2 Bakalenga 4 - MUKANDA WA MYIDI MUKULU（TSH96）

Elisha udi wambuluisha mukaji mukamba

1Mukaji mukuabu uvua mufuishe bayende. Bayende awu uvua wa mu tshisumbu tshia bambi. Mukaji awu kuya kudi Elisha, umusengelela bua kumuambuluisha, wamba ne:

— Elisha, udi mumanye ne: bayanyi mmumane kufua. Kadi, muntu uvua mutusombeshe makuta, mmufike bua kuangata bana banyi babidi, bua bashale bapika bende.

2Elisha kumukonka ne:

— Tshindi mua kukuenzela ntshinyi? Ungambile tshiudi natshi ku nzubu kuebe?

Mukaji kuandamuna ne:

— Tshiena ne tshintu to. Ndi mushale anu ne tufuta tukese mu kasu, tundi ndilaba pambidi.

3Elisha kumuambila kabidi ne:

— Uye kudi bena mutumba nebe, usombe biasu bikuabu bia mafuta bia munda mutupu. Kadi, usombe bia bungi.

4Pashishe, uye ku nzubu kuebe ne bana bebe. Ukange tshiibi bimpe. Wela mafuta mu biasu abi bionsu. Ubiteke ku luseke padibi biuwula.

5Nanku, mukaji kuya. Ufika ku nzubu kuende, kudinjidilaye mu nzubu ne bana bende. Bana kutuadija kumupesha biasu, yeye welamu mafuta tente.

6Biasu bimane kuwula, kulombaye muanende mukuabu ne:

— Mpeshayi tshiasu tshikuabu tshia munda mutupu. Kadi, biasu bionsu bivua bimane kuwula. Muana kumuambila ne:

— Biasu bikuabu kabienaku to.

Nanku, mafuta kukama.

7Mukaji kuya kuambila muambi Elisha bionsu abi. Muambi Elisha kumuandamuna ne:

— Uye kusumbisha mafuta awu, ufute dibanza. Kadi makuta adi ashale neakuambuluishe ne bana bebe.

Elisha udi uya mu Shuneme

8Dituku dikuabu, Elisha uvua upitshila mu musoku wa Shuneme. Mu musoku awu, muvua mukaji mubanji. Mukaji awu, kusengelela Elisha bua alue kudia biakudia kuende. Nanku, biangatshile dituku adi, pavua Elisha upitshila mu buloba abu, uvua anu uya kudia biakudia kua mukaji awu.

9Mukaji kuambila bayende ne:

— Ndi mujadike ne: muambi wa Mvidi Mukulu ewu, udi ufika ku nzubu kuetu misangu yonsu, mmuntu wa tshijila.

10Tudi mua kuibaka tshibambalu tshikese kulu kua nzubu, tutekemu bulalu, mesa, nkuasa ne muendu. Neikale ulala mu tshibambalu atshi, padiye upitshila kuetu.

11Ke pavua muambi Elisha mufike ku nzubu kua bantu abu dituku dikuabu. Kubandaye kulu mu tshibambalu tshiende bua kulalamu.

12Ke muambi Elisha kutuma muena mudimu wende Ngeyazi bua kubikila muena nzubu awu. Mukaji awu kufika ku tshibambalu aku,

13Elisha kuela Ngeyazi diyi, bua ambile mukaji awu ne:

— Udi muditatshishe bikole bualu buetu. Tshitudi mua kukuenzela ntshinyi? Udi musue tukuakuile kudi mukalenga, nansha kudi mfumu wa bena mvita anyi?

Mukaji kuandamuna ne:

— Nansha kakese, tuasakidilayi. Meme ndi munkatshi mua bena tshisamba tshietu. Tshiena nkengela tshintu to.

14Elisha kukonka Ngeyazi ne:

— Tumuenzele tshinyi?

Ngeyazi kuandamuna ne:

— Kena ne muana wa balume to. Kabidi bayende ukadi mumane kukulakaja.

