1Indro ny TOMPO fa hanimba ny tany
ka handrava azy;
havadiny ambony ambany izy
ary haeliny ny mponina eo aminy.
2Koa hitovy ihany ny hanjo
ny mpisorona sy ny vahoaka,
ny tompolahy sy ny mpanompolahiny,
ny tompovavy sy ny mpanompovaviny,
ny mpivarotra sy ny mpividy,
ny mpampindrana sy ny mpindrana
ny mpampisambo-bola sy ny mpisambo-bola.
3Ho simba sy ho rava tanteraka ny tany.
Fa izao teny izao no nambaran’ny TOMPO:
4«Misaona sy malazo ny tany,
milofika sy malazo izao tontolo izao,
milofika miaraka amin’ny tany koa
ny habakabaka any ambony any.»
5Ny tany dia voaloton’ny mponina ao aminy
fa nandika ny lalànan’ny Tompo ireny,
tsy nanaraka ny fitsipika
fa nivadika tamin’ny fanekempihavanana
izay maharitra mandrakizay.
6Koa levon’ny ozon’Andriamanitra ny tany;
ary mitondra fahoriana ny mponina eo aminy
noho ny heloka nataony;
hihena ireo ka vitsy dia vitsy no ho tavela.
7Misaona ny divay vaovao
fa milofika ny rantsam-boaloboka,
misento avokoa ireo mpifalifaly am-po.
8Nitsahatra ny gadona firavoana amin’amponga,
nijanona ny horakorak’ireo mpanao korana,
nitsahatra koa ny feo fifaliana amin-dokanga.
9Tsy misy divay hosotroina intsony
ka foana ny hirahira;
mangidy mbamin’ny toaka
eo am-bavan’ny mpisotro.
10Rava ilay tanàna feno zava-poana;
mihidy ny trano rehetra ka tsy azo idirana.
11Mitaraina ny olona eny an-dalam-be
fa tsy misy intsony ny divay;
nanjavona ny firavoravoana rehetra
ary tsy nisy fifaliana intsony teo amin’ny tany.
12Zava-mampahonena sisa no tao an-tanàna,
rava sy montsamontsana ny vavahady!
13Ny eto ambonin’ny tany sy eo anivon’ireo firenena
dia ho tahaka ny ôliva avy nahintsana
sy ho tahaka ny voaloboka avy notazana
ka tsy ahitana zavatra firy intsony.
Mandihy tsy afa-tavony14Izay sisa velona no manandratra ny feony
ka mihoby ny fahalehibiazan’ny TOMPO;
avy any andrefana any izy ireo
no manao horakora-pifaliana hoe:
15«Aoka homem-boninahitra ny TOMPO
any amin’ny faritra atsinanana!
Ilay TOMPO Andriamanitr’i Israely,
aoka homem-boninahitra ny anarany
eny amin’ny tany amoron-dranomasina!»
16Hatrany am-paran’ny tany
no andrenesanay hira hoe:
«Voninahitra anie ho an’Ilay Marina!»
Fa hoy kosa aho anakampoko hoe:
«Vita ny amiko, vita ny amiko.»
Lozan’ireo mpamadika!
Mamadika tokoa ny mpamadika;
eny, mamadika hatrany izy.
17Fampihorohoroana sy longoa ary fandrika harato
no miandry anareo, ry mponina eto an-tany.
18Koa izay mandositra ny kiakiaka
vokatry ny fampihorohoroana,
dia ho latsaka ao anatin’ny longoa;
ary izay tafakatra avy ao amin’ny longoa
dia ho voan’ny fandrika harato.
Misokatra ny hidin-drano any ambony,
ka mihozongozona ny fanorenan’ny tany.
19Vakivaky ny tany ary tena mitresaka;
voadona mafy izy ka mihotsaka.
20Mivembena toy ny mamo ny tany
ary mihevingevina toy ny tranobongo,
fa mitambesatra aminy ny heloka vitany
ka potraka izy ary tsy afa-miarina intsony.
Fanombohan’ny fanjakan’Andriamanitra21Amin’izany andro izany, dia hirotsaka an-tsehatra any ambony any ny TOMPO ka hamely ny andian’ireo planeta aman-kintana; ary hirotsaka an-tsehatra etỳ an-tany koa Izy ka hamely ny mpanjakan’ny tany.
22Hangonina ho ao an-davaka toy ny gadra avokoa ireny, ka hohidiana an-tranomaizina; ary rehefa ela ny ela, dia hiseho fitsarana izy rehetra.
23Amin’izay noho ny henatra
dia hivoaramena ny volana
ary hivaloarika ny masoandro;
fa ny TOMPOn’izao rehetra izao
no hanjaka ao Jerosalema,
eo an-tendrombohitra Tsiôna,
sady hamirapira-boninahitra
eo anatrehan’ireo loholony.
Who We AreWhat We EelieveWhat We Do
2025 by iamachristian.org,Inc All rights reserved.
