Baruc 1 - Samarenyo Meaning-Based Bible (1984)（MBBSAM）

Pahiuna

1Ginsurat ini nga basahan ni Baruc nga anak ni Nerias, nga apo ni Maasias, ngan usa nga tulin nira Sedequias, Hasadias, ug Hilcias. Ginsurat ini didto ha Babilonia

2dida han ikapito nga adlaw han bulan dida han ikalima nga tuig katapos pag-agawa ug pasunoga han mga Babilonianhon an Jerusalem.

3-4Gindako nga tingog an pagbasa ni Baruc han basahan ngadto kan Joaquin nga anak ni Joakim, nga hadi han Juda, ngan ngadto han ngatanan nga mga tawo nga nag-ukoy ha ligid han Salog Sud didto ha Babilonia. An ngatanan napakadto hin pamati hini nga ginbabasa—mga dumagko nga pagkatawo, nga anak hin hadianon nga mga panimalay, mga katigurangan, ngani ngatanan nga mga tawo, bisan kon ano an ira mga kahimtang.

5Han kahuman kabasa han basahan, nagtangis an ngatanan, nagpuasa, ngan nag-ampo han Ginoo.

6Niyan naghatag an tagsatagsa hin kwarta sugad han iya naaakos,

7ngan ginpadara an natirok nga kwarta ngadto ha Jerusalem, ngadto kan Joakim an Labaw nga Padi, nga anak ni Hilcias ngan apo ni Salum, ngan ngadto han iba nga kapadian ngan ngadto han ngatanan nga mga tawo nga kaupod niya didto ha Jerusalem.

8Dida han ikanapulo ka adlaw han bulan han Siban, ginkuha ni Baruc an baraan nga mga garamiton nga gintikas ha Templo basi ibalik ini ngadto ha Juda. Amo ini an mga salapi nga garamiton nga ginpahimo ni Sedequias nga anak ni Hadi Oseas han Juda

9katapos paghalina nga bihag ni Hadi Nabucodonosor han Babilonia hi Joaquin, an mga punoan, an mga magtratrabaho, an mga dumagko nga pagkatawo, ngan an ordinaryo nga mga tawo, ngan gindara hira nga bihag tikang ha Jerusalem ngadto ha Babilonia.

Nagsurat ngadto ha Jerusalem

10Nagsurat an mga tawo:

Alayon hin paggamit han kwarta nga amon ginpadara ha iyo basi makapalit kamo hin mga hayop para han mga halad nga tutuboron ngan han mga halad tungod hin sala, hin insyenso, ngan basi makahatag kamo han mga pagkaon nga halad. Ighalad ini dida ha altar han Ginoo nga aton Dyos,

11ngan pag-ampo kamo para kan Hadi Nabucodonosor han Babilonia ngan han iya anak nga hi Belsasar, nga mabuhi hira samtang diri pa maaanaw an kalangitan.

12Niyan tatagan kami han Ginoo hin kusog ngan hin kapawa an amon mga mata. Pananalipdan kami ni Nabucodonosor ngan han iya anak nga hi Belsasar, ngan mag-aalagad kami ha ira samtang mga buhi pa kami; niyan malilipay hira ha amon.

13Ginhahangyo liwat kamo namon nga mag-ampo kamo han Ginoo para ha amon, kay nakasala kami ha iya, ngan nasisina pa hiya ha amon.

14Alayon hin pagbasa hini nga basahan nga amon ginpapadara ha iyo ngan buhata an kalugaringon niyo nga pagtug-an han sala didto han Templo dida han syahan nga adlaw han Pyesta han mga Payagpayag ngan dida han iba nga baraan nga mga adlaw hin katirok.

Ginkompisal An Sala

15Amo ini an pagkompisal nga iyo pagbubuhaton: “Matadong an Ginoo nga amon Dyos, kundi putos pa kami hin kaawod. Ngatanan kami—an mga tawo han Juda, an mga naukoy ha Jerusalem,

16an amon kahadian, an amon mga punoan, an amon kapadian, an amon mga manaragna, ngan an amon kaapoy-apoyan, puro ginpakaalohan,

17kay nakasala kami han Ginoo nga amon Dyos

18ngan sinmupak kami ha iya. Waray kami mamati ha iya o mag-ukoy hin kinabuhi sumala han iya mga sugo.

19Tikang han adlaw han paggawara han Ginoo han amon kaapoy-apoyan ha Ehipto ngada yana nga adlaw, nagpadayon kami hin pag-ato ha iya, ngan waray kami mag-alang hin pagsupak ha iya.

20Hadto pa han paggawara han Ginoo han amon kaapoy-apoyan ha Ehipto, basi makahatag hiya ha amon hin usa nga hura ngan malangbo nga tuna, iya kami gintunglo pinaagi kan Moises nga iya surugoon. Ngan yana nag-aantos kami tungod hadto nga mga pagtunglo ha amon.

21Dinmiri kami hin pagsugot han pulong han Ginoo nga amon Dyos nga iya iginhimangraw ha amon pinaagi han mga manaragna. Ginbuhat lugod namon ngatanan an amon karuyag ngan nagpadayon kami han amon kalugaringon nga magraot nga mga paagi. Dinmangop kami han iba nga kadiyosan ngan nagbuhat kami han mga butang nga napupungtan han Ginoo.