Mga Salmo 101 - Samarenyo Meaning-Based Bible (1984)（MBBSAM）

Nagsaad in Hadi

1Pag-unong, kamatadong ak' kakantahon,

ha imo, Ginoo, akon aawiton.

2Panggawi ko diri magmamasalaypon;

san-o ka pa ngani kakadi ha akon?

Magpuputli ako han akon urokyan;

3magraot nga buhat di' ko tutugotan.

Napupungtan ko an mga binuhatan

han nabaya han Dyos nga mga katawhan.

Diri ako manginginlabot ha ira,

(ngan maupay nga pasagdan nala hira.)

4Diri na gud ako magmamalimbongon,

bis' karat-an diri paghunahunaon.

5Tawo nga matamay akon pupuohon,

nga han iya sangkay naglilinibakon.

Diri manta ako hin tawo mauyon,

hadton parayawan ngan mapahitas-on.

6An matinumanon han Dyos karuyag ko,

ngan pauokyon ko ha akon palasyo;

hira nga tinuod nga tangkod nga tawo,

pagsirbe ha akon hira tugotan ko.

7Waray gudman mga tawo nga buwaon nga makakaukoy ha palasyo nakon;

waray salingkapaw man nga malimbongon ha atubangan ko makakagpadayon.

8Adlaw-adlaw akon gud pagpupuohon,

tanan nga magraot hinin tuna naton;

tanan nga magraot ak' paiiwason,

tikang hadton syudad han Ginoo naton.