1Kundi nagbuwa liwat hi Simon (an tawo nga hinnabihan hadto, nga amo an tawo nga nagsumat kan Apolonio hiunong han kwarta, ngan nagdara hin kasamok ha nasod) hiunong kan Onias. Nagsiring hiya nga hi Onias amo an may baratonon han pagdasmagi kan Heliodoro ngan han kakurian nga sinmunod.
2Nangahas hiya hin pagsumbong kontra kan Onias hiunong hin malingoon nga larang kontra han pamunoan—hi Onias nga diri la naghatag hin mga donasyon ngadto ha Jerusalem ngan nagpanalipod han Templo, kundi nagtinguha liwat nga pagsugton an ngatanan naton nga mga balaod.
3-4Gindasig ni Apolonio nga anak ni Menesteo, nga gobernador han Asia Mayor, hi Simon ha ngatanan nga magraot nga iya ginbuhat, ngan ha kataposan nagmakusog hin duro an pagtipa ni Simon nga damo na an pinamatay han usa han iya mga sinarigan nga mga sumusunod. Hinsabtan ni Onias nga makuri an iya kamutangan,
5sanglit kinmadto hiya han hadi, diri hin pagpasaka hin mga sumbong kontra han iya igkasi mga nasodnon, kundi para han kaupayan han ngatanan nga mga Judiyo, dida han ira tagsa ngan kadam-an nga kinabuhi.
6Hinsabtan niya nga kon diri an hadi bumulig ha iya, waray gud hira paglaom hin kalinaw, ngan magpapadayon hi Simon han iya binuang nga panuyo.
Iginpasunod ni Jason an Griego nga mga Pamatasan7Niyan han kamatay ni Hadi Seleuco ngan kahimo nga hadi ni Antioco (nga ginkilala nga Epifanes), nahimo nga Labaw nga Padi hi Jason nga bugto ni Onias ha maraot nga paagi.
8Nakigkita hiya han hadi ngan gintagan niya hin 12,270 ka kilo nga salapi upod hin dugang pa nga 2,725 ka kilo nga isusunod liwat hin paghatag.
9Labot hini nagsaad pa hi Jason hin 5,570 ka libra nga salapi basi katugotan hiya hin pagtindog hin usa nga murulayan diin matututdoan an batan-on nga kalalaken-an ngan hin paglista han mga tawo han Jerusalem nga mga tuminungnong han Antioquia.
10Inmuyon hini an hadi, ngan han pagkapot la ni Jason han katungdanan han pagka Labaw nga Padi, iya dayon gintinguha hin pagbalhin han pamatasan han mga tawo han Jerusalem ngadto han pamatasan han mga Griego.
11Gintikangan ini niya pinaagi hin pag-utda niya han mga kaupayan nga nakuha ni Juan tikang han una nga Sirianhon nga kahadian. (Hi Juan amo an amay ni Eupolemo nga kinmadto ha Roma hin paghimo hin usa nga ginsabotan hin kalinaw ngan hin pakigsangkay.) Ginsalikway liwat ni Jason an mga pamatasan han mga Judiyo ngan ginliwanan ini hin bag-o nga mga pamatasan nga supak han aton Balaod.
12Ha dako nga kasindak nagtindog hiya hin usa nga uruyagan hirani han pungtod han Templo ngan ginmandoan an aton gimamag-upayi nga batan-on nga kalalaken-an hin pagkarawat han Griego nga pamatasan hin pag-api dida hin urugyag.
13Tungod hin labis na nga kamaraot ni Jason, an diri dyosnon ngan diri matuod nga natudlok nga Labaw nga Padi, an pagpalabi han Griego ngan han langyaw nga pamatasan inmabot na hin sugad nga pagkaruyag
14nga bisan an kapadian nawad-an na han ngatanan hira nga karuyagon hin pagtuman han ira baraan nga mga katungdanan. Nawad an hira hin karuyagon han mga pag-alagad ha Templo ngan ginpasibay-an an mga halad nga tinubod. Ha pakakabati gudla nira han senyal nagdadagmit hira dayon hin pag-api han urugyag nga igindiri han aton Balaod.
15Waray na hira panginlabot hiunong hin bisan ano nga butang nga ginpalabi han ira kaapoy-apoyan; asay lugod nira ginpalabi an Griego nga mga pagpasidungog.
16Ngan nahimo ini nga tinikangan han ngatanan nira nga kasamokan, kay an mga tawo ngahaw kanay kinabuhi ira ginkaruyag ngan kanay pamatasan ira gintalinguha hin pagsubad, nahimo nga ira mga kaaway ngan gintalumpigos hira.
17Usa nga grabe nga butang an pagpasibaya han Balaod han Dyos, sumala han iyo hikikit-an tikang han masunod nga mga hinabo.
