1Maweja-Nangila, nsambu yebe idi mikole ikemesha, bantu kabena mua kuyumvua lukasa to. Nenku bantu bavua kabayi balonge mudi malu ebe bavua bapambuke.
2Pavua bantu babi bela meji a kutokesha tshisamba tshiebe tshijidila, bashadile bobu bine mu miidima kayiyi ijika bu badi mu lukanu. Bavua babakangila mu nzubu yabu kabayi bapeta dinanga kuudi nansha dikese.
3Bavua bela meji ne mibi yetu idi misokome, mmibuikila kudi tshilamba tshifiike tshia tshipua muoyi. Kadi bavua babalondakaja, babatangalaja kudi malu a dikema avua mabamuenekele.
4Nansha bobu basokome mu miaba kaayi, bayua amu ne bowa. Mitoyi ivua ibatshinyisha ivua mibanyunguluke, bintu bivua bienza bowa bivua bibamuenekela, bibatshinyisha.
5Kapia kakavua mua kutokesha miidima eyi to. Nansha mitotu kayivua ne bukole bua bukenkesha mu kandondu amu to.
6Kapia kavua kaditemena kakenke mu miidima, kabueja bowa miaba yonsu. Bu muvuabu buume ne bowa, bivuabu bamona bivua bibakuatshisha bowa bupite ne miidima mene.
7Budimu bua bena majimbu babu kabuvua ne bukole. Dimanya divuabu bela meji ne tudi nadi divua patupu.
8Bantu bavua bela meji ne: tudi ne bukole bua kupandisha bantu ku bowa ne luzakalu, bavua bobu bine bazakala patupu ne bowa kapayi kalu.
9Kadi kakuvua njiwu nansha mikese. Bavua bazakala bikole amu bualu bavua batshina nyama idi ipita, ne nyoka idi idila muadi.
10Bavua bafua ku bowa. Bavua ne bowa bua kutabala mesu mu miidima, kabavua kabidi ne bukole bua kunyema to.
11Bubi budi bujadika mudibu butulumuka, budi budidiwula nkayabu. Muntu udi mumanye tshibawu tshiende, nansha malu mabi adiye muenze.
12Bionsu bikadi bimuzakeja, udi ne bowa, udi ubenga mua kuenza mudimu ne lungenyi luende.
13Padi meji adi muntu nawu, kaayi amuludika, udi wenda uzakala amu kuzakala, bualu kena nansha mumanye bidi bimufikisha ku bionsu abi.
14Butuku abu, buvua bufume mu kandondu ka bafue, buvua bubi bupite. Bantu bonsu aba, kabavua balala butuku bimpe to.
15Bavua babipata kudi bilengulengu, bavua amu bakanyanyanya, kabayi ne bukole bua kujuka, bavua ne bowa bukole.
16Bonsu bavua muaba awu kupona panshi, bu basuika ne nkanu kudi bowa buabu.
17Babidime, balami ba mikoku, bena mudimu ba mu mpata, bavua amu ne bowa bukole, muntu kayi mua kunyema.
18Bantu bonsu bavua basuika pamue mu miidima ne nkanu kayiyi imueneka. Bionsu bivua bibazakaja, tshipepela tshituuta tshiona, nansha miadi mimpe ya nyunyi mu bifufu bia mitshi, nansha mayi adi apueka ne muenji,
19nansha mabue avua abunguluka, nansha nyama idi ibunduka kayiyi imueneka, nansha mikunda ya nyama ya difu, nansha meyi adi atua to mukuna apingana kabidi muitu.
20Miaba mikuabu yonsu bantu bavua bamona bionsu bibalengelela, muntu yonsu uvua wenza mudimu wende kamuyi lutatu.
21Bantu babi bavua bamanye amu ne: netukenge, butuku bubaleja lufu lukavua pa kubakuata. Kadi bowa buvua mu muoyi wabu, buvua bubakengesha bipite ne mu miidima.
Who We AreWhat We EelieveWhat We Do
2025 by iamachristian.org,Inc All rights reserved.
