Sefanya Diumvuija - MUKANDA WA MYIDI MUKULU（TSH96）

Diumvuija— Muambi Sefanya, bumue uvua wenza mudimu wende bu mu tshidimu tshia 630 bgbg ne Y.K., Abakuke kayi muanji kubanga wende. Diba divua Sefanya utuadija kulongesha bantu, bidi bimueneka se: Mukalenga Yoshiya kavua muanji kulongolola malu a Mvidi Mukulu bimpe (tangila 2 Bak 23.1-28.) Nanku bukalenga bua Yuda buvua ne lutatu lukole tshikondu atshi. Bantu ba bungi bavua badikonka ne: Mvidi Mukulu udi bualu menemene ne bantu anyi? NYeye mene udi ubaludika mu mianda ya panu anyi? Muambi udi ubandamuna, ubambila ne: Mvidi Mukulu neadileje patoke mishindu mishilangane. Neavue kulumbuluisha bantu badi basomba mu ditunga dia Yuda, nangananga bena Yerushalayime (tangila 1.1—2.3); neabutule bisamba bidi mutumba ne bena Yuda (2.4-15); neenzulule Yerushalayime, mumane kumushamu bubi buonsu, mumushiye amu bantu ba muoyi wa bupuekele, ne wa bupele, badi mua kuandamuna muoyi wa bantu ba pa buloba bujima (3.1-20.)Sefanya udi ujadika ne: bantu ba Mvidi Mukulu nebumvuangane tshiakabidi ne Mvidi Mukulu wabu, amu padibu bumusha munkatshi muabu bantu badi badikebela amu bidi bibalengelela, kabayi bakumbaja tshidi Maweja-Nangila musue. Kadi Sefanya udi unanga ne dinanga dia pa buadi “bantu bapuekele ba mu ditunga” (2.3; 3.12), badi ne muoyi wa kudipuekesha kumpala kua bakuabu, ne nangananga kua Mufuki wabu.