Judit 16 - Samarenyo Meaning-Based Bible (1984)（MBBSAM）

Nagkanta hi Judit hin Pagdayaw

1Niyan nagkanta hi Judit hin usa nga pagpasalamat didto ha atubangan han bug-os nga Israel, ngan sinmabat an mga tawo hini nga kanta hin pagdayaw.

2Nagkanta hiya,

“Pagdayawon an akon Dyos ngan pagkantahi hiya;

an Ginoo pagdayawa

hin mga bumbo ngan mga simbal,

hin bag-o nga kanta pagtokari hiya.

Pagdayaw ngan pagtawag hin pakibulig ha iya.

3Usa nga paraaway an Ginoo nga nagkatapos hin araway.

Tikang han mga naglalanat ha akon, iya ginbawi ako,

ngan iginbalik ako ngadto han kampo han iya mga tawo.

4Nagkaabot an mga Asiriahanon tikang han amihanan nga kabukiran,

upod an ira yinukotyukot nga kasondalohan.

Ira ginsagpo an mga salog han mga kahamub-an,

naluob an kabukiran han ira mga sondalo ngan kakabayohan.

5Ira gintarhog an aton nasod nga pagsusunogon,

an aton kaulitawhan ira panmamatayon,

iglalambos ha tuna an mga minasus-an naton,

sugad hin mga bihag an aton mga anak ighahalin,

ngan an ngatanan naton nga kadaragan-an pipiriton nira hin pagdara.

6Kundi ginlipat hira han Ginoo nga Labi Kamakagarahum;

usa la nga babaye an iya ginamit pagtagpo ha ira ngatanan.

7Waray pagpataya an ira bayani hin batan-on nga kasondalohan,

o pagsulonga ngan pagpataya hin mga higante nga gamhanan.

An babaye nga anak ni Merari nga Judit an ngaran,

han iya kamahusay iya hiya ginpukan.

8Iya tinagan hin pagdarag-an an ginraogdaog nga mga Israelita,

han iya paghugkasa han kanan balo nga mga panapton niya,

ngan nagsul-ot hin lino nga bado hin paglukmay ha iya.

Marahalon nga mga pahamot an ginamit niya ngan ginhigtan hin laso an buhok niya.

9Nalukmay an iya mga mata han iya maanyag nga mga sandalyas;

nabihag an iya kasingkasing han kamahusay niya.

Niyan ginpugot an iya liog han espada.

10Nangurog an mga Persiahanon han kawaray niya kahadlok.

Nahiburong an mga Medotanhon han iya kamaisog.

11Niyan naggogliat an aton mga tawo ha pagdarag-an.

Nagin magluya hira ngan ginraogdaog

kundi napirit nira an kaaway hin pag-isol ha kahadlok ngan kalisang.

12Amo kita an mga tulin hin mga oripon,

kundi tinmalikod ngan nanmalagiw an mga kaaway tikang ha aton;

aton pinamatay hira sugad hin kalagiw nga mga oripon.

Ginbungkag hira han

kasondalohan han Ginoo naton.

13“Magkakanta ako ngadto han akon Dyos hin kanta nga bag-o.

O Ginoo, pagkamakusog ngan pagkaharangdon mo!

Waray pa gud may nakapirde ha imo.

14Mag-alagad unta ha imo an mga binuhat mo ngatanan.

An sugo imo ginyayakap,

ngan nahihimo hira ngatanan;

imo hira gininhawaan,

ngan nagkabubuhi hira ngatanan.

Waray nakakariwa han imo mga sugo.

15Nangurog an kabukiran ngan kadagatan,

ngan han pagduok mo natunaw an kababtoan.

Kundi kinalolooyan an ngatanan nga nagsusugot ha imo.

16Mas nalilipay an Ginoo hadton mga nagtutuman

kay han ngatanan nga pinili nga karne dida han halaran,

o han gihahamoti nga mga halad ngatanan.

17Mapupuo an mga nasod nga nasupil han akon mga tawo.

Ha adlaw han paghukom kakastigihon hira han Ginoo nga Labi Kamakagarahum.

Magpapadara hiya hin kalayo ngan hin mga ulod nga magkakaon han ira kalawasan,

ngan magtatangis hira ha kasakit nga waray kataposan.”

Nahibantog hi Judit

18Han pag-abot han mga tawo didto ha Jerusalem, naglinis hira ha ira ngahaw ngan nagsingba han Dyos. Ira iginhalad an ira mga hayop nga tinubod, mga halad nga huyayag hin kaburot-on, ngan mga bugay.

19Iginhalad ni Judit ngadto han Dyos an ngatanan nga mga hiagi ni Holofernes nga iginhatag ha iya han mga tawo. Ngan sugad hin usa nga linain nga halad ha pagtuman hin usa nga pagsumpa, iya iginhalad ngadto han Ginoo an moskitero nga iya ginkuha tikang han kama ni Holofernes.

20Sulod hin tulo ka bulan nagpadayon an mga tawo hin pagsaurog ha atubangan han templo han Jerusalem, ngan nagpabilin didto hi Judit upod ha ira.

21Han katapos na han mga pagsaurog, inmoli ha balay an ngatanan, ngan binmalik hi Judit ngadto ha Betulia hin pag-ukoy didto han kalugaringon niya nga tana. Ha nahibilin pa nga mga adlaw han iya kinabuhi bantogan hiya ha bug-os nga tuna han Israel.

22Damo nga kalalaken-an an naruyag hin pangasawa ha iya, kundi waray na gud liwat pangasawa hiya kahuman kamatay ni Manases nga iya bana.

23-24Nagpadayon hin pagsarang an iya kabantogan, ngan nag-ukoy hiya didto han balay nga iginbilin ha iya han iya bana. San-o hiya mamatay ginbahinbahin niya an iya mga hiagi ngadto han suok nga kauropdan niya ngan han iya bana, ngan gintagan niya hin kagawasan an iya oripon nga babaye. Han kamatay niya didto ha Betulia ha panuigon nga 105, iginlubong hiya sapit han iya bana, ngan nagmabidoon an mga tawo han Israel sulod hin pito ka adlaw tungod han iya pagkamatay.

25Samtang nga buhi pa hi Judit, ngan sulod hin damo nga katuigan katapos niya mamatay, waray na gud may nagpasipara hin pagtarhog han mga tawo han Israel.