Yakobe Diumvuija - MUKANDA WA MYIDI MUKULU（TSH96）

Diumvuija— Mukanda wa Yakobe udi ne malongesha mimpe ne mibelu, bidi bitangila “bantu bonsu ba Mvidi Mukulu badi batangalake pa buloba” (1.1). Bakuabu badi bamba ne: Yakobe awu uvua muanabu ne Mfumu Yezu. Yakobe udi ulongesha bena Kristu ne bimfuanyi bidi bileja bualu, ubabela kabidi muende muonsu, bua balekele kukengeshangana, balekele kabidi bionsu bidi mua kubungamija bantu badi kabayi bena ditaba.Yakobe udi wanji kuvuluija bena Kristu mudibu mua kuikala bena meji. Meji ndipa dia kudi Mvidi Mukulu. Nanku tudi ne bua kumulombawu ne ditaba dilelela (1.2-8). Pashishe udi ulongesha bidi bitangila bupele ne bubanji, makenga ne mateta, ditaba dilelela didi ne bua kudileja mu bitudi tuenza (1.9-27). Mufundi udi ubela kabidi bikole bena Kristu, bua bumushe kansungasunga konsu munkatshi mua bena Tshisumbu (2.1-13). Pashishe udi ufika ku dilongesha dinene didi mu mukanda wende: kuitaba ne kuenza bidi ne bua kuenda pamue (2.14-26). Udi ulongesha ne bimfuanyi bidi biumvuija bualu, malu mabi atudi tuenzelangana ne ludimi luetu (3.1-12). Pashishe udi upingana ku bualu bua meji malelela (3.13-18). Udi ubela muende muonsu badi bajula matandu, badi balunda ba bia panu, badi batangila bakuabu bu bantu babi, bena biuma badi bakengesha bena mudimu babu (4.1—5.6). Ku ndekelu kua mukanda wende, udi ulomba bena Kristu bua balame lutuulu, bananukile mu ditendelela, bambuluishangane mu njila wa lupandu (5.7-20).Bualu bunene budi mukanda ewu utulongesha budi bumueneka patoke: ki mbikumbane bua kuitaba Lumu lua Disanka lua Yezu ne lungenyi patupu nansha. Ditaba didi ne bua kudileja patoke mu bitudi tuenza, bualu “ditaba didi kadiyi ditufikisha ku dienza malu, ndifue” (2.26).