Judit 1 - Samarenyo Meaning-Based Bible (1984)（MBBSAM）

Nag-away hi Hadi Nabucodonosor ug Hadi Arfaxad

1Han hadi hi Nabucodonosor han mga taga-Asiria tikang han iya kapital nga syudad han Ninibe, hadi man liwat hi Arfaxad han mga taga-Media tikang han iya kapital nga syudad han Ecbatana.

2Ginpalibotan ni Hadi Arfaxad an Ecbatana hin pader nga 35 ka metros an kahitaas ngan 25 ka metros an kadakmol, tikang hin tinabas nga mga bato; an kada bato usa ka metro ug 30 ka sentimetros an kadakmol ngan duha ka metros ug 70 ka sentimetros an kahilaba.

3Dida han kada ganghaan gintindog niya in usa nga lantawan nga 50 ka metros an kahitaas ngan an patukoranan 30 ka metros an kadakmol.

4Kada ganghaan 35 ka metros an kahitaas ngan 20 ka metros an kahiluag—igo kahiluag nga an bug-os niya nga kasondalohan makaagi, upod an hugpo han naglalakat nga kasondalohan.

5Dida han ika-12 ka tuig nga pagkahadi ni Hadi Nabucodonosor, nakig-away hiya kontra kan Hadi Arfaxad didto han hiluag nga kapatagan nga naglilibot han syudad han Rages.

6Damo nga mga nasod an nakig-usa kan Hadi Arfaxad—an ngatanan nga mga tawo nga nag-ukoy didto han kabukiran, adton mga nag-ukoy ha ligid han mga salog Tigris, Eufrates, ug Idaspes, sugad man adton mga nag-ukoy didto han kapatagan nga ginhadian ni Hadi Arioc han Elam. Damo nga mga nasod an tinmampo hin pakig-urosa han kasondalohan han mga tulin ni Queleud.

7Niyan nagpadara hi Hadi Nabucodonosor han Asiria hin mensahe ngadto han mga Persiahanon ngan ngadto han mga tawo ha katundan, didto han katunaan han Cilicia, Damasco, Libano, Antilibano, ngadto hadton mga nag-uokoy ha ligid han baybayon,

8ngan didto han katunaan han Carmelo, Galaad, ha amihan nga dapit han Galilea, ngan Kahamub-an han Jezrael.

9-10Inmabot liwat an mensahe ngadto han mga tawo nga nag-ukoy didto ha Samaria ngan han kahigrani nga mga bungto, ngadto han katunaan didto ha katundan han Salog Jordan tubtob han mga syudad han Jerusalem, Betania, Kelus, ug Cades, ngan ngadto han distrito han Gosen. Gindara liwat an mensahe ngadto han Ehiptohanon nga mga syudad han Tafanes, Rameses, Tanis, ug Memfis, ngan han distrito ha iraya han Salog Nilo ngadto han pag-ultan han Sudan.

11Kundi waray mamati an kada usa dinhe hini nga bug-os nga distrito han hangyo ni Hadi Nabucodonosor ngan dinmiri hira hin pag-api han araway. Naghunahuna hira nga waray hiya higayon hin pakadaog han araway, sanglit waray hira kahadlok ha iya ngan ginpabalik an iya mga surugoon nga naalohan ngan waray dara.

12Nakapapungot ini hin duro kan Nabucodonosor nga nakagsumpa hiya nga ig-uunong niya an bug-os niya nga ginhadian hin pagbulos hini ngatanan nga mga tawo. Nagsumpa hiya nga pamamatayon niya an bug-os nga umurokoy han Cilicia, Damasco, Siria, Moab, Amon, Juda, ug Ehipto—an ngatanan tikang han Dagat Mediteraneo ngadto han Dagat Persia.

13Dida han ika-17 ka tuig han iya pagkahadi nakig-away hi Hadi Nabucodonosor kan Hadi Arfaxad. Gindaog niya an ngatanan nga kasondalohan ni Arfaxad, lakip an bug-os niya nga mga dikabayo nga kasondalohan, ngan an ngatanan nga mga dikaruwahe nga mga kasondalohan.

14Niyan ginsakop ni Nabucodonosor an ngatanan nga mga bungto didto ha tuna han Media ngan ginsulong niya an syudad han Ecbatana. Naagaw niya an mga lantawan han syudad, pinanikasan an mga taboan ngan ginbungkag an maanyag nga syudad.

15Hindakpan niya hi Hadi Arfaxad didto han kabukiran nga naglilibot han Rages ngan ginpatay hiya. Han kamatay na ni Arfaxad,

16binmalik hi Nabucodonosor ngan an bug-os niya nga kasondalohan ngadto ha Ninibe upod an ngatanan nga mga tinikas nga nakuha didto ha pag-awayan. Didto nagpahalibway hira ngan nagkombite hira sulod hin upat ka bulan.