1 Kulondolola 24 - MUKANDA WA MYIDI MUKULU（TSH96）

Bisumbu bia batuangaji

1Ndelanganyi ya Arone ivua mitapulula mu bisumbu. Arone uvua ne bana ba balume banayi: Nadabe, Abiku, Elazare ne itamare.

2Nadabe ne Abiku kufua tatuabu mutshikale ne muoyi, kabayi balela bana ba balume. Nanku Elazare ne Itamare nkayabu kushala benza mudimu wa butuangaji.

3Pashishe Sadoke, wa ku ndelanganyi ya Elazare, ne Akimeleke, wa ku ndelanganyi ya Itamare, kuambuluisha Davide bua kutapulula batuangaji mu bisumbu, bilondeshile midimu idibu bakuate.

4Kumonabu ne: bantu ba ku ndelanganyi ya Elazare bavua bapite ba ku ndelanganyi ya Itamare ku bungi. Nanku kutapululabu ndelanganyi ya Elazare mu bisumbu dikumi ne bisambombu, ndelanganyi ya Itamare mu bisumbu muanda mukulu, bonsu bikale ne bamfumu ku tshisumbu tshionsu.

5Bavua batshinka pa kutapulula tshisumbu tshionsu. Bualu munkatshi mua ndelanganyi ya Elazare ne mua Itamare muvua “balombodi bajidile” ne “balombodi ba Mvidi Mukulu.”

6Shemaya, muana wa Netaneyele, wa mu diku dia Levi, ke uvua mufundi. Uvua ufunda mena abu kumpala kua mukalenga, kua bamfumu, kua mutuangaji Sadoke, ne kua Akimeleke, muana wa Abiyatare, ne kua bamfumu ba meku a bena Levi, ne a batuangaji. Bavua batshinka misangu ibidi milondangane bua diku dia Elazare, musangu umue bua diku dia Itamare.

7-18Mena a bamfumu ba bisamba avuabu bapeta pa kutshinka avua nenku:

1. Yoyaribe,

2. Yedaya,

3. Arime,

4. Seyorime,

5. Malkiya,

6. Miyamine,

7. Akose,

8. Abiya,

9. Yeshuwa,

10. Shekanya,

11. Eliyashibe,

12. Yakime,

13. Upa,

14. Yeshebabe,

15. Bilga,

16. Imere,

17. Ezire,

18. Apisese,

19. Petakiya,

20. Yezekiyele,

21. Yakine,

22. Ngamule,

23. Delaya,

24. Maaziya.

19Bisumbu bionsu bivua bikumbaja mudimu wa mu nzubu wa Mvidi Mukulu, mushindu udibu balondangane kulu eku. Bavua bakumbaja midimu yabu amu bu muvua nkambua wabu Arone mubambile mikenji iwaye mupete kudi Maweja-Nangila Mvidi Mukulu wa Izrayele.

Mena makuabu a bena Levi

20Ndelanganyi mikuabu ya Levi idi nenku:

Shubayele uvua wa ku ndelanganyi ya Amrame, Yediya wa ku ndelanganyi ya Shubayele.

21Ishiya muanabute wa diku diabu, uvua wa ku ndelanganyi ya Rekabiya.

22Shelomote uvua wa ku ndelanganyi ya Ishare, Yakate uvua wa ku ndelanganyi ya Shelomote.

23Bana ba balume ba Ebrone badi nenku: Yeriya, muanabute, muibidi Amariya, muisatu Yaziyele, ne muinayi Yekamame.

24Uziyele uvua ne muana wa balume, dina diende Mika. Shamire uvua wa ku ndelanganyi ya Mika.

25Zekarya uvua wa ku ndelanganyi ya Ishiya muanabute wa Mika.

26Bana ba balume ba Merari bavua: Mali, Mushi ne Yaziya.

27Ndelanganyi ya Yaziya, muana wa Merari, idi: Shokame, Zakure ne Ibri.

28Mali uvua ne muana wa balume, dina diende Elazare. Kadi Elazare kawa ne muana wa balume to.

29Kishe uvua ne muana wa balume, dina diende Yerameyele.

30Bana ba balume ba Mushi badi: Mali, Edere ne Yerimote.

Eyi ke ndelanganyi ya levi bilondeshile meku abu.

31Ndelanganyi ya Levi eyi, amu bu mudi bana babu, ndelanganyi ya Arone, bavua batshinka, kumpala kua mukalenga Davide, kua Sadoke, kua Akimeleke ne kumpala kua bamfumu ba meku a batuangaji ne a bena Levi, bua kumanya dilondangana dia midimu yabu ayi. Nanku diku dia muanabute divua dipeta mudimu, mushindu wa mumue ne dia muanaʼaʼmukala.