1Han paghibaro ni Demetrio nga napirde na hi Nicanor ngan an iya kasondalohan, iya na liwat ginpadara hira Baquides ug Alcimo ngadto ha tuna han Judea, ngan upod na nira an Siriahanon nga kasondalohan.
2Nag-agi hira ha Dalan han Gilgal, ginpalibotan nira an Mesalot didto ha Arbela, nakuha ini nira ngan pinamatay in damo nga mga tawo.
3Dida han syahan nga bulan han tuig 152 nagkampo hira tugbang han Jerusalem.
4Tikang didto kinmadto hira ha Bersa upod in 20,000 nga baktas la nga mga sondalo ngan 2,000 nga dikabayo nga mga sondalo.
5Nagkampo hi Judas didto ha Ilasa, upod in 3,000 nga hag-id nga mga sondalo.
6Kundi han pagkakita nira han uraura kadamo han kaaway nga kasondalohan, duro an ira kahadlok. Damo an binmaya ha iya ngan 800 na la nga Judiyo nga mga sondalo an nahisalin.
7Han pakakita ni Judas nga diri na gud damo an iya kasondalohan ngan matikang na an araway, nagupong hiya kay waray na igo nga panahon hin pagtirok han iya kasondalohan.
8Nawad-an hiya hin kadasig, kundi nagsiring hiya hadton mga kaupod pa niya, “Pag-andam kita hin pagsulong; bangin makapirde pa kita ha ira.”
9Nagtinguha an iya mga tawo hin pagpugong ha iya. Nagsiring hira, “Diri igo an aton kakusog. Isol kita yana ngan talwasa ta an aton mga kinabuhi. Onina makakabalik kita upod in dugang nga mga kasondalohan ngan makakaasdang kita han kaaway. Waray kita igo nga kadamo hin mga tawo yana.”
10Binmaton hi Judas, “Diri gud ako matugot nga may-ada magsiring nga tinmalikod ako ha pag-awayan. Kon inmabot na an aton panahon, pagkamatay kita dida ha kaisog para han igkasi mga Judiyo ngan diri magbilin hin bisan ano nga hugaw han aton dungog.”
11Ginmawas han kampo an Siriahanon nga kasondalohan ngan nag-atag hin pakig-away kontra han mga Judiyo. Ginduha ka bahin an dikabayo nga mga sondalo, an hinashasan nga mga sondalo amo an nakadto ha atubangan han laray, kundi nag-una han kadak-an nga pila an mga parapana ngan mga paralabyog.
12Bunyog hi Baquides didto han ha tuo nga hugpo hin kasondalohan. Sinmulong an baktas nga kasondalohan nga sinalipdan ha paluyo han dikabayo nga mga sondalo, ngan ginpatunog an mga trompeta para hin away. Nagtrompeta liwat an mga sondalo ni Judas.
13Nabay-og an tuna tungod han aringasa han pag-asdangay han magkontra nga kasondalohan ngan nag-araway hira tikang han aga tubtob han pagkagab-i.
14Han paghibaroi ni Judas nga nakadto ha tuo hi Baquides ngan an kadak-an nga kusog han Siriahanon nga kasondalohan, tinmampo ha iya an ngatanan niya nga gimamag-isogi nga mga tawo,
15ngan ira gindugmok an ha tuo nga Siriahanon nga kasondalohan. Ira ginlanat tubtob gud ngadto han ubos han kapungtoran.
16Kundi han pagkakita han ha wala nga Siriahanon nga kasondalohan nga gindugmok na an ha tuo nira nga kasondalohan, ginsulong nira hi Judas ngan han iya mga tawo tikang ha luyo.
17Nagmapintas hin duro an araway, ngan damo an pinamatay han magpaluyo nga kasondalohan.
18Ha kataposan pinatay hi Judas ngahaw. Niyan nanmalagiw an ngatanan niya nga mga tawo.
