1Fanambaràna momba ny Hamônita. Izao no lazain’ny TOMPO:
«Nahoana ny andriamanitra Milkôma
no naka ny tanin’i Gada ho fananany?
Ary nahoana ny Hamônita no monina
ao amin’ny tanàna israelita?
Tsy manan-janakalahy va i Israely
mba ho afa-kandova izany?
2Ka hoy ny teny hentitry ny TOMPO:
«Indro avy ny andro hampandrenesako akoran’ady
ao Rabà, renivohitry ny Hamônita.
Dia ho tonga tanàna aolo sy rava izy
ary ireo tanàna miankina aminy ho kilan’ny afo
ka ho lasan’i Israely indray, hoy Aho,
ny fananana efa azy fahiny.»
3Ry olon’i Hesbôna,
manaova hira fitomaniana hoe:
«Rava ny tanàna Hay!»
Manaova antso vonjy ianareo,
ry tanàna miankina amin’i Rabà.
Mitafia gony ho fisaonana
ary manaova hira fitomaniana
sady miveziveze etsy sy eroa ao anaty fefy,
fa lasan-ko babo ny andriamanitra Milkôma
mbamin’ny mpisorony sy ireo filoham-bahoakany.
4Adray, ry Rabà, zazavavy mpikomy!
Ahoana no ireharehanao amin’ny lohasahanao,
dia ireo lohasahanao mahavokatra be,
sy itokianao amin’ireo tahirinao hoe:
«Iza moa no ho sahy hanafika ahy?»
5Ka hoy ny teny hentitry ny Tompo
ANDRIAMANITR’izao rehetra izao:
«Indro Aho hahatonga fampihorohoroana aminao
avy amin’ny olona rehetra manodidina anao.
Horoahina hizotra eo anoloanareo avy ianareo
ka tsy hisy hamory izay mandositra.
6Rehefa afaka izany vao hampodîko
avy amin’ny fahababoany ny Hamônita.
Izany no teny hentitra avy amiko TOMPO.»
I Edôma7Fanambarana momba an’i Edôma.
Izao no lazain’ny TOMPOn’izao rehetra izao:
Tsy misy olon-kendry intsony ve ao Temàna?
Efa very saina ve ireo matsilo saina?
Sa efa vasoka ny fahendreny?
8Miverena ilalana, mandosira, ry olon’i Dedàna,
misitriha any anaty lava-bato any,
satria ny loza, ry taranak’i Hesao,
no ataoko mihatra aminareo;
izao ny fotoana irotsahako an-tsehatra hamely anareo.
9Koa raha tonga any aminareo ny mpioty voaloboka,
dia tsy hamela sampahony hotsimponina izy.
Raha avy alina ny mpangalatra,
dia handrava mandra-pahafapony.
10Izaho no haka ny fanananareo
ry taranak’i Hesao,
Haharihariko ny fierenareo,
ka tsy ho afa-miafina intsony ianareo.
Ringana ianareo, mpiray firenena samy taranak’i Hesao;
ringana ny mpiara-belona aminareo,
ka tsy hisy olona hanao hoe:
11«Ankino amiko ny kambotinareo
fa izaho no hamelona azy;
ary mahazo matoky ahy ny mpitondratenanareo.»
12Izao tokoa no lazain’ny TOMPO: «Indro fa izay tsy tokony hisotro amin’ny tsatokaty aza, tsy maintsy nisotro ihany; koa ianao ve no ho afaka, ry Edôma? Tsia, tsy ho afaka ianao, tsy maintsy hisotro amin’ny tsatokaty ianao!
13Eny, Izaho TOMPO dia mianiana amin’ny tenako ary hentitra ny teny ambarako fa i Bôtserà renivohitrao dia hampahonena ka ho tonga oha-pandatsana ary ho rava ka ho tonga oha-panozonana; ary ireo tanàna lehibe mpifanila aminy dia ho rava mandrakizay.»
14Nahare hafatra avy amin’ny TOMPO aho tamin’ny alalan’ny iraka izay nalefany ho any amin’ireo firenen-kafa nanao hoe:
«Mivoria ianareo!
Mandehana hamely an’i Edôma!
Mitsangàna hanafika azy!
15Indro hataoko bitika ianao, ry Edôma
raha mitaha eo amin’ny samy firenena,
ka hataon’ny olona tsinontsinona.
16Mampangovitra ny olona ianao
sady mihevi-tena ho ambony
kanefa mamita-tena.
Ary ianao izay mipetraka
eny an-tsefatsefaky ny harambato
ka mamikitra eny antampon-kavoana,
na dia mametraka ny akaninao ho avo
toy ny an’ny voromahery aza ianao,
dia havarimbariko avy eny.»
Izany no teny hentitry ny TOMPO.
17«Ho toerana mahonena i Edôma, ka hampahonena sy hampivarahontsana izay rehetra mandalo azy ny fahavoazany.
18Fa ho rava tahaka an’i Sôdôma sy Gômôra mbamin’ireo tanàna manodidina azy izy, hoy ny TOMPO. Tsy hisy honina ao aminy ary tsy hisy olona hivahiny any intsony.»
