Hamôsa 1 - Malagasy Bible

1Tenin’i Hamôsa izay anankiray tamin’ireo mpiompy tao Tekôa. Roa taona talohan’ny horohorontany, dia fahitana no nahafantarany an’ireo teny manakiana ny fanjakan’i Israely ireo, fony mpanjaka tao Joda i Hozià ary mpanjaka tao Israely i Jerôbohama zanakalahin’i Jôasy.

2Hoy i Hamôsa hoe:

Avy ao Tsiôna ny TOMPO no manerona

ary avy ao Jerosalema Izy no manandra-peo.

Dia malahelo ny saha fiandrasana biby fiompy

ary maina ny tampon’i Karmela.

Ny fanakianan’ny Tompo an’i Israely sy ireo firenena manodidina azy. (Ny Sirianina)

3Izao no lazain’ny TOMPO:

«Fahotana mifanesy no vitan’ny mponin’i Damasy,

fa indrindra ity anankiray ity:

Novakivakîny tamin’ny hersa vy ny mponin’i Gilehada.

Noho izany, dia tsy hahemotro ny sazy momba azy:

4«Handefasako afo ny lapan’i Hazaela mpanjaka,

ka ho levon’izany koa ny trano-fiarovan’i Bena-Hadada mpanjaka.

5Hopotehiko ny hidim-bavahadin’i Damasy;

haringako ny mponina ao an-dohasahan-keloka

sy ilay mpitana tehim-panjakana ao an-dapam-pilibana;

ary ny vahoakan’i Siria ho lasan-ko babo any Kira.

Izaho Tompo no miteny.»

(Ny Filistinina)

6Izao no lazain’ny TOMPO:

«Fahotana mifanesy no vitan’ny mponin’i Gazà,

fa indrindra ity anankiray ity:

nentiny ho babo avokoa ny iray tanàna manontolo

mba hatolony ho an’ny Edômita.

Noho izany, dia tsy hahemotro ny sazy momba azy:

7Handefasako afo ny tanànan’i Gazà

ka ho levon’izany ireo lapany.

8Dia haringako ny mponina ao Asdôda

sy ilay mpitana tehim-panjakana ao Askelôna;

ary hahodiko hamely an’i Hekrôna ny tanako

ka ho faty izay sisa amin’ny Filistinina.

Izaho Tompo ANDRIANANAHARY no miteny.»

(Ny Fenisianina)

9Izao no lazain’ny TOMPO:

«Fahotana mifanesy no vitan’ny mponin’i Tiro,

fa indrindra ity anankiray ity:

Natolony ho babo ho an’ny Edômita avokoa

ny iray tanàna manontolo,

fa tsy notsarovany ny fanekem-pirahalahiana

nataony tamin’i Israely.

Noho izany, dia tsy hahemotro ny sazy momba azy.

10Handefasako afo ny tanànan’i Tiro

ka ho levon’izany ireo lapany.»

(Ny Edômita)

11Izao no lazain’ny TOMPO:

«Fahotana mifanesy no vitan’ny mponin’i Edôma,

fa indrindra ity anankiray ity:

Nenjehiny hotrobarana sabatra ny Israelita rahalahiny

sady tsy nananany antra akory;

tsy nisy fetra ny fahatezerany namiravira,

ary nitahiry lolom-po mandrakariva izy.

Noho izany, dia tsy hahemotro ny sazy momba azy:

12Handefasako afo ny tanànan’i Temàna

ka ho levon’izany koa ireo lapa ao Bôtserà.»

(Ny Hamônita)

13Izao no lazain’ny TOMPO:

«Fahotana mifanesy no vitan’ny Hamônita,

fa indrindra ity anankiray ity:

Notatahany ny kibon’ireo bevohòka tao Gilehada

mba hanitarana faritany.

Noho izany, dia tsy hahemotro ny sazy momba azy:

14Handefasako afo ny tanànan’i Rabà

ka ho levon’izany ireo lapany;

sady hisy akoran’ady amin’ny andro iadiana

ka hahery vaika toy ny tafio-drivotra ny fifamelezana.

15Ho lasan-ko babo ilay mpanjakany

sy ireo manamboninahitra miaraka aminy.

Izaho Tompo no miteny.»

(Ny Môabita)