1 Korente 6 - MUKANDA WA MYIDI MUKULU（TSH96）

Nudikosele nsambu yenu

1Padi umue wa kunudi tshilumbu ne muanabu, mudiye ukimina kufunda muanabu kudi bakoshi ba nsambu badi kabayi bitaba Mvidi Mukulu mmunyi? Bena ditaba nabu kabena mua kubalumbuluisha anyi?

2Kanuena bamanye ne: bena tshisamba tshia Mvidi Mukulu nebalumbuluishe bantu bonsu anyi? Panudi mua kulumbuluisha bonsu ba pa buloba, munukadi kanuyi mua kukosa nsambu mikese idi munkatshi muenu mbishi?

3Kanuena bamanye ne: netukose nsambu ya batumibue ba Mvidi Mukulu anyi? Kadi mutudi katuyi mua kukosa nsambu ya bena panu mmunyi?

4Kadi panudi ne bilumbu bia nanku, nudi nuya kudi bakoshi ba nsambu, badi kabayi badisanga nenu mu Tshisumbu tshia bena ditaba!

5Ikalayi ne bundu! Munkatshi muenu kamuena muntu nansha umue wa meji udi mua kukosa nsambu ya bana babu anyi?

6Bulelela, muena ditaba udi mua kufunda muena ditaba nende ku tshilumbu anyi? Badi kabayi bitaba Mvidi Mukulu, ke badi ne bua kukosa nsambu yenu anyi?

7Kadi nukadi nuenza bibi bitambe, panudi nufundangana. Pa mutu pa kuenza nanku, nuanyishe bua banukengeshe kapayi bualu; nuanyishe kabidi bua bibe bintu bienu.

8Pa mutu pa kulama lutuulu, nuenu mene nudi nukengesha bantu, nuiba bintu biabu, bobu bikale bena ditaba nenu!

9Nudi bamanye bimpe ne: bantu badi benza malu mabi, kabena mua kupeta muaba mu Bukalenga bua Mvidi Mukulu. Kanudishimi! Badi benza malu a bundu, batendeledi ba mvidie, banyangi ba mbanza ya bende, badi banaya ne bana manaya a bundu,

10bivi, bena lukuka lua biuma, bakuatshiki ba maluvu, banyangi ba lumu lua bende, ne bantu badi banyenga bantu bintu ku bukole, kabakupeta muaba mu Bukalenga bua Mvidi Mukulu.

11Ke muvua bamue ba kunudi kale. Kadi mbamane kunujimijila mibi yenu, banuenze bantu ba tshijila bua nuikale bantu ba Mvidi Mukulu. Mvidi Mukulu mmumane kunubingisha mu dina dia Mfumu Yezu Kristu, kabidi ku bukole bua Mueyelu wa Mvidi Mukulu wetu.

Tumbishayi Mfumu mu mubidi wenu

12Bamue ba kunudi badi bamba ne: “Ndi mua kuenza bionsu bindi musue.” Bidi nanku! Kadi bionsu kabiena bikulengelela nansha. Mvua mua kuamba ne: “Ndi mua kuenza bionsu bindi musue,” kadi tshiena mua kudienza mupika wa muntu, nansha wa tshintu.

13Nudi nuamba kabidi ne: “Biakudia bidiku bua tshibi. Tshiotshi tshidiku bua biakudia.” Eyowa, kadi Mvidi Mukulu neabutule bionsu bibidi. Nanku mubidi kawena muenzela malu a bundu. Udi muenzela Mfumu. Yeye udi Mfumu wa mubidi wetu kabidi.

14Bu muvua Mvidi Mukulu mubishe Mfumu ku lufu, ku bukole buende neambishe ne tuetu kabidi ku muoyi mupiamupia.

15Nudi bamanye ne: mibidi yenu idi bidimba bia mubidi wa Kristu. Ndi mua kuangata tshidimba tshia mubidi wa Kristu, kutshienza tshidimba tshia mubidi wa mukaji muena tshiendenda anyi? Nansha kakese!

16Kanuena bamanye ne: muntu udi usomba ne mukaji muena tshiendenda, udi wenza nende mubidi umue anyi? Bualu Mukanda wa tshijila udi wamba ne: “Bubidi buabu nebenze mubidi umue.”

17Kadi udi udisanga ne Mfumu, udi wenza nende tshintu tshimue mu Mueyelu wende.

18Epukayi malu a bundu! Bubi bukuabu buonsu budi muntu wenza, kabuena bukuata mubidi wende to. Kadi udi wenza malu a bundu, udi unyanga mubidi wende.

19Kanuena bamanye ne: mubidi wenu udi nzubu wa Mueyelu wa Tshijila anyi? Mueyelu awu udi munda muenu. Nuvua baupete kudi Mvidi Mukulu. Nuenu nudi bintu bia bende bia Mvidi Mukulu.

20Mvidi Mukulu mmunusumbe, mufute mushinga. Nanku tumbishayi Mvidi Mukulu mu mubidi wenu.