Mikenji ya bena Levi Diumvuija - MUKANDA WA MYIDI MUKULU（TSH96）

Diumvuija— Kanungu ka kumpala ka Mukanda wa MIKENJI YA BENA LEVI kadi katuleja mudi Mvidi Mukulu ubikila Moshe mu ntenta wa kusambakena, bua kuyukila nende. Mu mukanda mujima tudi tumona mudi Mvidi Mukulu umanyisha Moshe mikenji mivule idiye ne bua kuelela bena Izrayele. Udi ulaya kabidi ne: “Muntu udi ukumbaja mikenji eyi, mikenji neimupeteshe muoyi” (18.5, ke kanungu katudi tusangana kabidi mu Rom 10.5). Mu tshikosu, Mvidi Mukulu udi umvuija bena Izrayele bionsu bidi bibakandika bua kudisanga nende. Udi ubaleja kabidi bidibu ne bua kuenza bua kusambakena menemene nende mu ntenta wende: badi balambula milambu, bayilambule mudi mikenji yamba (tshit. 1 too ne tshia 7), bantu banemeke batuangaji, batuangaji kabidi badinemeke (tshit. 8 too ne tshia 10), muntu yonsu wa mu tshisamba tshia bantu ba Mvidi Mukulu enze muende muonsu bua kuepela malu adi apisha mubidi wende mikiya (tshit. 11 too ne tshia 16), alame bimpe meyi ne mikandu bidi bitangila nsombelu wa bantu ne ditendelela dia Mvidi Mukulu (tshit. 17 too ne tshia 27). Mvidi Mukulu wa tshijila, Mvidi Mukulu udi unanga bantu, Mvidi Mukulu udi upesha bantu muoyi, mmusue bua bantu bende bikale bantu ba tshijila (19.2), bapeshangane pabu muoyi, banangangane. Ke muvuaye mupeshe bena Izrayele mukenji uvua Yezu muambulule, mukoleshe ne: “Yonsu wa kunudi anange mukuende, bu mudiye mudinange yeye mene” (19.18; tangila Mat 22.39).Mikenji eyi idi mua kukemesha mubadi wa lelu. Kadi idi iyuluija amu kuvuluija bena ditaba ba miaba yonsu, ba lelu ne ba matuku adi kumpala, ne: muntu udi upeta muoyi, amu padiye udisanga ne Mvidi Mukulu.