1Nagtirok hi Hadi Tolomeo Sixto han Ehipto hin kasondalohan nga darudamo pa kay han mga baras ha baybayon, ngan nagtirok liwat hiya hin damo hin duro nga mga barko. Tuyo niya an pagrikopo kan Alejandro, pag-agaw han iya ginhadian, basi mahidugang han iya kalugaringon nga ginhadian,
2sanglit kinmadto hiya ha Siria upod an mga saad hin kalinaw, ngan ginbuksan han mga tuminungnong an ira mga ganghaan para ha iya ngan ginkarawat hiya. Ginsugo hira ni Hadi Alejandro hin pagbuhat hini kay ugangan niya hi Tolomeo.
3Kundi han pagtipakadto ni Tolomeo ha amihan nga dapit, nagbutang hiya hin usa nga hugpo hin mga sondalo ha kada bungto.
4Han pag-abot niya ha Asdod, iginpakita ha iya han mga tawo didto an nasunog nga salin han pagrub-a han templo ni Dagon ngan an ngatanan nga ginbungkag didto han syudad ngan han higrani nga mga bungto. May-ada patay nga mga lawas ha ngatanan nga mga dapit. Natambak na dida han inaagian ni Tolomeo an mga lawas han mga tawo nga ginsunog ni Jonatan ha panahon han away.
5Ginsumatan hiya han mga tawo han ginbuhat ni Jonatan, ha paglaom nga iya pagsasalaon hi Jonatan, kundi waray la magyakan hi Tolomeo.
6Hi Jonatan, dida han ngatanan nga angay nga seremonyas, kinmadto ha Jopa hin pagtapo ha iya. Nagsighatagay hira hin katalahoran ngan nagpalabay hiya han gab-i didto.
7Gin-updan hiya ni Jonatan tubtob ha Salog Eleutero san-o hiya bumalik ngadto ha Jerusalem.
8Dida hini nga paagi, ha iya malingo nga tuyo kontra kan Alejandro, ginkaptan ni Tolomeo an mga bungto ha ligid han baybayon tubtob han amihan nga dapit han ilawod nga Seleucia.
9Tikang didto iginpadara ni Hadi Tolomeo kan Hadi Demetrio ini nga mensahe: “Paghimo kita hin usa nga ginsabotan hin kalinaw. Asawa ni Alejandro an akon anak nga babaye, kundi babawion ko hiya ngan ighahatag ko ha imo ngan papaghadion ko ikaw han ginhadian han imo amay.
10Nagbasol ako nga iginhatag ko hiya ngadto kan Alejandro, kay nagtalinguha hiya hin pagpatay ha akon.”
11Ginhimo ni Tolomeo ini nga sumbong kay karuyag niya umagaw han iya ginhadian.
12Sanglit ginbawi niya kan Alejandro an iya anak nga babaye ngan iya iginhatag kan Demetrio; gin-utod niya an ngatanan nga relasyon kan Alejandro, ngan nahimo hira nga tinuod nga magkaaway.
13Niyan sinmulod hi Tolomeo han Antioquia ngan gin-angkon niya an korona han Siria; sanglit hadi na hiya han Ehipto ngan han Siria.
14Hini nga panahon nakadto ha Cilicia hi Hadi Alejandro kay an mga tawo hito nga katunaan inmato man ha iya.
15Kundi han pakabati niya han ginbuhat ni Tolomeo, ginmios hiya hin pagsulong ha iya. Gintapo hiya ni Tolomeo upod in usa nga dako nga hugpo hin kasondalohan ngan napirde hiya ni Tolomeo.
16Tungod kay ginhahangad na man nga gamhanan hi Tolomeo han mga tawo, pinmalagiw hi Alejandro ngadto ha Arabia hin pagpangita hin panalipod,
17kundi ginpugotan hiya hin usa nga Arabe nga ginngangaranan nga Abdiel ngan iya iginpadara kan Tolomeo an iya ulo.
18Paglabay hin duha ka adlaw namatay ngahaw hi Tolomeo, ngan kahuman, pinamatay han taga dida nga mga tuminungnong an mga sondalo nga iya ginbilin didto han mga kota.
19Sanglit dida han tuig 167 nahimo nga hadi hi Demetrio Segundo.