An Jerusalem ha Ubos han Gahom han Siria18Usa ka higayon, han pagtambong han hadi han urugyag nga ginbuhat ha kada lima ka tuig didto han syudad han Tiro,
19nagsugo ito nga waray hangkag nga Jason hin pira ka tawo tikang ha Jerusalem nga nahilista liwat nga mga tuminungnong han Antioquia, hin pagdara hin 10,225 ka kilo nga salapi nga igbabayad hin usa nga halad nga tinubod ngadto han diyos nga hi Hercules. Kundi bisan ngani ini nga mga tawo naghunahuna nga diri angay paggamiton in sugad nga kadamo nga kwarta para hin usa nga halad nga tinubod,
20sanglit an kwarta nga para unta hin usa nga halad nga tinubod ngadto kan Hercules, gingamit lugod hin paghimo hin mga barko ha pakig-away.
21Han pagsugoa kan Apolonio nga anak ni Menesteo ngadto ha Ehipto hin pagtambong han pagkorona kan Filometor nga hadi, nahibaro hi Antioco nga nadiri han iya mga paagi hi Filometor. Nabaraka hi Antioco hiunong han kahimyangan han kalugaringon niya nga ginhadian, sanglit kinmadto hiya ha Jopa ngan nagpadayon ngadto ha Jerusalem.
22Didto ihinatag ha iya an gimamahusayi nga pag-abiabi ni Jason ngan han mga tawo han syudad nga nagkagawas hin pagtapo ha iya, nga nanggogogliat ngan nagdadara hin mga sulo. Tikang ha Jerusalem ginmandoan ni Antioco an iya kasondalohan ngadto ha Fenicia.
Nahimo nga Labaw nga Padi hi Menelao23Paglabay hin tulo ka tuig, ginsugo ni Jason hi Menelao (nga bugto han Simon nga hinnabihan hadton una pa) hin pagdara hin kwarta ngadto han hadi ngan panginsayod kon ano an iya katuhayan hiunong hin pira nga importante nga mga butang.
24Kundi han pag-atubang na niya han hadi nalipay ha iya an hadi tungod han iya iginpakita nga iya gahom ngan tungod han iya iginsaad nga 10,225 ka kilo nga salapi nga larolabaw kay han iginsaad ni Jason para han katudlok niya nga Labaw nga Padi.
25Tungod hini, binmalik hi Menelao ngadto ha Jerusalem dara an papeles tikang han hadi, nga nagpaparig-on han iya katungdanan hin ka Labaw nga Padi. Kundi waray hiya iba nga mga hiyas; may-ada niya kinaiya hin usa nga madarahog ngan waray pagpaid nga punoan; sugad hiya hin kamapintas hin ihalas nga mananap.
26Hi Jason nga naglimbong ngahaw han kalugaringon niya nga bugto han katungdanan hin pagka Labaw nga Padi napirit yana hin pagkalagiw ngadto han tuna han Amon.
27Nagpadayon hi Menelao hin ka Labaw nga Padi, kundi waray hiya bumayad han bisan ano nga kwarta nga iya iginsaad han hadi.
28Kundi nagpadayon hin pagsukot han kwarta hi Sostrates nga kapitan han kota didto ha Jerusalem, kay katungdanan ini niya hin pagsukot hini nga kwarta. Sanglit ha kataposan ginpaatubang han hadi ini nga duha ka tawo mahitungod hini nga butang.
29Ginbilin ni Menelao hi Lisimaco nga iya bugto nga amo anay an Labaw nga Padi, samtang ginbilin man ni Sostrates an kota ha ubos han pagmando ni Crates nga kapitan han mga sinuholan nga kasondalohan nga mga taga-Cipre.
Ginpatay hi Onias30Niyan, nahinabo in usa nga karibok didto han mga syudad han Tarso ug Mallo ha Cilicia, kay iginhatag han hadi ito nga mga syudad ngadto kan Antioquia nga iya aruasawa.
31Sanglit iginbilin han hadi kan Adronico nga usa han iya labaw nga mga opisyal an pamunoan, samtang nagdagmit hiya ngadto ha Cilicia hin pagpahiuli han kalinaw.
32Ginpahimulosan ni Menelao ini nga higayon ngan gintagan niya hi Andronico hin pira han bulawan nga mga butang nga iya ginkuha didto han Templo ha Jerusalem. Iya na iginbaligya an iba hini ngadto han syudad han Tiro ngan ngadto han iba nga higrani nga mga syudad.
33Han pakabati ni Onias hiunong hini, kinmalagiw hiya ngadto hin usa nga templo didto ha Dafne nga hirani han syudad han Antioquia ngan hin waray lipodlipod ginpasangilan niya hi Menelao.
