1Nuenu balombodi ba bantu, nangayi buakane. Tuntayi meji enu buludi kudi Maweja-Nangila. Kabidi numukebe ne muoyi wa bupuekele.
2Bualu badi kabayi bamutete ke badi bamupeta. Udi udileja kudi badi bamutekemena, ke badiye umuenekela.
3Meji mabi adi umusha bantu kudi Mvidi Mukulu. Kadi muntu udi upadila bukole bua Mvidi Mukulu, neafue bundu.
4Meji kaena asomba munda mua muntu udi wenza bibi, nansha mu muoyi wa mupika wa bubi.
5Meji ke Mueyelu wa Mvidi Mukulu, udi ulombola bantu, udi ubenga bonsu badi ne mioyi ibidi, udi unyema bantu badi ne lungenyi lua bupale. Udi umuka kudi muena kansungansunga.
6Meji adi ananga bantu. Adi anyoka muntu udi upenda Mvidi Mukulu. Bualu Mvidi Mukulu udi mumanye meji a bantu, udi mumanye tshidi mu muoyi wabu, udi umvua tshidibu bamba.
7Mueyelu wa Maweja-Nangila udi pa buloba bujima. Mmutusange bonsu pamue, mmumanye bionsu bidi bantu bamba.
8Maweja-Nangila udi mumanye muakudi wa bibi, muntu awu neapete dinyoka didi dimuakanyine.
9Kumpala kua Mvidi Mukulu, meji a bantu babi adi atanduka. Miaku yabu idi ifika kudi Maweja-Nangila. Nanku nebapete dinyoka dia pa bubi buabu.
10Maweja-Nangila udi uteleja bionsu ne ntema. Udi umvua too ne manunganyi makese.
11Lekelayi kuamba bakuabu bibi. Lekelayi bijanu. Mvidi Mukulu udi mumanye biudi wamba mu musokoku, neakuebeje. Muntu udi ushiminyinangana malu udi udikebela kabutu.
12Kanudikebedi lufu ku buenzayi buenu. Kanudifuishi bua ngenzelu yenu mibi.
13Mvidi Mukulu kena mufuke muntu bua kufuaye. Kena usanka padi muntu ufua.
14Wakabika bintu bionsu bua bikalepu. Bifukibua bionsu bidi biambuluishangana bua kupeta muoyi. Bifukibua kabiena mua kushipangana. Mvidi Mukulu ke udi mfumu wa pa buloba, ki ndufu nansha.
15Muntu muakane kena ku bupika bua lufu to.Meji a bantu badi bapetula Mvidi Mukulu
16Bantu babi badi badikebela lufu ku bidibu bamba ne ku bidibu benza. Badi badia bulunda ne lufu, kabidi batua nalu ndondu. Ke padibu bumvuangana ne lufu.
Who We AreWhat We EelieveWhat We Do
2025 by iamachristian.org,Inc All rights reserved.