15Elisha kuambila Ngeyazi ne:

— Bikila mukaji awu tshiakabidi.

Ngeyazi kumubikila. Anu mukaji utua makasa ku tshiibi,

16Elisha kumuambila ne:

— Tshidimu tshidi kumpala etshi, anu tshikondu etshi, neukongoloje muana wa balume mu maboku.

Kadi, mukaji kuela diyi ne:

— Kundingi to! Wewe udi muambi wa Mvidi Mukulu, lekela kungambila bualu bua dishima!

17Mukaji awu, kuimita difu. Tshidimu tshikuabu, anu tshikondu tshia mumue atshi, kulelaye muana wa balume muvua muambi Elisha mumuambile.

Elisha udi ufululula muana

18Muana awu kukola. Dituku dikuabu, kuyaye kumonangana ne tatuende uvua wenza mudimu mu madimi ne banowi ba bintu.

19Diakamue muana kudila, wamba ne:

— Eyi tatu! Mutu wanyi! Mutu udi usama!

Tatuende kuambila muena mudimu ne:

— Muambula, umufile lukasa kudi mamuende.

20Muena mudimu kuya ne muana kudi mamuende. Mamuende kumuambula pambidi. Kadi munda munya, muana kufila.

21Ke mamuende wa muana kubanda ne muana mu tshibambalu tshivua Elisha ulala. Kumuladika pa bulalu bua Elisha, kuinjila ku mbelu. Mukaji kuya mu madimi,

22kubikila bayende, umuambila ne:

— Ntumina muena mudimu ne nyama wa mpunde. Ndi nya lukasa kudi muambi wa Mvidi Mukulu. Nempingane.

23Bayende kumukonka ne:

— Udi uya kudi muambi lelu bua tshinyi? Ki ndituku dia tshibilu tshia ngondu mupiamupia, nansha dituku dia Dikisha mene!

Mukaji kuandamuna ne:

— Kupampakanyi to!

24Kusuikaye biseba bia kusomba pa nyama wa mpunde. Kuambilaye muena mudimu ne:

— Tuyeku lubilu ne nyama wa mpunde, umusake too ne muaba undi nkuambila bua kuimana.

25Mukaji kuya, ulonda njila wa ku mukuna wa Karmele bua kumonangana ne muambi Elisha. Muambi Elisha umona mukaji utshidi pa bule, kuambila muena mudimu wende Ngeyazi ne:

— Tangila, ke mukaji utu ungakidila ku Shuneme wawa.

26Nyema lukasa, umukonke ne: “Wewe, bayebe ne bana, nudi bimpe anyi?”

Mukaji kuandamuna Ngeyazi, muena mudimu wa muambi, ne:

— Tudi bimpe!

27Kadi, mukaji ufika pabuipi ne muambi Elisha ku mukuna wa Karmele, kudiela panshi, kumukuata ku makasa. Ngeyazi uvua musue kumusakila. Kadi Elisha kumukandika ne:

— Mulekela! Udi ne dibungama. Tshiena mumanye kudidi difuma, bualu Mvidi Mukulu kena mungambile.

28Mutantshi mukese, mukaji kuela diyi ne:

— Meme mvua mukulombe muana wa balume anyi? Nansha! Meme mvua mukuambile ne: “Kuena mua kundaya bualu bua dishima!”

29Elisha kukonka Ngeyazi ne:

— Udi mumane kudilongolola bua kuya anyi? Angata dikombu dianyi dia buambi, uye ku Shuneme. Wewe musangile ne muntu mu njila, kuimanyi bua kumuela muoyi to. Padi muntu musue kukuela muoyi, kujimiji diba bua kuyukila nende to. Pawafika, uteke dikombu dianyi pa mpala pa muana.

30Kadi mamuende wa muana kuambila muambi Elisha ne:

— Bu mudi Maweja-Nangila ne muoyi, ne wewe kabidi muikale ne muoyi, tshiena mua kupingana nkayanyi, katuyi nebe!

