1Anaka, raisonao ny teniko
ary ataovy raki-tsoa ho anao ny didiko.
2Henoy ny teny ataon’ny fahendrena
ka ampiezaho ny fonao hahay manavaka.
3Mangataha fanampiana amin’ny fahalalana,
miantsoa famonjena amin’ny fahaiza-manavaka.
4Fa raha tadiavinao toy ny fitady volafotsy ireo
ary katsahinao toy ny fikatsaka harena nafenina.
5dia ho fantatrao tokoa ny fanajana ny TOMPO
ary ho hitanao ny fahalalana an’Andriamanitra.
6Fa ny TOMPO no manome ny fahendrena;
ary avy amin’ny vavany no mipoitra
ny fahalalana sy ny fahiratan-tsaina.
7Mampahomby ny olo-mahitsy Izy
ary toy ny ampinga fiarovana
ho an’izay mandeha tsy misy tsiny.
8Miaro ny lalan’ny fahamarinana Izy
ary miambina izay mpifikitra aminy.
9Raha mihaino Ahy ianao,
dia ho fantatrao ny marina sy rariny
ary hizoranao avokoa ny lalam-pahasambarana.
10Ho tonga ao am-ponao ny fahendrena,
ary hampifaly anao ny fahalalana,
11hiaro anao ny fahamalinana
ary hiambina anao ny fahaiza-manavaka;
12ireo no hampiala anao amin’ny toe-dratsy
sy amin’ny olona miteny fitaka
13na mandao ny sori-dàlam-pahitsiana
mba hizotra amin’ny lalan’ny haizina,
14dia ny olona faly manao ratsy
sady finaritra amin’ny famitaha-namana,
15miolikolika sori-dalana
ka mivaona amin’ny fitapitaka.
16Ny fahamalinana sy fahaiza-manavaka
no hampiala anao koa amin’ny teny mandrobo
fanaon’ny vehivavy izay vadin’olona,
17dia vehivavy nandao ny vadiny
sy nanadino ny fifanekena
izay nataony teo amin’Andriamaniny.
18Mitondra amin’ny fahafatesana
ny toetran’izany vehivavy izany,
ary mankany amin’ny fahaverezana
ny fitapitaka ataony.
19Izay mankao amin’izany vehivavy izany
dia tsy misy afa-miverina intsony
ary tsy mihazo ny lalan’ny fiainana.
20Noho izany, ny toetran’ny tsara fanahy no hizoranao
ary ny sori-dalan’ny olo-marina no hotandremanao.
21Fa ny olo-mahitsy sady tsy manan-tsiny
no honina amin’ny tany sy hitoetra eo.
22Ny olon-dratsy sy ny mpivadika kosa
hofongorana amin’ny tany sy ho voaroaka tao.
Who We AreWhat We EelieveWhat We Do
2025 by iamachristian.org,Inc All rights reserved.
