Sira 37 - MUKANDA WA MYIDI MUKULU（TSH96）

Mulunda muimpe ne mulunda mubi

1Bantu bashilangane badi bamba ne:

“Meme ndi mulunda webe, meme ndi mulunda webe!”

Kadi bamue mbalunda ku dina.

2Ndi ne kanyinganyinga kakole kandi mua kufua naku,

padi mulunda uudi wenda nende wandamuka muluishi!

3Muoyi mubi utudi nawu, mbaufuke kudi nnganyi?

Mutudi tushimangana nawu nenku pa buloba bujima mbishi?

4Kudi mulunda udi usankidila mulunda wende mu disanka,

kadi padi dikenga dikuata mulunda wende, udi umubenga.

5Kudi mulunda udi ukenga ne mulunda wende, bua kupeta biakudia,

kadi diba dia mvita udi umushiya.

6Vuluka mulunda webe paudi mu mvita,

kumupu muoyi paukadi ne bubanji.

Mubedianganyi muimpe ne mubedianganyi mubi

7Mufidi yonsu wa ngenyi udi ujadika mudi ngenyi yende miakane,

kadi mu mikuabu udi ne tshiende tshidiye wipatshila.

8Wadimuka bua muntu udi ukupa mibelu.

Manya bangabanga tshidiye ujinga,

bualu udi mua kuikala ukupa lungenyi bua kupeta tshiende tshidiye wipatshila.

Wamanya bua kakunyengi biudi nabi.

9Bumue udi mua kukuamba ne: “Muudi wenza mmuimpe”,

pashishe udi utalamina pa bule bua kumona tshidi mua kukuenzekela.

10Kukebi lungenyi kudi muntu udi mukukine,

kuambidi bantu badi bakubaba bualu buudi usua kuenza.

11Kulombi lungenyi kudi mukaji pa bualu bua mukenende,

kulombi lungenyi kudi muena bowa pa bualu bua mvita,

kulombi lungenyi kudi ngenda mushinga pa bualu bua bungenda,

kulombi lungenyi kudi musumbi wa bintu bua mushinga wa kubisumbisha,

kulombi lungenyi kudi muena lubabu pa bualu bua kuela muntu tuasakidila,

kulombi lungenyi kudi udi kayi ne luse bua bantu ba muoyi muimpe,

kulombi lungenyi kudi muena mudimu wa kasumbakasumba,

bua tshikondu tshidiye mua kujikija mudimu wende,

kulombi lungenyi kudi muena mudimu wa ku nzubu bua kuenza mudimu mukole.

Kulondi ngenyi idi bantu aba mua kukupa to.

12Kadi ulombe lungenyi kudi muntu muakane,

uudi mumanye ne: udi ulonda meyi a Mvidi Mukulu.

Udi ne meji bu ebe,

paudi upangila, neakenge pamue nebe.

13Kadi nangananga teleja lungenyi ludi muoyi webe ukuambila,

bualu kakuena tshintu tshidi thipita muoyi webe.

14Kondu kadi munda mua muntu kadi kamudimuja,

kapita batentekedi muanda mutekete badi ku lusongu lua kaleya.

15Pa mutu pa bionsu, lomba kudi Muena Kulu

bua akuludike mu njila wa bulelela.

Meji adi ne bua kuambuluisha bantu bakuabu

16Bua kubanga bualu buonsu, badi banji kuelangana meji,

bua kuenza mudimu onsu mbimpe kuela meji.

17Muoyi ke mfuki wa meji.

18Muoyi awu udi mua kusaka muntu ku malu anayi:

ku buimpe nansha ku bubi,

ku muoyi nansha ku lufu.

Kadi tshidi tshishindika bualu kashidi ke ludimi.

19Bamue bantu badi ne bukole bua kulongesha bakuabu,

kadi kabena bamanye mua kudilongesha!

20Kudi bantu badi bakula batalama,

kadi badi babadiwula, babapala biakudia.

21Bualu Maweja-Nangila kena mubatokele ku muoyi,

nenku, mbapange meji nansha makese menemene.

22Kudi bamue bantu ne meji, badi badiambuluisha nawu nkayabu.

Bipeta bia lungenyi luabu bidi bibalengelela amu nkayabu.

23Kudi bakuabu ne meji bua kulongesha tshisamba tshiabu.

Bipeta bia lungenyi luabu bidi bishala kashidi!

24Muntu wa meji udi udisankisha nkayende.

Bantu bonsu badi bamumona badi bamuamba ne: wadiesa wa muabi.

25Matuku adi muntu ulala panu badi mua kuabala,

kadi matuku a bena Izrayele kabena mua kuabala kujikija.

26Muntu wa meji, bena tshisamba tshiende nebamuitabe,

dina diende nedishale kashidi.

Mudi muntu mua kudilama

27Muananyi, udikonke panu matuku audi ne muoyi,

umanye bidi bibi, kubianyishi to.

28Bualu bionsu kabiena bilengelela bantu bonsu,

bantu bonsu kabena banyisha malu onsu.

29Kuikadi mukebi wa masanka onsu,

nansha mudiavi udi upukila biakudia bionsu bidiye umona.

30Bualu kudia kupitshisha kudi kutukebela mabeedi,

budiavi budi bufikisha muntu ku dienda ku muoyi.

31Bantu bavule mbafue bua budiavi buabu,

kadi muntu udi wepuka malu a nenku udi ulala matuku a bungi.