19Ginkuha nira Jonatan ug Simon an lawas han ira bugto ngan iginlubong didto han lubnganan han panimalay ha Modin,
20ngan didto han lubnganan nagtangis hira tungod ha iya. Nagmasulob-on an bug-os nga Israel ha dako nga kabidoan sulod hin damo nga mga adlaw. Nagsiring hira,
21“Diri ini mahihimo! Ginpatay an makusog nga bayani ngan magtaralwas han Israel!”
22An iba nga mga binuhatan ni Judas, an iya mga pagsulong, an iya maisog nga mga ginbuhat, ngan an mga dagko nga mga nahimo niya uraura gud hin kadamo kon igsurat ini ngatanan.
Sinmaliwan kan Judas hi Jonatan23Han patay na hi Judas, nagtikang na liwat hin pagpakita ha ngatanan nga dapit han Judea an mga maglingo nga diri nakilala hin balaod, ngan binmalik an ngatanan nga maghuka nga mga tawo.
24Nagkamay-ada liwat hito nga panahon makalilisang nga gutom, ngan kinmampi an bug-os nga nasod ngadto han mga maglingo.
25Gintuyo ni Baquides hin pagtudlok hin pira nga maglingo nga mga Judiyo nga asay magpangulo han nasod.
26Ginbiling hini nga mga tawo an kasangkayan ni Judas, ngan gindara hira ngatanan ha atubangan ni Baquides, ngan iginpakastigo hira ngan ginpakaalohan.
27Panahon ini hin dagko nga kasamokan para han Israel, nga labaw pa hin kamaraot kay hin bisan ano nga nahinabo ha ira tikang han diri na pagpakita han mga manaragna dida ha ira.
28Niyan nagtirok an ngatanan nga kasangkayan ni Judas ngan nagsiring hira kan Jonatan,
29“Tikang mamatay hi Judas nga imo bugto, waray pa usa nga sugad ha iya nga magmamando ha aton kontra han aton mga kaaway, kontra kan Baquides ngan hadton igkasi mga Judiyo nga kinmontra ha aton.
30Sanglit yana nga adlaw ginpipili ka namon nga masaliwan ha iya nga amon pangulo ngan kapitan nga magpapadayon han aton pakig-away.”
31Ginkarawat ni Jonatan an pagkapangulo hito nga adlaw ngan sinmaliwan hiya kan Judas nga iya bugto.
Binmulos hi Jonatan32Han paghibaro ni Baquides hiunong hini, naglarang hiya hin pagpatay kan Jonatan.
33Kundi han pag-abot hini nga sumat kan Jonatan, kinmalagiw hiya, upod hi Simon nga iya bugto ngan an ira mga tawo ngadto han kagurangan han Tekoa ngan nagkampo hira didto han linaw han Asfar. (
34Nahibaro hi Baquides hiunong hini dida han Adlaw nga Iparahuway ngan iya gintabok an Jordan upod an bug-os niya nga kasondalohan.)
35Ginsugo ni Jonatan hi Juan nga iya bugto, nga may katungdanan para han mga panimalay han mga sondalo, hin paghangyo han mga Nabateanhon nga iya hadto iginkasangkay, nga makahipos hira han ira damo nga mga higamit.
36Kundi ginsulong hi Juan han mga Jambritanhon didto ha Medeba, ginbihag hiya, ngan gindara an ngatanan nga mga higamit.
37Waray pag-iha hinbaroan nira Jonatan ug Simon nga iya bugto nga magsasaurog an mga Jambritanhon hin usa nga importante nga pagkasal ngan magkakamay-ada usa nga pagdul-ong han kinasal tikang han bungto han Nadaba. Anak hin usa han dumagko nga mga prinsipe han Canaan an karaslon nga babaye.
38Karuyag nira Jonatan ug Simon hin pagbulos tungod han pagpataya kan Juan nga ira bugto, sanglit sinmagka hira ngan han ira mga tawo hin usa han mga bukid ngan nanago hira.
