Sira (31) - MUKANDA WA MYIDI MUKULU（TSH96）

Tulekele kutekemena ku ndota(Diel 13.2-5; 18.9-14; Mb 5.6)

1Muntu mutshimbakane udi utekemena malu a

tshianana adi kaayi mua kuenzeka.

Bantu batshimbakane badi beyamena bilota.

2Muntu udi utekemena ndota,

udi bu muntu udi musue kukuata mundidimbi, nansha kuipatangana ne lupepela.

3Mu ndota badi bamona amu tshimfuanyi,

amu bu mudibu bamona tshimfuanyi tshia patupu,

tshia mpala wa muntu mu lumuenu.

4Ku tshintu tshipia mikiya kudi mua kupatuka tshidi katshiyi ne mikiya anyi?

Mudi bualu bua dishima mua kupatula bualu bulelela mbishi?

5Kubuka mbuku, kutshinka malu adi mua kuenzeka, kulota bilota,

bionsu ebi bidi tshianana,

bidi bu mukaji ulotakana padiye ne difu ukeba kulela!

6Kuangatshi ndota ne mushinga,

pa kumusha idi Muena Kulu ukutumina.

7Bualu ndota mmipambule bantu ba bungi,

bantu bonsu bavua bayitekemena ki mbapete tshintu.

8Mikenji ya Maweja-Nangila kayena ne dishima nansha kakese.

Meji adi menemene munda mua bantu badi balamata Mvidi Mukulu.

Ngendu

9Muntu udi muendakane mu ngendu ya bungi udi ne mamanya a bungi.

Muntu udi mumonamona malu udi wamba bidiye mumanye ne lungenyi.

10Muntu udi kayi muanji kukenga,

kena mua kumanya dikenga,

11kadi muntu udi muendakane mu ngendu,

udi mushikuluje malu bikole.

12Ndi mumone bivule mu ngendu imvua muye.

Bindi mumanye mbipite bindi mua kuamba.

13Misangu ya bungi mvua ne njiwu ya lufu,

mvua mupandukemu amu bua malu amvua mumonamona.

Ditshina dia Mvidi Mukulu

14Bantu badi batshina Maweja-Nangila nebalale matuku mavule panu.

15Bualu mbatekemene kudi udi mua kubapandisha.

16Muntu udi utshina Maweja-Nangila kena utshina tshintu.

Kena uzakala, bualu mmutekemene amu kudi Maweja-Nangila.

17Muntu udi utshina Maweja-Nangila, mmuena diakalenga.

18Mudiye kayi mua kumutekemena mbishi?

Mudi Mvidi Mukulu kayi mua kumulama mbishi?

19Mvidi Mukulu udi utangila bantu badi bamunanga.

Udi ubalama bu mudi ngabu, udi tshipanda wa nshindamenu,

udi muaba wa kusokomena dia mvunde.

Udi dileji dia kuikishila munda munya,

udi ulama bena diende mu njiwu.

Udi ubambuluisha bua kabadishindi.

20Udi ubashikika, ubela lupemba,

ubapesha bukole bua mubidi, bapeta muoyi ne disanka.

Kutendelela Mvidi Mukulu nkuimpe(35.1-3; Yesh 1.10-20; Mal 1.13; Nsum 21.27; Yak 1.26-27)

21Kulambula Maweja-Nangila mulambu wa nyama mipeta ku bubi,

nkupetula Mvidi Mukulu.

22Mvidi Mukulu kena wanyisha milambu ya bantu badi bashipa mikenji yende.

23Muena bukole buonsu kena wanyisha milambu ya bantu

badi kabayi bamutendelela.

Kena ubafuila luse bua bungi bua nyama idibu bamushipela.

24Kulambula Mvidi Mukulu bintu binyenga bapele,

kudi bu kukosa mutu wa muana wa balume tatuende mutangila.

25Bapele badi basanka bua tshiakudia tshikese tshidibu natshi,

muntu udi ubanyengatshi udi ubashipa.

26Muntu udi unyenga mukuabu tshiakudia tshiende,

udi bu muntu udi ushipa mukuende.

27Kubenga kufuta muena mudimu difutu diende nkumushipa.

28Tshiudi mua kupeta ntshinyi,

padi ewu ufinga, mukuabu upulula?

Nuenu bonsu babidi nudi nupungila patupu.

29Padi muntu umue ujingila mukuende diakalenga, mukuabu umutshipa,

ku bonsu babidi aba, udibu mua kuteleja kudi mfumu udiku anyi?

30Muntu mumane kuowa mayi, mudilongolola bua pavuaye mulenga tshitalu,

kadi utshilenga tshiakabidi,

kadi uvua mowa mayi bua kudikobolola bua tshinyi?

31Padi muntu ujila biakudia bua bamufuile luse ku mibi yende ivuaye muenze,

pashishe udi uya kuenza tshiakabidi bibi abi,

kudi udi mua kumuteleja anyi?

Didikengesha diende nedimulengelele ku tshinyi?