1 Hira malefaka nataon’i Davida.
Andriamanitra ô, arovy aho
satria Ianao no fialofako.
2Hoy aho tamin’ny TOMPO:
«Ianao tokoa no Tompoko
ka tsy misy hasambarako,
raha tsy eo akaikinao!»
3Ny vahoakan’Andriamanitra eto amin’ny tany
no tena tsara laza ka sitrako fatratra.
4Fa izay mpirohotra amin’andriamani-kafa
dia hampitombo kosa ny fahorian-tsainy;
tsy mba hiaraka aminy velively aho
hanolotra ny fanati-dra izay ararany,
ary tsy hanonona anarana azy akory.
5TOMPO ô, Ianao no zarako sy lovako;
Ianao tokoa no mitantana ny hoaviko.
6Zava-mahafinaritra no voatendry ho ahy;
eny, ilay fananana soa indrindra no azoko.
7Isaorako ny TOMPO Izay manolo-tsaina ahy;
na amin’ny alina aza dia anarin’ny eritreritro aho.
8Ataoko eo anoloako mandrakariva ny TOMPO,
eo ankavanako Izy ka tsy hihontsona aho.
9Koa faly sy ravo ny fo amam-panahiko,
ary izany no itoerako amim-pahatokiana;
10satria Ianao tsy manary ahy
ho rembin’ny fonenan’ny maty
sady tsy mamela ahy hogiazan’ny fasana
noho izaho tena mpivavaka aminao.
11Ampahafantarinao ahy ny lalana
izay mankany amin’ny fiainana;
hafaliana no manenika ahy eo anatrehanao,
fahafinaretana mitohy no eo ankavananao.
Who We AreWhat We EelieveWhat We Do
2025 by iamachristian.org,Inc All rights reserved.
