Amosa Diumvuija - MUKANDA WA MYIDI MUKULU（TSH96）
Diumvuija— Bu mu tshidimu tshia 760 bgbg ne Y.K., Amosa kumuka mu musoku wabu wa Tekowa (bukalenga bua Yuda), kuya ku Betele, muaba uvua nzubu wa tshijila wa kumpala wa mu bukalenga bua Izrayele (tangila 1.1 ne diumvuija). Difika diende divua bu dikubakuba dia mvula didi dikuma munkatshi mua bantu badi basomba talalaa.Bualu mu tshikondu tshia mukalenga Yerobowame II (787-747), mu bukalenga bua Izrayele muvua bupole, bualu bena Arame, bena mutumba nabu, kabavua babatatshisha kabidi to. Nanku bubanji bua bungi buvua bubuela mu ditunga. Ke Amosa kumanyisha bantu diakamue ne: bantu bavua Mvidi Mukulu musungule nebabutuke. Kadi miaba yonsu mu ditunga, bantu bavua anu batendelela Mvidi Mukulu. Mudi Amosa ubambila bualu bubi bua nanku mbishi?Tshisamba tshionsu tshidi mua kupeta muaba munkatshi mua bisamba bikuabu. Muntu yonsu udi ne bua kupeta mushindu wa kusomba bimpe munkatshi mua bakuabu. Ke muvua Mvidi Mukulu mufile mikenji, bua bantu ne bisamba binemekangane. Kadi misangu yonsu, badi ne bukole badi badiata bakuabu mu dikasa. Diba adi Mvidi Mukulu udi udileja bu musungidi wa bantu badi kabayi ne bukole, udibu kabayi mua kukosa mishiku ne mabuejila.Amosa udi utumvuija muvuaye mupete mudimu wa kumanyisha bantu malu makole a nanku (tangila bit. 7-9.) Ke muvua bena Izrayele bipate lukasa Amosa mu ditunga diabu bua dilongesha diende dikole adi (7.10-17.)Mu bit. 1-2 neubale mudi Mvidi Mukulu ubela bikole bukalenga bua Izrayele ne bantu badi nabu mutumba.Bit. 3-6 bidi bituleja malu mabi a bantu bende adi Mvidi Mukulu ubenga.Bit. 7-9 bidi bitumvuija mfuki wa malu adi Amosa ulongesha: misangu itanu Mvidi Mukulu udi uleja ne bimfuanyi mukadiye pa kufika bua kunyoka bantu.Mukanda wa Amosa udi utuelesha meji ku mushindu udi muaku wa Mvidi Mukulu ukeba kuandamuna malu adi bantu benza panu, kabayi nansha bamone ne: adi mabi. Bavua bipate muambi. Ke muvuabu babenga Yezu, udi pende ne dilongesha dikole dipite dia Amosa. Yezu pende, nansha kayi muanyishe bua tuangate bia mvita mu bianza, udi musue bua bantu balongolole malu abu, bua bonsu bapete panu tshiabu tshidibu ne bua kupeta.
