Salamo 19 - Malagasy Bible

SALAMO Voninahitr’Andriamanitra ny voaary tontolo. Ny lalànan’ny Tompo.

1 Tao amin’ny tahirin-kiran’ny filohan’antoko-mpihira. Salamo nataon’i Davida.

2Ny lanitra manambara ny voninahitr’Andriamanitra

ary ny habakabaka mitory ny asa vitany;

3ny andro mitantara izany amin’ny andro mandimby,

ary ny alina milaza izany amin’ny alina manaraka.

4Tsy misy izay miteny na mivolana,

tsy misy izay feo mety ho heno;

5nefa ny rindrany miharihary eran-tany,

ny hafany tonga any am-paran’izao tontolo izao.

Nanorenan’Andriamanitra tranolay

teny ana habakabaka ny masoandro.

6Koa isa-maraina dia miseho ilay izy

toy ny mpampakatra mivoaka ny tranony;

toy ny olo-matanjaka faly maka bahana

mba hanefa ny hazakazaka fanaony.

7Ny faravodilanitra atsinanana no iaingany

ary ny faravodilanitra andrefana no iafarany;

ka, eny amin’ny lalan-kizorany eny,

dia tsy misy afa-miery amin’ny hafanàny.

8Lavorary ny lalànan’ny TOMPO

ka mamelombelona aina.

Mahatoky ny fepetra nataon’ny TOMPO

ka mampahendry ny olon-tsotra.

9Mahitsy ny fitsipiky ny TOMPO

ka mahafaly ny fo.

Mangarangarana ny baikon’ny TOMPO

ka manazava ny fijery.

10Madio ny fanajana ny TOMPO,

ka maharitra hatrany hatrany.

Marim-pototra ny fitsarana avoakan’ny TOMPO

ka ara-drariny avokoa;

11mahasarika noho ny volamena,

dia ny vaingam-bolamena voadio;

sady mamy noho ny tantely,

dia ny tantely avy amin’ny tohotra.

12Tompo ô, izaho mpanomponao

dia hazavain’ireny tokoa;

fa lehibe ny tombontsoa

ho an’izay mitandrina azy.

13Mety manao hadisoana ny olona,

saingy tsy mahatsikaritra akory;

koa mamelà ahy amin’ny ota tsy nahy.

14Arovy tsy ho voan’ny ota iniana aho,

ka aza avela hanan-kery amiko ireny;

dia tsy hanan-tsiny tokoa aho

sady ho afaka amin’ny heloka bevava.

15Hankasitrahinao anie izany teniko

sy izay vetsoko teo anoloanao,

ry TOMPO Vatolampiko

sy Mpanavotra ahy!