Sira 45 - MUKANDA WA MYIDI MUKULU（TSH96）

1uvuabu bananga kudi Mvidi Mukulu ne kudi bantu.

Muntu ewu mMoshe udibu bavuluka ne disanka.

2Maweja-Nangila kumupa lumu bu lua batumibue ba mu diulu,

kumupa bukole bua baluisha ba bena Izrayele bamutshine.

3Pavua Moshe musue kuenza tshishima,

Maweja-Nangila uvua utshikumbaja diakamue,

bua bamfumu mene ba matunga bamutshine.

Maweja-Nangila kupesha Moshe mikenji bua kumanyisha bantu bende,

kumulejaye kabidi kakese butumbi buende.

4Moshe uvua mulamate Maweja-Nangila, muikale ne bupuekele,

ke Maweja-Nangila kumujidila, kumusungula munkatshi mua bantu bonsu.

5Kumuambilaye diende diyi, yeye kumvua,

kumubueja mu divuba.

Kumupaye mikenji yende, batangilangane mpala ne mpala.

Ke mikenji idi ipesha bantu muoyi, ibapa ne lungenyi.

Uvua ulongesha ndelanganyi ya Yakobe mua kulama ndondu wa Maweja-Nangila,

ne mudi bena Izrayele mua kulonda mikenji ya Maweja-Nangila.

Arone(Tshim 4.14-15; 28.1-43; 39; Lev 8.7)

6Maweja-Nangila kutumbisha Arone,

muntu wa tshijila mufuanangane ne Moshe,

muanabu wa mu tshisamba tshia Levi.

7Kutuaye nende ndondu wa kashidi,

kumupaye mudimu wa butuangaji wa kuenzela bantu bende.

Kumulengejaye ne bilamba bilenga,

kumuvuadika muntumpu wa lumu.

8Kumuvuadikaye bintu bilenga bipite,

kumupa bimanyinu bia muanzu wende,

tuputula tua bilamba bia buanda bua ndanda,

muntumpu mule ne kazaku ka efode.

9Kunyungululaye muntumpu ne tumuma tua ngrenade ku nzemba yabi,

ne tungonga tua mpawungi tuvule ku nseke yonsu,

tuvua tudila pavuaye wenda,

tumvuika mu nzubu wa Mvidi Mukulu,

bua Mvidi Mukulu kuvuluka bantu bende.

10Arone uvua muvuale muntumpu wa tshijila,

muzola ne buanda bua mubidi wa mpawungi,

ne buanda bukunzubile, ne bukunze,

muenza kudi muzodi wa dilambu,

kumupaye ne tshilamba tshia pa tshiadi, pamue ne Urime ne Tumime,

bivua bisokolola tshidi Mvidi Mukulu musue.

11Kumupaye tshilamba tshia pa tshiadi tshikunze tshitela bimpe,

kabidi mabue a mushinga mukole, avuabu basonga bu mudi tshitampi,

biela mu tshitangu tshia mpawungi tshienza kudi musongi wa mabue.

Bavua bafunda pa mabue mena a bisamba dikumi ne bibidi bia bena Izrayele,

bua Mvidi Mukulu abivuluke.

12Kuasabu tshitata tshia mpawungi pa mutu pa tshifulu tshia Arome,

bavua bafundapu ne: “Muntu mujidila wa Maweja-Nangila.”

Tshitata atshi tshivua tshisonga bimpe kudi musongi wa dilambu.

Bilenga bionsu ebi bivua bisankisha bantu bavua babimona.

13Bangabanga ne Arone kayi muanji kubivuala,

kakuvua muntu mukuabu ne bilenga bia mushindu ewu.

Kakuvua uvua muanji kuvuala bia nanku,

amu bana ba balume ba Arone ne ndelanganyi yabu

ke bavua nabi bidimu bionsu.

14Milambu yende uvua uyosha yonsu mijima,

matuku onsu, misangu ibidi ku dituku.

15Moshe ke uvua mumubanjije, mumulabe manyi a tshijila mu mutu.

Ke muvua Maweja-Nangila mutue ndondu wa kashidi ne Arone,

ne ndelanganyi yende nanku.

Too ne pajimina diulu, Arone ne ndelanganyi yende,

nebakuatshile Maweja-Nangila mudimu wa butuangaji,

nebele bantu bende lupemba mu dina diende.

16Maweja-Nangila kumusungula munkatshi mua bantu bonsu,

bua amulambule milambu pa tshilambuilu,

ya musenga wa kamonya ne manananshi,

bua kuvuluija bantu Mvidi Mukulu ne bua kubakobolola.

17Maweja-Nangila kumupaye bumfumu bua kuela meyi,

bua kulongesha bena Izrayele bidiye musue ne bua kukosa nsambu,

ne kumvuija bena Izrayele mikenji yende.

18Mu tshipela bantu bavua kabayi ba mu diku dia Arone,

kutombokela Arone, kumubaba, kumufikishabu munda bikole.

Ke Datane ne Abirame pamue ne Kore ne bonsu bavua batue ku tshiabu.

19Maweja-Nangila umona nanku, kubungamaye bikole,

kufikaye munda, kubenzela malu a dikema,

kubabutulaye kubashidisha ne kapia.

20Kadi Maweja-Nangila kuvudijila kabidi Arone ne bana bende lumu.

Kumupa ne bumfumu bua kuangata bintu bia tshianyi bia mulambu wa bia pa madimi,

bua ikale ne tshiakudia tshikumbane.

21Bualu batuangaji bavua amu badia

milambu ivuabu balambula Maweja-Nangila.

Maweja-Nangila ke uvua muanyishe bua Arone ne ndelanganyi yende badia nanku.

22Kadi Arone ne ndelanganyi yende kabavua ne bua kupeta tshiabu tshitupa tshia buloba

bu muvua bisamba bikuabu bia bena Izrayele bipeta.

Bualu Maweja-Nangila uvua muambile Arone ne:

“Meme ke tshiebe tshia bumpianyi, ndi buneme buebe.”

Pinase(Tun. 23-25: Dib 25.6-13; 1 Mak 2.54)

23Pinase muana wa balume wa Elazare, mmuntu muisatu uvua ne lumu lunene.

Pinase uvua utshina Maweja-Nangila bikole bu muvua Moshe ne Arone.

Uvua ne muoyi mukole, kavua mutue ku tshia bantu

bavua batombokela Mvidi Mukulu.

Ke Maweja-Nangila kufuila bena Izrayele luse.

24Ke Mvidi Mukulu kutua nende ndondu,

kumuteka mulombodi wa nzubu wa tshijila ne wa tshisamba tshiende,

Mvidi Mukulu kumupa muanzu wa mutuangaji munene

yeye ne ndelanganyi yende bua kashidi.

25Mvidi Mukulu uvua mutue ndondu kabidi ne Davide,

muana wa Ishayi wa mu tshisamba tshia Yuda,

uvua mulaye ne bukalenga nebumuke kudi tatu — kadi nebabuangate kudi muana amu umue!

Kadi butuangaji bua Arone badi babupiana kudi ndelanganyi yende yonsu.

26Nuenu batuangaji, ndelanganyi ya Arone, ndi ndomba Mvidi Mukulu,

bua uuje meji munda muenu, numone mua kukosa nsambu,

nupete diakalenga ne dikasa dimpe matuku adi kumpala.