1Hito manta nga adlaw iginhatag ni Hadi Asuero kan Rayna Ester an ngatanan nga mga hiagi ni Aman nga kaaway han mga Judiyo. Ginsumatan ni Ester an hadi nga urupod pa niya ni Mardoqueo, ngan tikang hadto tinugotan na hi Mardoqueo hin pagsakob ngadto ha atubangan han hadi.
2Ginhulso han hadi an iya singsing nga may timbre han iya silyo (nga iya ginbawi kan Aman) ngan ginhatag ini kan Mardoqueo. Iginbutang ni Ester hi Mardoqueo nga tinaporan han mga hiagi ni Aman.
3Niyan naghimangraw na liwat hi Ester ngadto han hadi, ngan hinmapa hiya ha tiilan han hadi ngan nagtangis. Nakimalooy hiya han hadi nga diri ipadayon an maraot nga nahunahunaan ni Aman kontra han mga Judiyo.
4Idinuhol han hadi an iya bulawan nga baston ha iya, sanglit tinmindog hiya,
5ngan nagsiring, “Kon makakalipay ini han Harangdon nga Hadi, ngan kon napaid ka man ha akon, ngan kon daw matadong ini ha imo, pagpagawas gad hin pasangyaw nga diri unta tumanon an mga sugo ni Aman—adto nga mga sugo nga ginhatag para han pagpuo han ngatanan nga mga Judiyo dinhe han ginhadian.
6Uunanhon ko hin pakailob hini kon umabot ini nga karat-an ha akon mga tawo? Uunanhon ko man hin pag-ukoy hini nga kinabuhi kon pamatayon an akon kalugaringon nga mga tawo?”
7Niyan nagsiring hi Hadi Asuero kanda Rayna Ester ug Mardoqueo nga Judiyo, “Tan-awa, ginbitay ko na hi Aman tungod han iya maraot nga nahunahunaan kontra han mga Judiyo, ngan iginhatag ko na kan Ester an mga hiagi ni Aman. Kon diri pa ini igo,
8surati an mga Judiyo hin bisan ano nga imo karuyag; ngan isurat ini ha akon ngaran ngan patimbrehe han akon hadianon nga silyo, kay an usa nga sugo nga iginpasangyaw na ha ngaran han hadi ug gintimbrehan na, diri na gud ini mababawi.”
9Dida han ika-23 nga adlaw han syahan nga bulan, an bulan han Nisan, ginpatawag ni Mardoqueo an mga sekretaryo han hadi ngan naghimo hin mga surat ngadto han mga Judiyo, ngan ngadto han mga gobernador, mga punoan, ngan mga opisyal han ngatanan nga 127 nga mga lalawigan tikang ha India ngadto ha Sudan. Ginsurat ini ngadto han kada lalawigan ha kalugaringon nga pinulongan.
10Iginpasurat ni Mardoqueo ha ngaran ni Hadi Asuero ngan gintimbrehan ini han hadianon nga silyo. Ginpadara ini pinaagi hin mga maglaksi nga mga mensahero.
11Iginsaysay hini nga mga surat nga matugot an hadi nga an mga Judiyo ha tagsa nga syudad magpadayon hin pag-ukoy pinaagi han ira kalugaringon nga balaod, ngan magkatirok hira para han ira kalugaringon nga panalipod. Gintugotan hira hin pagtratar han ira mga kaaway ha bisan ano nga paagi nga ira karuyag.
12Pagtutumanon ini nga sugo ha bug-os nga ginhadian han Persia dida han ika-13 nga adlaw han Adar, an ika-12 nga bulan.
Who We AreWhat We EelieveWhat We Do
2025 by iamachristian.org,Inc All rights reserved.