34Niyan gin-aghat hin hilom ni Menelao hi Adronico hin pagpatay kan Onias. Sanglit kinmadto hi Andronico kan Onias ngan ginlimbongan niya hi Onias pinaagi hin minagsarangkay nga pangumosta ngan hin mga saad nga waray maglalabot ha iya. Bisan kon nakatahap hin maraot hi Onias, ha kataposan nahugay hiya gihapon ni Andronico hin paggawas han templo, ngan ha gilayon ginpatay hiya ni Andronico.
Ginkastigo hi Andronico35An mga Judiyo ngan mga Hentil nasina hin duro tungod han pagpataya kan Onias.
36Sanglit han pagbalik han hadi tikang han katunaan han Cilicia, kinmadto ha iya an mga Judiyo han Antioquia ngan nagsumbong hira han hadi hini nga tinuyaw nga pagpatay. Damo gihapon nga mga Hentil in nagsumbong ha iya hiunong hini nga sala.
37Duro an kabido ni Hadi Antioco nga waray hiya makapugong hin pagtangis han paghinumdomi niya han kinaadman ngan han kamaaram magpugong han kalugaringon nga ginpakita ni Onias ha bug-os niya nga kinabuhi.
38Napungot hin duro hi Antioco nga iya ginrabotan hi Andronico han iya hadianon nga hilawig nga panapton, ginhuboan hiya, ngan iginlibot hiya han syudad tubtob han dapit nga ginpatayan kan Onias. Niyan iginpapatay ni Antioco hi Andronico, an mapintas nga parapamatay. Amo ini an sirot nga ihinatag han Ginoo nga angay ha iya.
Ginpatay hi Lisimaco39Hito ngahaw nga panahon hi Lisimaco binuligan ni Menelao nga iya bugto nakadamo na pagtikas han Templo ha Jerusalem ngan pagkuha hin damo nga bulawan nga mga butang didto han Templo. Han paghisaboti hini nga buhat, nagtikang hin pagtirok in kadam-an nga mga tawo ha pagsumbong kontra kan Lisimaco.
40Ha kataposan makuri na masaway an mga tawo, sanglit nagsugo hi Lisimaco hin 3,000 nga armado nga mga tawo hin pagsulong ha ira. Ginmandoan hira ni Aurano, usa nga lagas na ngan baga kulangkulang nga tawo.
41Han pakasabot han mga Judiyo didto han bungsaran han Templo han nahinabo, nanmurot hira hin mga bato, mga sipak hin kahoy, o nagharop naman la hin mga agbon tikang han altar ngan iginlabay ini ngadto kanda Lisimaco ngan han iya mga tawo dida han nagkakarigumok na.
42Pinanmatay nira in pira han mga tawo ni Lisimaco, nagkasasamad in damo ha ira, ngan nagmalagiw an ngatanan nga nanhisalin. Ginpatay hi Lisimaco, ini nga tikasan han templo hirani han hirimosan han manggad han Templo.
Ginsumbong hi Menelao43Tungod hini nga hinabo, gindara ha hukmanan hi Menelao.
44Han pagkadto han hadi ha syudad han Tiro, nagpadara an Judiyo nga mga punoan didto ha Jerusalem hin tulo ka tawo hin pagpasaka hin sumbong kontra kan Menelao.
45Han pakasabot ni Menelao nga waray niya mahihimo, iya gintagan hi Tolomeo nga anak ni Dorimene hin usa nga dako nga hukip basi lukmayon niya an hadi hin pag-ugop ha iya.
46Sanglit ginhangyo ni Tolomeo an hadi nga gumawas han hukmanan upod ha iya, nga daw sugad hin nagpapahangin la, ngan didto iya ginlukmay an hadi hin pagliwat han iya hunahuna,
47ngan igpahayag nga waray sala hi Menelao han mga sumbong kontra ha iya. Sanglit ginbuhian hi Menelao bisan kon amo hiya an tinikangan han kasamok; kundi ginhukman lugod hin kamatayon an tulo ka tawo nga bisan ngani an maghuka nga mga Estita andam hin pagpahayag nga diri ini hira salaan.
48Naghimangraw an tulo ka tawo ha pagpanalipod han Jerusalem, han mga tawo hini ngan han baraan nga mga butang nga ginkawat tikang han Templo, kundi ha kadagmitan iginpapatay hira hin diri matadong nga paagi.
49Kundi iginpakita hin pira nga mga tawo ha Tiro an ira kahangit hini nga paghukom ngan iginpakita liwat an ira pagtahod hini nga tulo ka tawo pinaagi hin paghatag ha ira hin hadianon nga paglubong.
50Nagpabilin hi Menelao dida han iya katungdanan tungod han kahalot hadton mga aada ha kagamhanan. Nagdugang an iya pagkamaraot ha kada adlaw ngan nahimo hiya nga labi hin ka maraogdaog nga kaaway han kalugaringon niya nga mga tawo.
Who We AreWhat We EelieveWhat We Do
2025 by iamachristian.org,Inc All rights reserved.
