Meji 7 - MUKANDA WA MYIDI MUKULU（TSH96）

Shelomu uvua muntu bu tuetu

1-2Meme, ndi panyi muntu udi ufua bu bantu bonsu, wa ku ndelanganyi ya muntu wa kumpala, uvuabu bafumba ne buloba. Ndi muimita, ku diminu dia mulume ne disanka dia muvuabu banangangane. Mubidi wanyi uvua ukola, munda mua mamu munkatshi mua ngondu tshitema, mashi a mamu ke avua mankoleshe.

3Diba divuabu bandele, mvua mufike pa buloba bu bantu bonsu. Mvua mubange kueyela kapepa ka momumue bu bakuabu. Meme kudianza kudila bu mudi bana bonsu batshidibu balelelaku.

4Kunjingilabu mu mikaya ya bana, bavue bandame kudi bakuabu.

5Kakuena mfumu nansha umue udibu balela mushindu mukuabu,

6tudi bonsu balela mushindu umue, tudi tufua mushindu umue.

Shelomu udi muanyishe Meji

7Meme mvua mutendelele, Mvidi Mukulu kutupaye lungenyi. Meme kumulomba, kutupaye mueyelu wa Meji.

8Mvua muakidile Meji awu, kupite nkuasa wa bumfumu, nansha wa bukalenga. Meji adi andengelela kupite biuma.

9Tshiena ngafuanyikija ne mabue a mushinga mukole to. Pa kutangila mpawungi yonsu udi amu lusenga, ne biamu bitoke bia mushinga mukole mbitotshi.

10Ndi muanange kupite bukole bua mubidi ne buimpe bua ku mesu. Ndi mujinge mua kuikala ne Meji pa mutu pa kumona butoke bua diba, bualu bukenke buawu kabuena bubuitshidila kashidi.

11Meji mmantuadile bilenga bionsu pamue nawu. Kumpeshawu biuma kabiyi kubala.

12Ndi musanke bua bilenga ebi bionsu, bualu mvua mumanye ne mbifumina kudi Meji. Pinapu tshivua muanji kumanya ne meji ke mfuki wa bionsu.

13Ndi mulonge Meji ne muoyi mulelela, mpindiewu ndi musanke bua kuabuijangana tshimvua mulonge. Tshiena nsokoka biuma bidi munda muawu.

14Meji adi ambuluisha bantu bu mudi tshiuma tshia mushinga mukole tshidi katshiyi tshijika. Badi bapeta tshiuma etshi, badi bashala mu bulunda ne Mvidi Mukulu. Malu mempe adibu benza adi abatumbisha ku mesu kuende.

Mvidi Mukulu udi mfuki wa dimanya dionsu

15Mvidi Mukulu ampe dipa dia kuakula ne lungenyi, kabidi bua tuele meji makanyine dipa didiye mutupe. Bualu yeye nkayende udi uleja njila wa Meji. Kabidi udi upingaja bena meji mu njila mululame.

16Tudi mu tshianza tshiende tuetu bine, miaku yetu, ne bionsu bitudi bamanye ne bionsu bitudi mua kuenza.

17Uvua mumpeshe dimanya dijalame dia bintu bionsu, bua kumanya mudi buloba ne midimu ya bidi bienza buloba,

18bua kumanya ntuadijilu, pankatshi, ne ndekelu ya bidimu, mudibi bijadika kudi diba, ne mudi mivu ishintuluka,

19bua kumanya dilondangana dia bidimu ne miaba idi mabulunge a mulu,

20bua kumanya mudi nyama, ne mudi nsombelu ya nyama ya difu, mudi makole a panu ne mudi bantu bela meji, mutudi mua kusunguluja bikunyibua, ne mutudi mua kuangata miji yabi bua kuondapa nayi.

21Ndi mumanye bionsu bidi bimueneka ne bidi bisokome, bualu, Meji adi mafuke bintu bionsu ebi. Ke adi mandongeshe.

Mushindu udi Meji

22Mueyelu udi ufila Meji udi wa lungenyi, wa tshijila. Udi umuepele, kadi udi udileja mishindu mishilangane. Udi muimpe, udi upitshila miaba yonsu, ubuela kaba kuonsu, udi mukezuke kauyi katoba. Kawena muanyishe bubi, udi munange buakane, mumanye bionsu.

23Meji kabena mua kuatuila nkanana. Meji adi enzela bantu bimpe, umvuangana nabu. Adi mashindame, kaayi atenkakana, kaayi ne dipampakana. Adi ne bumfumu pa tshintu tshionsu, adi amona bionsu. Adi asompoka munda mua bena lungenyi luonsu, nansha bobu bena lungenyi lutue.

24Kakuena tshipepela lubilu bu Meji. Bu mudiwu mapepela nanku, adi abuela, akosolola mu tshintu tshionsu.

25Adi Mueyelu udi upatuka ku bukole bua Mvidi Mukulu, adi bu mpokolu udi upatuka mu lumu lua muena bukole buonsu. Nanku, kalu kabi nansha kamue kakena mua kubuelamu.

26Meji adi bu butoke bua kashidi buvuabu balaye. Adi atuleja bimpe bu mudi lumuenu, kaluyi ditaba, mudimu wa Mvidi Mukulu, adi tshimfuanyi tshia bulenga buende.

27Adi amu nkayawu, kadi adi mua kuenza bionsu. Kaena mua kuandamuka to, kadi adi andamuna bionsu, abienza bipiabipia. Adi abuela mu muoyi wa bantu ba tshijila ba ku ndelanganyi yonsu, abenza balunda ba Mvidi Mukulu ne ba bambi ba muaku wende,

28bualu Mvidi Mukulu mmunange amu bantu badi bumvuangana nende.

29Meji mmapite diba ne mitotu yonsu ku buneme. Bobu baafuanyikija ne butooke, buneme buawu budi amu bupite.

30Bualu butooke budi bushila butuku muaba. Kadi bubi kabuena mua kutshimuna Meji to.