Jeremias 45 - Samarenyo Meaning-Based Bible (1984)（MBBSAM）

Nagsaad kan Baruc an Dyos

1Dida han ikaupat ka tuig nga pagkahadi han Juda ni Joakim nga anak ni Josias, iginsurat ni Baruc an iginpasurat ko ha iya. Niyan ginsumatan ko hiya

2nga nagsiring an Ginoo, an Dyos han Israel, “Baruc,

3nasiring ka, ‘Nagtuturaw na ako! Gindugangan han Ginoo hin kabidoan an akon mga kakurian. Ginugul-an na ako hin pagnginuyngoy ngan diri na ako nakakapahuway!’

4“Kundi ako nga Ginoo an magruruba han akon gintindog ngan maggagabot han akon gintanom. Pagbubuhaton ko ini dida ha bug-os nga tuna.

5Nagbibiling ka ba hin talagsaon nga pagdumara ha imo? Ayaw pagbuhata ini. Ipadadara ko an karat-an ngadto han ngatanan nga mga tawo, kundi makakalikay ka han imo kinabuhi bisan ngain ka kadto. Ako nga Ginoo an nagyakan.”