Malu Menza 24 - MUKANDA WA MYIDI MUKULU（TSH96）

Tshilumbu tshidi bena Yuda bafundila Polu

1Kupita matuku atanu, mutuangaji munene Ananiyase, bamue bakulu, ne mulumbuluidi Tertuluse, kufika mu Kezareya. Kumonanganabu ne mulombodi wa ditunga Felikse, bua kumumanyisha tshidibu bafundila Polu.

2Ke Felikse kubikidisha Polu. Tertuluse kulonda tshilumbu, wamba ne:

— Wakunemekibua, mu ditunga emu, tudi tusomba talalaa, amu bualu buebe wewe. Udi mulongolole malu a bungi bimpe bitambe muetu munemu, bua diakalenga dietu.

3Bua bionsu bitudi tupeta diba dionsu, ne miaba yonsu, tudi tukuanyisha bikole.

4Kadi tshiena musue kukupitshishila diba. Ke pandi nkulomba, bua wanji kututelejaku katupa.

5Tudi bamanye se: muntu ewu ntshipupu. Udi utombueja bena Yuda bonsu pa buloba bujima. Udi mfumu wa tshisumbu tshia bena Nazarete.

6Ukavua ukeba kunyanga nzubu wa Mvidi Mukulu ne mikiya. Ke tuetu kumukuata. Wewe mulumbuluishe muntu ewu, neudiumvuile nkayebe, mutudi bamufundile pa bualu.

9Bena Yuda kutua ku tshia Tertuluse, bela mbila ne: muudi muambe amu, mmomu!

Polu udi ndilumbuluila

10Ke mulombodi wa ditunga kuanyisha Polu, bua alonde pende bualu. Ke Polu kuamba ne:

— Bushuwa, ndi mumanye ne: udi ndumbulula munene mu ditunga edi, kukadi bidimu bivule. Ke pandi ndilumbuluila, ntekemena kuudi.

11Wewe mene udi mua kujadika bindi ngamba: kakuena kupita matuku dikumi ne abidi, andi mufike mu Yerushalayime, bua kutendelela Mvidi Mukulu.

12Kabena bansangana ngelangana mpata mu nzubu wa Mvidi Mukulu ne muntu nansha umue, nansha ntombueja bantu mu nzubu ya kutendelela, nansha miaba mikuabu mu tshimenga.

13Bantu aba kabena mua kukujadikila bidibu bamfunde abi to.

14Kadi tshindi nkujadikila tshidi nunku: ndi ngenzela Mvidi Mukulu wa bankambua betu mudimu, ndonda njila mupiamupia, udibu bamba ne: mmubi. Kadi ndi ngitaba bionsu bidibu bafunde mu mikanda ya mikenji, ne ya bambi.

15Ndi mutekemene kudi Mvidi Mukulu, amu mudibu bobu mene batekemene ne: bantu bimpe ne babi nebabiike ku bafue.

16Ke pandi ngenza muanyi muonsu, bua kondu kanyi ka munda kikale katalale kumpala kua Mvidi Mukulu ne kua bantu.

17Ndi mumbuke mu Yerushalayime bidimu bivule. Ndi mupinganemu amu mpindiewu, bua kupesha bena tshisamba tshietu makuta a diambuluisha, kabidi bua meme kulambula Mvidi Mukulu milambu.

18Ke tshimvua ngenza mene, diba divuabu basangane mu nzubu wa Mvidi Mukulu, ngambuluisha bantu mu mulambu wa kudikobolola. Tshivua ne bantu ba bungi to. Tshivua mujule mutoyi nansha.

19Kadi bena Yuda bakuabu ba mu Aziya bavuapu. Bu bobu ne bualu menemene bua mua kusonguela kuudi, bavua mua kuikala apa.

20Kadi udi mua kuebeja kabidi bantu badi apa. Babambile tshilema tshivuabu bansangane natshi, pavuabu bandumbuluisha mu Tshipangu tshikulu tshiabu.

21Tshilumbu tshindi mua kuikala natshi, tshidi amu tshia miaku imvua muambe ne diyi dikole ne: “mBamfunde lelu ku tshilumbu kumpala kuenu, bualu ndi ngitaba ne: bafue nebabiike.”

22Felikse uvua mumanye bimpe malu avua atangila bena Kristu. Kuindijaye bena tshilumbu, wamba ne:

— Netukose tshilumbu tshienu, pikala Liziyase, mulombodi wa basolayi, mumane kufika.

23Kutuminaye mfumu wa basolayi bavua ne bua kulama Polu diyi ne: “Kanutambi kumufimpakaja. Kanukandiki balunda bende badi basue kumukumbula.”

Felikse ne Drusila badi bamonangana ne Polu

24Kupita matuku, Felikse ne mukajende Drusila wa bena Yuda kufikabu. Kubikidishabu Polu. Bavua basue kumvua tshi-vuaye ulongesha bua Yezu ne bua ditaba dia bena Kristu.

25Kadi pakavua Polu ulongesha mudi muntu ne bua kukumbaja bidi Mvidi Mukulu musue, kudikolela, kudilongolola ku dituku diavua Mvidi Mukulu kulumbuluisha bantu, Felikse kukuatshika buowa, kuamba ne:

— Abi mbikumbane! Nenkubikidishe kabidi, pangapeta diba.

26Kadi bu muvua Felikse mutekemene ne: Polu neambuejile makuta, kumubikidishaye misangu mivule, bua kuyukila nende.

27Kupita bidimu bibidi, Porsiyuse Festuse kupingana Felikse mu bulombodi bua ditunga. Kadi bu muvua Felikse musue kusankisha bena Yuda, ki mmupatule Polu mu lukanu nansha.