1Fa nankaiza ny malalanao,
ry vehivavy tsara tarehy indrindra?
Nivily aiza ny malalanao
mba hiarahanay aminao hitady azy?
(Ravehivavy)2Midina any an-jaridainany ny malalako,
dia any an-tsaham-boninkazo mandraradraraka,
mba hirao-bilona any sy hioty lisy.
3An’ny malalako aho ary ahy ny malalako.
Amin’ny toerana misy lisy
no mirao-bilona izy.
Ny sarin’ilay malala (Ralehilahy)4Ianao, rahavako, dia tsara tarehy
tahaka ny tanàna Tiritsà
sady kanto tahaka an’i Jerosalema
ary mahatalanjona toa andian-kintana.
5Aza ajerinao ahy ny masonao
fa mampiontanontana ny foko.
Ny volon-dohanao dia toy ny andian’osy
midina ny tendrombohitra Gilehada.
6Ny nifinao dia fotsy toa andian’ondrivavy
izay efa voahety sy avy nampandroana;
samy manana rahavavy kambana ireo,
ka tsy misy izay tsy tahaka izany.
7Menamena toa hasin’ampongabendanitra
ireo takolakao anatin’ny voalinao.
8Mpanjakavavy enimpolo no an’ny mpanjaka,
valopolo ny vaditsindranony
ary tsy hita isa ny zatovovaviny;
9fa vehivavy iray ihany no voromahailalako,
dia ilay voromahailalako tsy misy tomika,
vavitokan’ny reniny sady zanany tiany indrindra.
Ireo vehivavy hafa izay mahita azy
dia manambara azy hoe sambatra;
ary ny mpanjakavavy sy ny vaditsindrano
dia samy midera azy manao hoe:
10«Fa iza moa io vehivavy io
izay manjelanjelatra toy ny maraina
sady tsara tarehy toy ny volana
sy mamirapiratra toy ny masoandro
ary mahatalanjona toa andian-kintana?»
11Midina ao an-jaridainam-boankazo aho
hijery ny tsirim-boly eny an-dohasaha
sy hizaha raha mitsimoka ny voaloboka
na mamony ny ampongabendanitra.
12Kanefa tsy ampoimpoiziko ny nanjo ahy;
fa nahatonga ahy hatahotahotra ianao,
ry ilay vehivavy mpiray firenena amiko
sady zanakavavin’olom-banona.
(Ireo tovovavy sy vehivavy)Who We AreWhat We EelieveWhat We Do
2025 by iamachristian.org,Inc All rights reserved.
