Yudite Diumvuija - MUKANDA WA MYIDI MUKULU（TSH96）
Diumvuija— Mukanda wa Yudite udi utulondela muvua mukaji musungidile bena Izrayele mu nwita ivua mua kubabutula. Yudite udi utuvuluija Debora (Bal 4-5) ne Estere. Kadi tudi tumona mudi mukanda kauyi ukeba kutulondela mushindu menemene uvua malu enzeka kale, kauyi ujadika bimpe muaba uvua bionsu ebi bienzeka. Nebukadnesare, uvua muase bukalenga bupiabupia bua bena Babilone, mutshimuna kabidi bena Asiriya. Kadi mukanda wa Yudite udi umuleja bu mukalenga wa bena Asiriya! Malu adibu batulondela adi aleja ne: bena Yuda bamane kumuka mu bupika, bapingane kuabu (Yudite 4.3; 5.11). Kadi ke Nebukadnesare mene uvua muye nabu mu bupika! Tshimenga kabidi tshia Betuliye, tshidibu batela mu mukanda ewu mujima, kabena batshitela mu mikanda mikuabu, kabidi bidibu bamba bua tshimenga etshi mu 4.7; 6.11-12; 7.12 …kabiena bumvuangane ne muaba nansha umue utudi bamanye mu Palestine.Nanku bidi bimueneka se: mufundi udi musue kusokoka muoyi udiye nawu bua kukolesha bantu ba mu tshikondu tshiende ku muoyi mu makenga adibu nawu. Bumue tudi mu tshikondu tshikole tshivua bena Yuda batombokela Antiyokuse IV Epifane, mukalenga wa bena Siriya (175-174 bgbg ne Y.K.). Diba adi kafundila kende kadi amu bua kulomba kudi bena ditunga badi mu ditunga, bua bashale kuitaba Mvidi Mukulu ne muabu muonsu, kabayi basemene tshianyima, nansha baluishi babu babakengesha. Ke mudi mukanda ewu wipatshila malu a momumue ne mufundi wa mukanda wa Daniyele.
