Nsumuinu 10 - MUKANDA WA MYIDI MUKULU（TSH96）

Nsumuinu ya pa nsombelu wa bantu

1Nsumuinu ya Shelomu.

Muana wa balume wa meji, udi usankisha baledi bende; kadi muana mupote, udi ubungamija bena kuabu.

2Biuma bipeta ku bubi kabiena bilubuluka kudi udi nabi, kadi muntu udi uvuluka Mvidi Mukulu mu midimu yende neashale ne muoyi.

3Maweja-Nangila kena musue bua muntu udi umulamata afue nzala, kadi kena musue bua muntu mubi apete tshidiye ujinga.

4Bianza bia muena lulengu bidi bibueja muntu mu bupele, kadi bianza bia mukuatshi wa mudimu bidi bipetesha lupetu.

5Muena meji udi usangisha biakudia tshikondu tshia mvula, kadi muntu udi ulala tshikondu tshia dinowa mbimpe bantu bamupepeje.

6Bantu badi bavuluka Mvidi Mukulu, badi badikebela diakalenga, kadi mukana mua bantu babi mudi mvita.

7Muntu udi unemeka Mvidi Mukulu badi bamuvuluka ne disanka, kadi nansha dina mene dia bantu babi badi badipua muoyi.

8Muntu wa meji udi wanyisha mibelu. Muntu muena biakulakula neabutuke lukasa.

9Kusomba biakane nkusomba talalaa. Muntu mubi neatunduke.

10Udi kayi musue kuambila bantu malu patoke mudiwu, udi ubakengesha; kadi udi ubabela bimpe, udi usombesha bantu mu ditalala.

11Miaku ya muntu muakane idi mpokolu wa muoyi. Miaku ya muntu mubi idi ijuula mvita.

12Lukinu ludi lujuula matandu, kadi dinanga didi dijibikila bilema.

13Muena meji badi bamumanyina ku miaku ya lungenyi idiye wakula, kadi udi kayi wela meji badi bamutuuta!

14Bantu ba meji badi bakolesha misangu yonsu lungenyi luabu. Kadi miaku ya bapote neibafikishe lukasa ku kabutu.

15Biuma bia mubanji bidi bimulama bu mudi tshimana tshikole tshilama nzubu. Kadi dikenga didi dibutula mupele.

16Mudimu wa muntu muakane udi umupetesha muoyi. Kadi difutu dia muntu mubi didi dimufikisha ku bubi.

17Muntu udi uvuluka malongesha udi wenda mu njila wa muoyi. Udi ubenga mibelu udi upambuka.

18Muntu udi utekelangana lukinu mu musokoku, udi muena lubombu. Yonsu udi utumpilangana malu ku mesu a bantu, mmuntu mutshimbakane.

19Muntu udi wakula malu mavule, udi utupakana bikole. Kadi muntu wa meji udi mumanye mua kulama ludimi luende.

20Miaku ya muntu udi utshina Mvidi Mukulu mmipite tshiamu tshitoke tshia mushinga mukole. Tshidi muntu mubi wela meji katshiena ne mushinga to.

21Miaku ya muntu muakane idi iludika bantu ba bungi. Kadi bapote badi bafue bua dibenga kuela meji.

22Kabiena kuluila. Maweja-Nangila nkayende ngubipapa bantu.

23Bubi budibu benza budi busankisha muntu mutatakane. Meji adi muena lungenyi upeta adi amusankisha.

24Tshidi bantu babi batshina tshidi tshibatulukila. Tshidi bantu bakane bajinga badi batshipeta.

25Bantu babi badi bafue mu tshikondu tshia tshipupu, kadi bakane badi batshikolela kashidi.

26Maluvu a buanji adi afila buanji ku menu, muinshi udi ukunjija mesu. Ke mudi muena lulengu ufikisha mfumuende munda.

27Badi batshina Maweja-Nangila badi balala matuku mavule pa buloba, kadi benji ba malu mabi badi badianza kufua lukasa.

28Tshidi bantu bakane mua kutekemena ke disanka, bantu babi kabena mua kutekemena tshintu nansha tshimue.

29Maweja-Nangila udi tshieyemenu tshia bantu bakane, kadi udi ubutula badi benza bibi.

30Muntu udi ulamata Mvidi Mukulu udi ushindama kashidi. Kadi babi kabakusomba mutantshi mu ditunga to.

31Mukana mua muntu muakane mudi mupatuka meji. Kadi ludimi lua muena dishima mbimpe balukose.

32Miaku ya muntu muakane idi ilengelela bantu, kadi miaku ya muena lonji idi ibabungamija.