshia upatuisha bankambua betu mu Ejipitu too ne lelu, tudi amu bakuele nyima, Maweja-Nangila Mvidi Mukulu wetu, tudi amu tupetula mua kuteleja biudi utuambila.

20Ke mutudi mmona too ne lelu, makenga amu matukuata, pamue ne mitshipu ivua muntu webe Moshe mumane kutudimuja, ku dituku diuvua mupatuishe bankambua betu mu Ejipitu bua wewe kubapesha ditunga didi ne biakudia bivule.

21Wewe kututumina bambi. Kadi katuvua bateleje bivuabu bandongesha mu dina diebe.

22Kadi muntu yonsu wa kutudi uvua wenza amu malu mabi avua munda muende, uvua ukuatshila nwidie mikuabu midimu, wenza bidi kabiyi bilengelela Maweja-Nangila Mvidi Mukulu wetu.