1Hitako ny Tompo, nitsangana teo ambonin’ny alitara sady niteny hoe:
«Asio ny lohan’ireo andry amin’ity tempoly ity
dia hihozongozona ny fiorenany.
Hotorotoroiko avokoa ireo lohandohany
amin’izay rehetra eto
ary izay sisa tavela dia haringako amin’ny ady;
tsy hisy ho afa-mandositra
ary tsy hisy ho afa-mitsoaka.
2Na hibosesika any amin’ny toeran’ny maty aza ireo,
dia hotsoahan’ny tanako avy any;
na hiakatra ho any an-danitra aza ireo,
dia hampidiniko avy any;
3na hiery any an-tampon’i Karmela aza ireo,
dia hokarohiko sy halaiko any;
na mihevitra hiafina tsy ho hitan’ny masoko
any amin’ny fanambanin’ny ranomasina aza ireo,
dia homeko didy ny trozonabe hanaikitra azy any;
4na ho lasan-ko babo eo anatrehan’ny fahavalony aza ireo,
dia homeko baiko ny sabatra handringana azy any.
Tapa-kevitra Aho tsy hahatonga soa ho azy
fa hahatonga loza.»
Ny Tompo no mifehy ny tany aman-danitra5Ny Tompo ANDRIAMANITR’izao rehetra izao,
vao manendry ny tany, dia mampihovotrovotra azy;
misondrotra sy mietry ny tany manontolo
tahaka an’i Neily, onin’i Ejipta;
ary misaona ny maty ireo mponina rehetra ao aminy.
6Nanorina ny lapany any an-danitra Andriamanitra,
ka ny tany no iorenan’ny andohalambon’ny lanitra;
miantso ny rano eny an-dranomasina Izy
ka mampilatsaka azy etỳ ambonin’ny tany.
Ny TOMPO no anarany.
Famaizana an’i Israely7Izao no teny hentitry ny TOMPO:
«Amiko ve ianareo, ry taranak’i Israely,
tsy tahaka ny taranaka etiôpianina ihany?
Moa tsy nampiakariko avy tany Ejipta ve ianareo,
tahaka ny nampiakarako ny Filistinina avy tany Kaftôra
sy nampiakarako ny Sirianina avy tany Kira?»
8Indro ny Tompo ANDRIANANAHARY mampifantoka ny masony
amin’ity fitondram-panjakana mpanota ity
sady manao teny hentitra hoe:
«Hamongotra azy tsy ho eto ambonin’ny tany intsony Aho,
Kanefa tsy hamongotra manontolo ny taranak’i Jakôba.
9Indro Aho hamoaka baiko
mba hisivanana ny taranak’i Israely
mba hosivanina any anivon’ny firenena rehetra
tahaka ny anasivanam-bary amin’ny sivana
ka tsy hisy vato latsaka amin’ny tany.
10Ho faty an’ady ny mpanota rehetra amin’ny vahoakako,
dia ireo nilaza hoe:
‹Ny loza tsy hananontanona anay
sady tsy hahatratra anay!› »
Fanarenana an’i Israely amin’ny ho avy11Hoy ny teny hentitry ny TOMPO hoe:
«Ilay tanànan’i Davida izao
dia toy ny tranobongo efa nianjera.
Fa ho avy ny andro izay hananganako indray
izany tanàna izany,
ka hofefeko ireo banga amin’ny màndany
hatsangako ny rava tao aminy,
ary haoriko indray ny tanàna ho tahaka ny taloha.
12Amin’izay no hakan’i Israely
ny tany sisa amin’i Edôma
sy amin’ny firenena hafa rehetra
izay nomarihina ny anarako hananako azy.
Izaho Tompo no hahatanteraka izany.»
13Hoy koa ny teny hentitry ny TOMPO hoe:
«Indro avy ny andro
izay hahavokatra ny vary
ka efa hasaina ny tany vao vita ny fijinjana,
sy hahavokatra ny voaloboka
ka efa hafafy ny voambary
vao vita ny fihosemboaloboka.
Divay no hiboiboika eny an-tendrombohitra
sy hikoriana eny an-tampon-kavoana rehetra.
14Haveriko avy amin’ny fahababoana
ny Israely vahoakako,
ka ireo tanàna efa rava
hatsangany sy honenany indray.
Hamboly voaloboka izy
ka hisotro ny divay avy aminy,
ary hanao zaridaina
ka hihinana ny vokatra avy aminy.
15Hamboleko eo amin’ny tany izany nomeko azy izy,
ka tsy hongotana hiala eo intsony.
Izaho TOMPO Andriamanitrao no efa niteny.»
Who We AreWhat We EelieveWhat We Do
2025 by iamachristian.org,Inc All rights reserved.