Naruyagan ni Demetrio Segundo hi Jonatan20Hito nga panahon gintirok ni Jonatan an kalalaken-an han Judea para hin pagsulong han kota didto ha Jerusalem. Nagtindog hira hin damo nga mga turungtongan hin pagsulong nga gagamiton nira kon makiaway hira.
21Kundi kinmadto kan Hadi Demetrio Segundo in pira nga maglingo nga mga Judiyo nga nagdumot han kalugaringon nira nga nasod ngan ira ginsumatan hiya nga ginpalibotan ni Jonatan an kota didto ha Jerusalem.
22Han pakabati hini ni Demetrio, napungot hiya ngan iya dayon ginbalhin an iya kampo ngadto ha Tolemaida. Iya ginsuratan hi Jonatan nga undangon niya an pagsulong ngan makigkita hiya ha iya para hin usa nga hiruhimangraw didto ha Tolemaida hin waray gud paglangan.
23Han pakakarawat ni Jonatan han mensahe, nagsugo hiya nga ipadayon an pagsulong, ngan kahuman nagpili hiya hin pira nga Judiyo nga mga pangulo ngan pira nga kapadian nga maupod ha iya. Bisan kon maatubang hiya han kataragman han iya kinabuhi,
24kinmadto hiya han hadi didto ha Tolemaida, nga nagdara hin higlaba nga mga panapton, salapi ug bulawan, ngan damo pa nga mga regalo. Naruyagan hiya han hadi.
25Bisan kon nagpasaka hin mga sumbong kontra kan Jonatan in pira nga magtinalapason nga mga maglingo han kalugaringon nira nga nasod,
26gindumara hiya hin maupay han hadi sugad han ginbuhat han mga una ha iya. Iya ginpasidunggan hi Jonatan ha atubangan han ngatanan niya nga mga magsaragdon,
27ngan gintudlok hiya nga Labaw nga Padi, ibinalik ha iya an ngatanan niya nga kadungganan nga hadto naangkon niya, ngan ihinatag ha iya an gihahataasi nga ranggo dida han “Kasangkayan han Hadi.”
28Ginhangyo ni Jonatan an hadi nga diri na pabayaron hin mga buhis an katunaan han Judea ngan an tulo nga mga distrito han Samaria, nga nagsaad nga kon itugot ini ni Demetrio, titigdan niya hin pagbayad hin 22,000 ka libra nga salapi.
29Inmuyon an hadi ngan nagsurat hiya kan Jonatan hin pagpamatuod hini ngatanan:
30“Tikang kan Hadi Demetrio ngadto kan Hadi Jonatan ngan ngadto han Judiyo nga nasod, damo nga mga pangumosta.
31“Para han imo kasayoran ginpapadad-an ko ikaw hin usa nga kopya han surat nga akon ginsurat ngadto kan Talahoron nga Lastenes hiunong ha imo:
32“‘Tikang kan Hadi Demetrio ngadto han Talahoron nga Lastenes, damo nga mga pangumosta.
33Naglarang ako hin paghatag han Judiyo nga nasod hin pira nga mga kaupayan kay maunongon hira nga aton mga kabulig ngan nagtuman hira han ira mga katungdanan han ginsabotan hin kalinaw.
34Ginparig-on ko an ira mga katungod para han tuna han Judea ngan han tulo nga distrito han Efraim, Lida, ug Arimatea, nga igindugang ha Judea tikang ha Samaria upod an mga tuna hini nga tulo nga distrito. Para ini han kaupayan han ngatanan nga mapasingadto ha Jerusalem hin paghalad hin halad nga tinubod, kay diri na ihahatag ngadto han hadi an tinuig nga buhis han mga abot ngan mga bunga hini nga mga tuna, kundi ngadto na han Templo.
35Iginbuot ko liwat nga diri na hira mabayad ha akon han mga buhis tikang han mga ikanapulo nga bahin, mga plitehan, mga buhis hin asin, ngan linain nga mga buhis.
36Waray gud han mga turumanon nga hinnabihan dida hini nga surat nga pagpaparaon ha tiarabot nga panahon.
37“‘Kinahanglan liwat nga talinguhaon mo hin paghimo hin kompleto nga kopya hini nga pasangyaw ngan ighatag kan Jonatan, basi igpaskin niya didto hin usa nga dayag nga dapit didto han pungtod han Templo.’”
