Meji 19 - MUKANDA WA MYIDI MUKULU（TSH96）

Disabuka dia pa Mayi manene makunze

1Kadi wakalondakaja bena lukuna bebe ne tshiji kuyi luse bua kubabutula. Ukavua mudianze kumanya tshivuabu ne bua kuenza.

2Ukavua mumanye ne: nansha bobu balekela tshisamba tshiebe tshiye lukasa, bena lukuna nebavue kukudimuna muoyi bua kutshilondakaja.

3Bena Ejipitu bavua mu madilu, badila ku nkita ya bana babu bafue, kukumbajabu dipangadika dikuabu dia lukasa. Kutuadijabu kulondakaja bantu abu bu badi balondakaja bantu bavuabu bipata kumpala.

4Bavua bapua muoyi tshivua tshibabueja mu makenga, bualu bavua bakanyina dinyoka. Amu pa kubenga kuvuluka malu avua abenzekela ke pavuabu mua kupeta dinyoka dijima.

5Kadi apu bantu bebe bavua batungunuka ne luendu luabu bimpe, bualu baluishi babu bavua ne bua kufua mushindu wa pa buawu.

6Tshifukibua tshionsu, tshidi tshikuitaba, tshivua tshiandamuka bua tshimone mua kulengelela tshisamba tshiebe.

7Kumonabu divuba dibuikila mitanda. Kabidi buloba buume buvua bumueneka muaba uvua mayi. Njila munene kumueneka munkatshi mua Mayi manene makunze. Mavuala manene a mayi avua matangalaka munkatshi mua mpata wa bisosa.

8Wewe kulama bantu bebe pamue. Ke kumonabu tshishima, kusabukabu. Ke muaba uvua bena tshisamba tshiebe basabukile. Uvua mubalame, benda bamona bishima bia dikema.

9Kusankabu bu tubalu tudia bisosa nansha bu tuana tua mikoku tutupika ne dinaya, bakusamuna wewe Maweja-Nangila bu muudi mubapandishe.

10Kuvulukabu kabidi makenga akavuabu nawu patshivuabu ku ba bende. Ne muvua buloba bupatula tumue pamutu pa kupatula ngombe, muvua misulu ipatula ndimba pa mutu pa kupatula mishipa.

11Pashishe kumonabu nyunyi ya mushindu mukuabu. Pavuabu ne nzala, kulombabu biakudia.

12Nyunyi ya tulumbu kupatuka mu mayi manene bua kutuyisha nzala yabu.

Bena Ejipitu badi bakina benyi

13Dinyoka divua dikuate bantu babi. Kadi makubakuba makole avua amanyisha dinyoka adi. Mbapete dinyoka pa bualu, bualu bavua bakina benyi ne tshikisu tshipite bubi.

14Ke muvua bena Sodome babenga kuakidila benyi bavuabu kabayi bamanye. Kadi bobu bena Ejipitu bavua bandamuna benyi bavua babenzela bimpe, bavua bapika babu.

15Ditunga dionsu didi dipanga kuakidila benyi bimpe, nebadinyoke.

16Kadi tshisamba etshi tshivua tshidianza kuakidila benyi ne disanka, babenzela bibilu. Kabidi bavua babanemeka bu bena mulongu. Kadi matuku apita kubakengeshabu ne midimu mipite bukole.

17Bantu abu kupeta disama dia bupofu bu bantu ba mu Sodome bavua bafika ku tshiibi tshia Lote, muntu muakane. Bavua badimona mu miidima menemene, muntu yonsu uvua ububuta bua kupeta mushiku wende wa mbelu.

18Ku lunzenze, nshinga yonsu udi ne diende diyi, kadi diyi padi didi ne bua kusangila ne makuabu bua kupetesha ntendu misheme kabidi mishilangane. Ke tshivua tshienzeka pavua bintu bisangila bua kuenza bikuabu. Tshivuaku ntshietshi:

19Nyama ya pa buloba kushala pa mayi. Bivua biowela mu mayi kubanda ku mpata.

20Kapia kavua ne bukole ne mu mayi muine. Kadi mayi kaavua mua kujima kapia bu pa tshibidilu to.

21Nyama ivua yendakana mu kapia, kayivua ipia to. Ndimi ya kapia kayivua yengulula tshiakudia tshia kulu, patshi tshivua ne bua kuenguluka lukasa bu mabue a mayi.Mufundi udi utumbisha Mvidi Mukulu bua musangu wa ndekelu

22Maweja-Nangila, wavuiji tshisamba tshiebe tshinene, watshipi lumu, katshia kuena mutshilengulule. Matuku onsu, miaba yonsu, uvua amu pabuipi natshi.