Kolose Diumvuija - MUKANDA WA MYIDI MUKULU（TSH96）
Diumvuija— Tshimenga tshia Kolose tshivua bu kilometre 200 ku luseke ludi diba dipatukila lua Efeze, mu tshitupa tshia Aziya tshidi pabuipi ne matunga a ku Mputu (ke tshitupa tshia ditunga dia Turkiya dia lelu tshidi mu Aziya). Bidi bimueneka ne: Polu ki mmupitshile musangu nansha umue mu Kolose to. Epafrase, muntu wa mu Kolose, ne muambuluishi wa Polu, udi mua kuikala muntu wa kumpala uvua mulongeshe Lumu lua Disanka mu Kolose (Kol 1.7; 4.12).Polu uvua mu lukanu (4.3, 10, 18), pamue apa mu Rome. Ke Epafrase kuvua kumumanyisha ne: bantu mbafike mu Kolose ne dilongesha dipiadipia dia ne: bua kumanya Mvidi Mukulu, kabidi bua kupeta lupandu, wanji kukukuila makole a mulu, ulame bibidilu bia bena Yuda, bu kuditekesha panshi, kulama mikenji idi itangila biakudia, biakunua, a.n. Polu mumvue nanku, kutuminaye diakamue bena Kolose mukanda bua kubavuluija ne: Mvidi Mukulu udi utupetesha lupandu amu kudi Yezu Kristu nkayende. Bumue mmubatumine mukanda ewu kudi Tishike ne Onezime (4.7, 9).Mukanda ewu mmufunda nunku: Polu mumane kuela bena Kolose muoyi, mumane kuela kabidi Mvidi Mukulu tuasakidila (1.1-14), udi uleja mu tshitupa tshia kumpala, mudi Kristu Mfumu udi ku mutu kua makole onsu a mulu, muikale kabidi Mfumu umue epele wa Tshisumbu tshia bena ditaba (1.15—2.3).Pashishe udi udimuja bena Kolose ku balongeshi ba dishima bavua bapatuka muabu (2.4-25).Mu tshitupa tshia ndekelu, udi ubaleja mudibu ne bua kudisanga ne Kristu, bua bamone mua kusomba nsombelu mupiamupia mu Tshisumbu tshia bena ditaba, kabidi munkatshi mua bena diku diabu ne bena ditunga (3.1—4.6).Ku ndekelu kua mukanda Polu mmufunde malu mashilangane, mufunde kabidi ne tshianza tshiende miaku ya kubeela muoyi (4.7-18).Malongesha a dishima adi mashilangane ku tshikondu ne ku tshikondu. Kadi adi ipatshila bualu bua momumue: kunyanga ditaba dilelela dia bantu badi batekemena lupandu kudi Kristu nkayende. Ke mudi mukanda mutumina bena Kolose ushala wa mushinga ne lelu mene. Udi utuleja mudi Kristu ku mutu kua bionsu, mudiye Yeye nkayende utupikula ku bupika bua mishindu yonsu.
