Meji 9 - MUKANDA WA MYIDI MUKULU（TSH96）

Shelomu udi utendelela Mvidi Mukulu bua kupeta Meji(1 Bak 3.6-9)

1“Mvidi Mukulu wa bankambua banyi, Maweja-Nangila wa luse! Wewe ufukile bionsu amu ku muaku webe.

2Ufukile muntu ku Meji ebe bua ikale mfumu wa bifukibua biebe bionsu,

3bua alombole bantu mu njila wa buakane ne wa tshijila, bua akose nsambu ne muoyi wa kalolu.

4Mpeshaku Meji adi pabuipi ne nkuasa webe wa butumbi, mpeshaku muaba munkatshi mua bana bebe.

5Ndi muena mudimu webe mulela kudi mukaji muena mudimu webe. Ndi amu muntu muena butekete, matuku anyi a panu mmakese. Tshiena ne bukole bua kulama meyi ebe ne kukumbaja mikenji yebe.

6Udi kayi ne Meji mafuma kuudi, nansha yeye muntu muakane, awu udi patupu.

7Wewe wakunsungula munkatshi mua bantu bakuabu, bua ngikale mfumu wa bantu bebe, kabidi mulumbuluishi wa bana bebe ba balume ne ba bakaji.

8Uvua mungambile bua nkuibakile nzubu pa mukuna webe wa tshijila, ngibake kabidi tshilambuilu mu tshimenga tshiudi usomba. Nzubu ewu mmutentula ku ntenta wa tshijila, uuvua mulongolole ku tshibangidilu.

9“Maweja-Nangila, Meji adi pabuipi nebe. Adi mamanye bionsu biudi wenza. Meji avuaku pauvua ufuka bantu. Adi amanya tshidi tshikulengelela, tshidi tshiakane, tshidi tshimvuangana ne mikenji yebe.

10Tulula Meji mu diulu, mu muaba webe wa tshijila. Ntumina Meji a ku nkuasa webe wa lumu, bua pandi nawu, akuate nanyi mudimu, kabidi bua angambile tshidi tshikulengelela.

11Bualu adi mamanye ne nujingulule bionsu. Neandombole bua ngenze bionsu mu buakane. Mu butoke buawu bua lumu, neandame ku bubi buonsu.

12Nanku Maweja-Nangila, midimu yanyi neyikulengelele, nendombole bantu bebe mu buakane, nengakanyine mua kusomba mu nkuasa wa bumfumu bua tatu wanyi.

Meji ntshintu tshia mushinga tshidi tshiambuluisha muntu

13“Muntu kaayi udi mua kumanya disua diebe, wewe Mvidi Mukulu? Nganyi udi mua kujingulula tshiudi ujinga mua kuenza, wewe Maweja-Nangila?

14Meji etu makese kaena a bulelela. Ngenyi yetu kayena mijalame.

15Mubidi wetu wa lufu udi unemesha muoyi bujitu, usaka lungenyi luetu bua lutate ku malu a mu bantu.

16Tudi tumvua kakese ne lutatu malu a pa buloba, tuenza ne muetu muonsu bua kumanya bitudi mua kuambula ne bianza, kadi bilenga bidi mu diulu, wabijingulula nganyi?

17Pawikala kuyi mupa muntu bangabanga Meji, nansha pawikala kuyi mumupa Mueyelu webe wa tshijila, mufume mu diulu, udi mua kumanya tshiudi musue nnganyi?

18Ku diambuluisha dia Meji ebe, tudi tumona ne: udi muleje bantu ba pa buloba njila mululame wa kulonda. Ke padi bantu bamanye tshidi tshikulengelela, bapeta lupandu ku diambuluisha dia Meji.”