Nanku Elisha kuya ne mukaji awu.

31Kadi Ngeyazi uvua mumane kufika kumpala kuabu. Kutekaye dikombu dia muambi Elisha pa mpala pa muana. Kadi kena mumone bualu. Muana kena muakule, kena munyungakane. Ngeyazi kupingana kudi muambi Elisha, umuambila ne:

— Muana kena mutabale to.

32Elisha ufika ku nzubu, kusanganaye tshitalu tshia muana tshiladike anu pa bulalu.

33Elisha kubuela mu nzubu, kuinjila tshiibi. Kutuadijaye kutendelela Maweja-Nangila.

34Pashishe, kulalaye pambidi pa muana, mutue mishiku ku yende, mesu matue ku a muana, bianza biende bitue ku bia muana. Pavua muambi mulale pambidi pa muana, mubidi wa muana kumvua luya.

35Elisha kujuka, kuenda mu nzubu awu, utua eku ne eku. Pashishe kulalaye kabidi pambidi pa muana. Muana kuela nyashi misangu muanda mutekete, kutabalaye.

36Diakamue, Elisha kubikila Ngeyazi kumuambila ne:

— Ndaku, ubikile mamuende wa muana.

Ngeyazi kutuluka bua kukeba mamuende wa muana. Awu ufika, Elisha kumuambila ne:

— Luaku, wangata muanebe.

37Mamu usemena, kudiela mpala panshi ku makasa a muambi Elisha. Pashishe, kuambulaye muanende, kuya.

Nsupu udibu kabayi mua kunua

38Tshikondu tshivua tshiyole tshia nzala mu ditunga, Elisha kupingana mu tshimenga tshia Ngilgale. Kubikidishaye tshisumbu tshia bambi. Kuambilaye muena mudimu wende ne:

— Teka luesu lunene pa kapia, utulambile nsupu.

39Ke, muambi wa tshisumbu tshia bambi abu, kuya mu mpata bua kukeba biseki. Kusanganaye tshilowalowa tshilambile ku mutshi. Kupolaye bimuma biatshi bia kolokente, kudisuika mu tshilamba tshivuaye natshi. Upingana pambelu, kubikosololaye, kubiela mu luesu. Kadi muntu nansha umue kavua mumanye ne: mbimuma bia mushindu kaayi to.

40Pavuabu bapesha bantu nsupu awu, bavua bamulabula. Diakamue kuelabu mbila bamba ne:

— Muambi wa Mvidi Mukulu, lufu ludi mu nsupu emu!

Bualu muntu nansha umue kavua mua kumunua to.

41Ke muambi kulombesha bukula, kubuela mu nsupu, kuambila muena mudimu wende ne:

— Pesha bantu aba nsupu ewu, banue!

Nanku bintu bivua mu luesu bikavua bimpe, bikumbane mua kubidia.

Elisha udi udisha bantu lukama

42Tshikondu atshi, muntu mukuabu uvua utumina ku Baale-Shalisha. Uvua mutuadile muambi mampa a orje makumi abidi, menza ne bukula bupiabupia. Uvua kabidi ne tshibombi tshia ntete iwaye munowe anu matuku awu. Elisha kuambila muena mudimu wende bua kuabanyina bantu bonsu biakudia abi.

43Kadi muena mudimu kumukonka ne:

— Biakudia ebi, ndi mua kudisha nabi bantu lukama munyi?

Muambi Elisha kumuambila kabidi ne:

— Abanyine bantu bonsu biakudia ebi, bualu Maweja-Nangila udi wamba ne: “Muntu yonsu neapete biakudia bikumbane, bikuabu nebishale.”

44Muena mudimu kuabanyina bantu bonsu mampa. Muntu yonsu kudia. Mampa makuabu kushala, bu muvua Maweja-Nangila muambe.