39Nagbinantay hira ngan ira hinkit-an in usa nga maaringasa nga hugpo nga may-ada dara nga damo nga mga higamit. Nakadto han dalan an karaslon nga lalake, an iya kasangkayan, ngan an iya kauropdan hin pagtapo han hugpo han karaslon nga babaye. Armado hira hin duro ngan nagpatokar hira hin mga turunggon ngan mga gimbal.
40Gin-amaan hira han mga Judiyo tikang han ira mga taragoan ngan ira pinamatay in damo ha ira; nangalagiw ngadto ha kabukiran an mga nanhisalin, samtang gindara han mga Judiyo an ngatanan nira nga mga higamit.
41Sanglit nahimo an pagkasal nga usa nga higayon hin kamasulob-on ngan an ira maglipayon nga mga tokar nahimo nga mga kanta hin paglubong.
42Nakabulos hin maupay hira Jonatan ug Simon tungod han kamatay han ira bugto, ngan binmalik hira ngadto han mga kaluyonluyonan ha ligid han Jordan.
43Nakabati hi Baquides hiunong hini ngan inmabot hiya didto han mga pangpang han Jordan upod in damo nga kasondalohan dida han Adlaw nga Iparahuway.
44Nagsiring hi Jonatan ngadto han iya mga tawo, “Yana kinahanglan makig-away kita para han aton kinabuhi. Maraotraot inin aton kahimtang yana kay han bisan ano nga aton kahimtang han naglabay nga panahon.
45Aada ha aton atubangan an kaaway naton, ha aton luyo aada an salog, ngan ha paluyo nga ligid naton aada an mga kaluyonluyonan ngan mga katungkan; waray naton agian hin paggawas.
46Sanglit pag-ampo kita yana nga talwason kita han Ginoo tikang han aton mga kaaway.”
47Nagtikang an araway ngan gin-iiparatay na nira Jonatan ngan han iya mga tawo hi Baquides han pagkalagiw ni Baquides ngadto ha luyo han kasondalohan.
48Sanglit linmukso ngadto han Jordan hira Jonatan ngan han iya mga tawo ngan naglangoy ngadto ha tabok hin pagkalagiw, ngan waray tumabok an Sirianhon nga kasondalohan hin paglanat ha ira.
49Hito nga adlaw nawad-an hi Baquides hin mga 1,000 ka tawo.
50Han pagbalik ni Baquides ngadto ha Jerusalem, nagtindog an mga Sirianhon hin mga panalipdanan nga may-ada higtaas nga mga pader ngan may-ada trangka nga mga ganghaan para hin pira nga mga bungto didto ha Judea: ha Emmaus, Betoron, Betel, Timnat, Piraton, Tefon, ngan han kota didto ha Jerico.
51Iya ini ngatanan ginbutangan hin mga sondalo hin pagsamok han mga Judiyo.
52Iya liwat ginparig-on an mga kota han mga bungto han Betsur ug Gezer ngan an kota didto ha Jerusalem. Iya ini ginbutangan hin kasondalohan ngan ginhimo nga hiriposan hin ira mga kinahanglanon.
53Niyan iya ginbariga an mga anak nga kalalaken-an han dumagko nga mga tawo han nasod ngan ginpriso hira didto han kota.
54Dida han ikaduha nga bulan han tuig 153 nagsugo hi Alcimo, an Labaw nga Padi, hin pagruba han mga pader han bungsaran ha sulod han Templo. Nabubungkag unta ini nga ginbuhat han mga manaragna; kundi dida han pagtikang han pagruba,
55inatake hiya hin sakit ngan naukoy an trabaho. Naparalisis hiya ngan waray na makabungat han iya baba, waray na ngani makayakan o bisan pakahimo hin karig-onan para han iya panimalay.
56Namatay hiya ha dako nga pag-antos.