Ginbuligan ni Jonatan hi Demetrio Segundo38Han pakakita ni Hadi Demetrio nga malinaw na an tuna ha ubos han iya paghadi ngan waray iba nga nasupil ha iya, iya ginburublag an bug-os niya nga kasondalohan ngan pinapanguli an ngatanan, labot han mga sinuholan nga sondalo nga tikang han Griego nga kapupud-an. Nasina ha iya an ngatanan nga mga sondalo nga nag-alagad han mga una ha iya, kay nawad-an hira han ira pakabuhi.
39Hinsabotan ni Trifo, an usa han una nga kabulig ni Alejandro, nga nagnginurutob an ngatanan nga mga sondalo hiunong kan Demetrio, sanglit kinmadto hiya kan Imalkue nga amo, an Arabe nga nagmangno kan Antioco nga batan-on nga anak ni Alejandro.
40Nagpabilin didto hin maiha hi Trifo ngan gin-aghat niya hi Imalkue nga ighatag ha iya hi Antioco, basi himoon hiya nga hadi nga liwan han iya amay. Iya liwat ginsumatan hi Imalkue hiunong han mga pasangyaw ni Demetrio ngan han pagdumot ha iya han mga sondalo.
41Nagpadara hi Jonatan kan Hadi Demetrio hin usa nga mensahe ngadto. Naghangyo hiya kan Demetrio nga kuhaon an iya mga sondalo didto ha kota ha Jerusalem ngan didto han mga salipdanan ha Judea, kay ginsisinamok nira an mga Judiyo.
42Nagbaton hi Demetrio: “Tutumanon ko an imo ginhangyo, nga ha pag-abot han igo nga panahon ighahatag ko ha imo ngan han imo nasod an gihahataasi nga kadungganan.
43Kundi yana buligi ako pinaagi hin pagpadara hin mga sondalo nga makikig-away para ha akon, kay inmato ha akon an ngatanan ko nga mga kasondalohan.”
44Sanglit nagpadara hi Jonatan hin 3,000 nga tinutdoan nga mga sondalo ngadto ha Antioquia. Nalipay an hadi han pag-abot nira,
45kay nagtirok didto han syudad in usa ka hugpo hin 120,000 nga magsamok nga mga tawo nga nag-iiparatay ha iya.
46Kundi nakakalagiw hiya ngadto han palasyo samtang naagaw han masamok nga hugpo an kakalsadahan ngan nagtikang ini hira hin pagribok.
47Niyan gintawag han hadi an Judiyo nga mga sondalo hin pangaro hin bulig, ngan nagdagmit hira hin pagbulig ha iya. Ginlatas nira an bug-os nga syudad ngan pinamatay in diri maubos hin 100,000 nga mga tawo.
48Gintalwas nira an kinabuhi han hadi, kundi gintikasan ngan ginsunog nira an syudad.
49Han pakakita han mga tawo nga naagaw han mga Judiyo an bug-os nga syudad, nawad-an hira hin kaisog ngan dinmangop hira han hadi, nga naghangyo hira
50ha iya nga undangon na an araway ngan paukyon na an pagsulong han mga Judiyo.
51Binul-iwan han mga inmato an ira mga hinganiban ngan tinmubyan hira ha iya. Nagkamay-ada na dako nga pagtahod an hadi ngan an ngatanan nga tawo han iya ginhadian para han mga Judiyo nga binmalik ngadto ha Jerusalem dara in damo hin duro nga mga tinikas.
52Nagmarig-on na an paghadi ni Demetrio, ngan nagkamay-ada kalinaw an nasod ha ubos han iya pagkahadi,
53kundi waray niya pagtumana an iya iginsaad ngan iya lugod ginkontra hi Jonatan. Waray niya pagbalosa hi Jonatan tungod han iya maunongon nga pag-alagad, kundi ginpadayon lugod an pagsamok ha iya.
Gin-ugopan ni Jonatan hi Antioco Sixto54Waray pag-iha, binmalik hi Trifo upod an batan-on nga Antioco ngan ginkoronahan hiya nga hadi.
55Niyan nagkaabot an ngatanan nga mga sondalo nga ginhukasan hadto ni Demetrio, hin pag-ugop han batan-on nga hadi. Ira ginpirde hi Demetrio, ngan pinmalagiw ini hiya.
