Amosa 7 - MUKANDA WA MYIDI MUKULU（TSH96）

Maweja-Nangila uleja Amosa malu musangu wa kumpala: mpasu

1Teleja bivua Maweja-Nangila Mvidi Mukulu mundeje: meme kumona muvuaye mufuke mpasu mipite bungi. Bantu bakavua bamane kunowa bidibu ne bua kulambula mukalenga wa ditunga. Bisosa bi-kavua bituadija kutoloka tshiakabidi.

2Ke mpasu kudia bisosa ne bisaala bionsu bivua mu ditunga. Nanku meme kuamba ne: “Maweja-Nangila Mvidi Mukulu, ndi nkusengelela: fuila bantu bebe luse. Tshianana, nebashale ne muoyi bishi? Bualu badi amu bakese, batekete kabidi.”

3Ke Maweja-Nangila kubafuila luse, wamba ne: “Mbimpe, biudi mumone kabiakuenzeka nansha!”

Maweja-Nangila udi uleja Amosa malu musangu muibidi: kapia

4Ke Maweja-Nangila Mvidi Mukulu kundeja bualu bukuabu: kubikilaye kapia kakole bua kanyoke bantu. Kapia kukamisha mayi onsu, nansha a muinshi mua buloba. Kakavua kashidisha ditunga dia bena Izrayele.

5Ke meme kuamba ne: “Maweja-Nangila Mvidi Mukulu, ndi nkutendakena ne: lekela kuenza nanku. Tshianana, bantu bebe nebashale ne muoyi bishi? Badi anu bakese, batekete kabidi!”

6Ke Maweja-Nangila kubafuila luse, wamba ne: “Mbimpe, biudi mumone kabiakuenzeka nansha!”

Maweja-Nangila udi uleja Amosa malu musangu muisatu: nshinga wa kuludika nende

7Maweja-Nangila kundeja kabidi bualu ebu: Yeye mene uvua muimane pa tshimana, ne nshinga wa kuludika nende mu bianza.

8Kunkonkaye ne:

— Amosa tshiudi umona ntshinyi?

Ke meme kuandamuna ne:

— Ndi mmona nshinga wa kuludika nende.

Ke Maweja-Nangila kungambila ne:

— Eyowa, ndi ndembeleja nshinga ewu munkathi mua bantu banyi, bua mmone ne: badi bantu balulame anyi? Tshiena musue bua basendame nansha kakese.

9Nennyangakaje miaba yonsu

ivua ndelanganyi ya Izrayele itendelela.

Miaba ya tshijila ya Izrayele

neishale makolu.

Nenduishe ne mvita

bena diku dia Yerobowame.Badi bipata Amosa

10Amashiya, mutuangaji wa mu Betele, kumanyisha Yerobowame, mukalenga wa Izrayele, ne: “Amosa mmukuelele tshifufu tshibi munkatshi mua bena Izrayele. Bidiye wamba, bidi mua kunyanga ditunga.

11Umvua miaku yende:

Yerobowame, nebamushipe ku muele!

Bena Izrayele, nebaye nabu ku bupika,

mutantshi mule ne ditunga diabu.”

12Ke Amashiya kuambila Amosa ne:

— Mumonyi wa malu, umuangale muaba ewu, upingane kuenu mu bukalenga bua Yuda. Ulongeshe bana benu! Nebakudishe ne disanka!

13Kadi kumueneki kabidi muetu munu mu Betele, bualu ke muaba udi mukalenga wa ditunga utendelela, ke nzubu wa tshijila wa bukalenga.

14Ke Amosa kuandamuna Amashiya ne: — Tshiena muambi udibu bafuta nansha. Tshiena muntu uvua mu tshisumbu tshia bambi. Nyama indi mumune, ne bimuma bia mfiku bindi mpeta ku mitshi yanyi, ke bivua bindisha!

15Kadi Maweja-Nangila kungumusha ku mudimu wa kumuna nyama yanyi, kuntuma bua kuambila bantu bende, bena Izrayele, malu mu dina diende.

16Kadi wewe, Amashiya, udi musue kunkandika mudimu wa muambi undi ngenzela bena Izrayele. Udi musue bua ndekele biakulakula, muudi ubiamba, bindi mbela nabi ndelanganyi ya Izake. Nanku, teleja bidi Maweja-Nangila ukuambila ne:

17“Mukajebe neenze mudimu wa ndumba

mu tshimenga tshienu etshi.

Bana bebe ba balume ne ba bakaji,

nebabashipe mu mvita.

Bantu bakuabu nebabanyangane

mpangu ne madimi biudi nabi.

Wewe mene neufuile kua bende,

mu buloba budi ne mikiya.

Bena Izrayele, nebaye nabu ku bupika,

mutantshi mule ne diabu ditunga.”