57Han paghibaro ni Baquides nga patay na hi Alcimo, binmalik hiya ngadto kan Hadi Demetrio, ngan nagkamay-ada kalinaw an tuna han Judea sulod hin duha ka tuig.
58Niyan nagtirok an mga maglingo ngan nagsiring hira, “Kitaa, nag-uokoy na ha kalinaw ngan ha kahimyangan hira Jonatan ngan han iya mga tawo. Kon pakanhion naton hi Baquides yana, iya mabibihag hira ngatanan sulod hin usa la ka gab-i.”
59Kinmadto hira hin pagkighiruhimangraw hiunong hini nga butang kan Baquides,
60ngan ginmawas hiya upod in damo nga kasondalohan. Iya ginhilit hin pagsurat han ngatanan niya nga mga kaurosa didto ha Judea, ngan naghangyo ha ira hin pagdakop kanda Jonatan ngan han iya mga tawo. Kundi waray hira makahimo hini kay hinbaroan ini nga ira panuyo.
61Ginbihag lugod nira Jonatan ngan han iya mga tawo in 50 han maglingo nga mga pangulo nga may labot han ira maraot nga panuyo, ngan pinamatay hira.
62Niyan inmisol hira Jonatan, Simon, ngan han ira kasondalohan ngadto han kagurangan ha Betbasi. Ira na liwat gintindog an mga kota ngan ginparig-on an mga pader han bungto.
63Han paghibaro ni Baquides hiunong hini ngatanan, iya gintirok an bug-os niya nga kasondalohan ngan ginpaikmat an iya mga kabulig didto ha Judea.
64Iya ginsulong an Betbasi ha paluyoluyo ngan nagtindog hin mga turungtongan para hin pagsulong. Katapos hin maiha nga araway,
65nakalusot hi Jonatan ngadto han kaumhan upod in gutiay la nga mga tawo ngan ginbayaan hi Simon nga iya bugto nga tinaporan han bungto.
66Ginpirde ni Jonatan hi Odomera ngan an iya mga tawo, ngan kahuman, iya ginsulong ngan ginbungkag an kampo han mga Fasiritanhon. Han kapirde hini nira, inmupod hira kan Jonatan hin pagkadto ngan pagsulong kontra kan Baquides.
67Ha amo ngahaw nga takna, nagdagmit hira Simon ngan han ira mga tawo hin paggawas han bungto ngan ira ginsunog an mga turungtongan para hin pagsulong.
68Didto han pag-awayan makuri an kamutangan ni Baquides nga nakawang an ngatanan niya nga mga panuyo, ngan napirde hiya.
69Napungot hiya han mga maglingo nga mga Judiyo nga nag-aghat ha iya hin pagkadto ha Judea nga tungod hini iya pinamatay in damo ha ira.
Niyan naglarang hi Baquides hin pagbalik ngadto han kalugaringon niya nga nasod,
70kundi han paghibaro ni Jonatan hiunong hini, nagpadara hiya hin mga magturuhay ngadto kan Baquides hin pakighimangraw para hin pakisabot hin kalinaw ngan hin pagpabuhi han mga priso nga Judiyo.
71Inmuyon hi Baquides han mga ginhangyo ni Jonatan ngan nagsumpa hiya nga pauukyon niya dida ha kalinaw hi Jonatan ha bug-os niya nga kinabuhi.
72Ginbuhian ni Baquides an mga priso ngan binmalik hiya ngadto han kalugaringon niya nga nasod. Waray na gud hiya kumadto hin Judiyo nga katunaan.
73Natapos an araway didto ha Israel. Nag-ukoy hi Jonatan didto ha Micmas ngan nagtikang hiya hin pagdumara han mga tawo ngan pagpuo han maglingo nga mga Judiyo nga tikang ha Israel.
Who We AreWhat We EelieveWhat We Do
2025 by iamachristian.org,Inc All rights reserved.