56Ginbihag ni Trifo an mga elepante ngan gin-agaw an Antioquia.
57Nagsurat an batan-on nga Hadi Antioco ngadto kan Jonatan ngan gintudlok hiya nga Labaw nga Padi ngan pangulo han upat nga mga distrito ngan iginhatag ha iya an ngaran nga “Sangkay han Hadi.”
58Iya ginpadad-an hiya hin usa ka hukas nga bulawan nga mga garamiton ha lamesa ngan tinugotan hiya hin pag-inom tikang hin bulawan nga mga kupa, pagsul-ot hin usa nga hadianon nga hilawig nga panapton, ngan pagsul-ot han bulawan nga rayandayan ha sugbong nga ihinahatag la ini ngadto han “Kauropdan han Hadi.”
59Iya liwat gintudlok hi Simon nga bugto ni Jonatan nga gobernador han katunaan tikang han baybayon han Fenicia ngadto han pag-ultan han Ehipto.
60Niyan naglatas hi Jonatan upod an iya kasondalohan han mga bungto han Siria Mayor, ngan nakig-usa ha iya an ngatanan nga Sirianhon nga mga kasondalohan nga mga kabulig nira. Kinmadto hiya ha Ascalon, diin ginkarawat hiya han mga tawo didto upod in dagko nga mga pagpasidungog.
61Niyan kinmadto hiya ha Gaza, kundi gintrangkahan han mga tawo an ira mga ganghaan kontra ha iya. Sanglit iya ginsulong an syudad ngan ginsunog ngan gintikasan niya an higrani nga mga dapit.
62Niyan naghangyo hin kalinaw an mga tawo ha Gaza, ngan ginpaundang ni Jonatan an away. Ginkuha niya an mga anak nga kalalaken-an han mga dumagko han syudad ngan iginpadara hira ngadto ha Jerusalem nga mga bariga. Katapos, nagpadayon hiya tubtob ha Damasco.
63Nahibaro hi Jonatan nga kinmadto ha Kedes didto ha Galilea an mga opisyal ni Demetrio upod in damo nga kasondalohan, nga nagtalinguha hin pag-ulang han iya plano.
64Sanglit iya ginbayaan hi Simon nga iya bugto didto ha Judea ngan ginmawas hiya hin pagtapo ha ira ha pag-awayan.
65Niyan ginsulong ni Simon an Betsur ngan pinakiawayan ini sulod hin maiha nga panahon.
66Nakigsabot hin kalinaw an mga tawo ngan inmuyon hi Simon. Niyan gin-agaw niya an bungto, ginpaiwas niya an mga tawo, ngan ginbutangan niya hin kasondalohan didto.
67Nagkampo hira Jonatan ngan han iya kasondalohan ha ligid han Lanaw Galilea. Temprano pa han pagkaaga gindara niya an iya kasondalohan ngadto han kapatagan han Hazor,
68diin dinmus-og hin pagtapo ha iya an kadak-an han langyaw nga kasondalohan. Waray sabot hi Jonatan nga nagbilin hira hin kasondalohan nga magama didto han kabukiran,
69ngan han pagkagawas ngan pagsulong han mga naggama,
70inmisol ngan nanmalagiw an bug-os nga kasondalohan ni Jonatan. Waray usa nga nahisalin labot hin duha nga mga opisyal, hira Matias nga anak ni Absalom ug Judas nga anak ni Calfi.
71Naalohan hi Jonatan, sanglit iya ginggisi an iya panapton, nagbutang hin tapotapo ha iya ulo, ngan nag-ampo.
72Niyan binmalik hiya ngadto ha pag-awayan, pinamatay an kaaway, ngan nangalagiw an iba ha ira.
73Han pakakita hini han iya liwat nangangalagiw nga mga sondalo, binmalik hira ngan binmulig ha iya hin paglanat. Ginlanat nira an kaaway tubtob han kampo didto ha Kedes ngan gin-agaw nira an kampo.
74Mga 3,000 nga kaaway nga mga sondalo an pinamatay hito nga adlaw. Niyan binmalik hi Jonatan ngadto ha Jerusalem.
Who We AreWhat We EelieveWhat We Do
2025 by iamachristian.org,Inc All rights reserved.