19Hoy koa ny TOMPO: «Indro Aho toy ny liona
miakatra avy ao an-kirihitralan’i Jôrdàna
ka mirifatra mankany amin’ny fonenany;
ka ao anatin’ny indray mipi-maso
no hampandosirako ireo Edômita.
Ary hapetrako hifehy ao Edôma
ilay nofidiko ho lehibeny.
Koa iza no azo ampitahaina amiko?
Iza no sahy hifandahatra amiko?
Ary iza no mpitondra hahatohitra Ahy?»
20Noho izany, henoy àry ny tetika
novolavolain’ny TOMPO hamelezana an’i Edôma
sy ny paika nomaniny hamelezana ny mponina ao Temàna:
ho toy ny fitondra biby fiompy mihitsy
no hitondrana azy any an-kafa
hatramin’ny olona farany indrindra.
Ny fonenany mihitsy aza no manilika azy.
21Hihorohoro ny tany
noho ny fidoboky ny fianjerany;
hatrany amin’ny Ranomasin’ny Volotara
no manako ny antso vonjy ataony.
22Indro toa voromahery hipaoka no manidina sy misodisody eo ambonin’i Bôtserà. Amin’izany andro izany dia hangitakitaka toy ny vehivavy miteraka na dia ny lehilahy mahery fo aza.
I Damasy23Fanambaràna ny amin’i Damasy.
Very hevitra ny ao Hamata sy Harpada!
Kivy izy fa nandre ny vaovao ratsy.
Manahy sy mitebiteby ny fony
ka tsy azo notonena.
24Efa ketraka ny olon’i Damasy
ka nihodina mba handositra;
satria tora-kovitra ireo
sady mangitakitaka sy mitaintaina
toy ny vehivavy raha miteraka.
25Ahoana re no dia ilaozana
ity tanàna malaza sady tanànam-pifaliana ity!
26Noho izany, dia ho faty eny an-kianja eny ny zatovony; ary ny miaramilany rehetra ho ripaka amin’izany andro izany, hoy ny teny hentitry ny TOMPOn’izao rehetra izao.
27Handrehetako afo ao an-tanànan’i Damasy ka handevona ny lapan’i Bena-Hadada.
Ny foko arabo28Fanambaràna ny amin’ny Arabo ao Kedara sy ireo fanjakan’i Hatsôra izay resin’i Nebokadnetsara mpanjakan’i Babilôna. Izao no lazain’ny Tompo:
Mitsangàna ianareo, ka miakara hamely an’i Kedara,
Ravao avokoa izay rehetra an’ny olona any an-taniefitra.
29Aoka horobaina ny lainy sy ny ondry aman’osiny,
ny fialofany sy ny entany rehetra!
Ary aoka hoentina ny ramevany!
Aoka izy hiantsoantsoana hoe:
«Fampihorohoroana hatraiza hatraiza».
30Ry olon’i Hatsôra, mandosira lavitra
ka misitriha any anaty lava-bato,
hoy ny teny hentitry ny TOMPO.
Fa manana fikasana hamely anareo
i Nebokadnetsara mpanjakan’i Babilôna,
ary nanomana tetika hahavoa anareo.
31Mitsangàna ianareo, hoy ny teny hentitry ny TOMPO,
ka miakara hamely firenena tsy manana ahiahy
fa mihevitra ho miaina am-pilaminana,
ka tsy manana varavarana na hidy
sady mitoka-monina.
32Hoentin’ny fahavalony ho babo
ny ramevany sy ny ondry aman’osiny marobe.
Haparitako any amin’ny vazantany rehetra
ireo mponina voaharatra fihirifana ireo.
Hitondrako fandravana hatraiza hatraiza izy,
hoy ny teny hentitry ny TOMPO.
33Hanjary fonenan’ny amboahaolo i Hatsôra
ka ho toerana mampahonena mandrakizay.
Tsy hisy honina ao aminy
ary tsy hisy olona hivahiny any intsony.
I Helama34Hafatry ny TOMPO azon’i Jeremià mpaminany ho an’ny Helamita, tamin’ny fiandohan’ny fanjakan’i Tsedekià mpanjakan’i Joda.
35Izao no lazain’ny TOMPOn’izao rehetra izao:
«Hopotehiko ny tsipîkan’i Helama
fa izany no loharanon’ny heriny.
36Avy any atsimo sy avaratra
ary avy any atsinanana sy andrefana
no handefasako ny rivotra efatra
hamelezana an’i Helama.
Haeliko any amin’ny vazantany rehetra izy,
ka tsy hisy firenena
izay tsy ahitana Helamita voaroaka.
37Hampihorohoroiko ny Helamita
eo anatrehan’ny fahavalony,
dia eo anatrehan’izay mitady hahafaty azy.
Amin-katezerana mirehitra
no andefasako loza hamely azy.
Hoenjehiko amin’ny ady ireo
mandra-paharingako azy.
38Hofoanako tsy hisy ao Helama
ny mpanjaka sy ny mpitondra ambony
mba hametrahako ny sezafiandrianako ao,
hoy ny teny hentitra avy amiko TOMPO.
39Nefa indray andro any ny Helamita
dia haveriko avy any am-pahababoana ihany,
hoy ny teny hentitra avy amiko TOMPO.»
Who We AreWhat We EelieveWhat We Do
2025 by iamachristian.org,Inc All rights reserved.
