Sira 16 - MUKANDA WA MYIDI MUKULU（TSH96）

Bulenga bua Mvidi Mukulu ne lonji luende

1Kujingi mua kuikala ne bana ba bungi,

padibu kabayi ne ngenzelu milenga.

Kusanki ne ndi ne bana ba balume nansha,

padibu kabayi batshina Mvidi Mukulu.

2Kusanki to, nansha bobu bavule,

padibu kabayi batshina Maweja-Nangila.

3Kutekemenyi ne: nebalale panu matuku a bungi,

kuedi meji ne: nebenze bualu kampanda.

Mbimpe kuikala ne muana umue, udi unemeka Mvidi Mukulu,

pa mutu pa kuikala ne bana tshinunu badi kabayi ne ngenzelu mimpe.

Mbimpe nansha kufua nkumba,

pa mutu pa kutela bana kabayi batshina Maweja-Nangila.

4Muntu wa meji umue udi mua kutantshisha ditunga,

kadi ditunga dia bantu babi nedishale tshipela.

5Mvua mudimuene ne mesu anyi bilejilu bia bungi,

ne mudiumvuile ne matshi anyi malu a kukema kabidi.

6Mu mitanda ya bantu babi mudi mutuka kapia ka Mvidi Mukulu,

kadi katemamu, Mvidi Mukulu ubutula bantomboji.

7Mvidi Mukulu kavua mufuile bantu banene ba mfiondu ba kale luse,

bavua baditemba, bamutombokela bua bukole buabu.

8Maweja-Nangila uvua mubutule tshimenga tshivua Lote musombe,

uvua mudiwule bena tshimenga etshi bua diditambisha diabu.

9Kavua mufuile bena Kenaane luse,

bantu abu kubutuka, kujika amu bua bubi buabu.

10Dinyoka dia nanku adi, divua dikuata bena Izrayele mu tshipela,

binunu nkama isambombu,

kufuabu amu bua buntomboji buabu.

11Nansha ntomboji muikale amu umue,

bivua mua kutukemesha bua pavua Maweja-Nangila kayi mumunyoke to.

Bualu Maweja-Nangila udi ne luse, ne tshiji kabidi.

Udi ne bukole bua kutuila bantu luse, ne bua kubanyoka.

12Udi ne lonji, udi kabidi ne luse.

Udi ukosa nsambu ya bantu bilondeshile malu adibu benza.

13Mvidi Mukulu kena upanga kunyoka muenji wa bibi,

kakunyema ne bintu bidiye mupawule.

Kena ufuisha muntu muakane bundu.

14Mvidi Mukulu udi ne muoyi wa kutuila bantu luse matuku onsu,

kadi udi ufuta muntu yonsu ku bionsu bidiye wenza.

Mvidi Mukulu udi umona bionsu

17Kuambi ne: “Ndi nsokoma Maweja-Nangila,

muntu mulu muamua, kena umvuluka to.

Kena mua kummanya munkatshi mua bantu bavule.

Meme munkatshi mua bifukibua bungi nenku, ndi panyi nganyi?

18Padi Maweja-Nangila ukenketa bifukibua biende bidi kule menemene,

muinshi mua mayi manene ne mua buloba,

bionsu bidi bizakala.

19Mikuna ne bitaku bia buloba,

bidi bizakala padiye ubitangila.

20Nanku kena untangila,

kabidi ngenzelu yanyi kena nayi ne bualu to.

21Meme muenze bibi, muntu kena mua kummona.

Nansha meme nshima mu musokoku,

muntu kena mua kubumanya to.

22Udi mua kumulondela bimpe bindi muenze nnganyi?

Pandi nkumbaja mikenji yende tshindi ntekemena ntshinyi?”

23Bua kuela meji nanku, wikale ne lungenyi nansha lukese!

Muntu mupote udi lungenyi lunyanguke,

udi wela amu meji a nanku.

TSHITUPA TSHIBIDIMeji adi Mvidi Mukulu nawu mu difuka dia bintu

24Muananyi, nteleja upete meji.

Umvua ne ntema tshindi ngamba.

25Nenkulongeshe malu andi mujadike. Neukumanyishe malu amu mudiwu.

26Pavua Maweja-Nangila mufuke bintu biende ku tshibangidilu,

uvua mupeshe tshintu tshionsu muaba watshi.

27Kulongololaye luendu lua mabulunge musangu umue bua kashidi,

kabidi kuelelaye mikenji matuku awu onsu.

Kaena mua kumvua nzala, kaena mua kupungila to.

Kaena alekela mudimu wawu mu njila.

28Dibulunge nansha dimue kadiena ditutakana ne dikuabu.

Bonsu buawu adi atumikila Maweja-Nangila.

29Pashishe Maweja-Nangila kutangila buloba,

kubuwujaye ne bilenga biende.

30Kutekaye nyama ya mishindu ne mishindu pa buloba.

Kadi neyifue, yandamuka amu buloba.